ينستاگرام الەمىندەگى پاراقشاسىندا پرەزيدەنتىمىز توقاەۆتىڭ كەڭەسشىسى ماقسات سقاقوۆ تۇسىنىكسىز، ءارى رەنىش تۋدىراتىن جازبا جاريالادى. بىلدەي شەنەۋنىك دەگەن اتىنا مىناداي جازبا لايىق پا؟ باعاسىن ءوزىڭىز بەرىڭىز وقىرمان.
سۋرەتتە م.سقاقوۆ.
«باياعىدا بەس بالا تاپقان ءبىر وتكىر كەلىنشەك وتە جۋاس، سىعىر كۇيەۋىن مەنسىنبەي ، بەس بالاسىن تاستاپ، توركىنىنە كەتىپ قالىپتى. سول كەزدە ۋيىنە ءبىر بۇزىقتاۋ قاينىسى كەلىپ قالىپتى. "جەڭەشەم قايدا؟" دەسە ، اعاسى مىڭگىرلەپ دۇرىس جاۋاپ بەرە الماپتى. باسقا جەڭگەلەرى ايتىپ ءتۇسىندىرىپتى. ەكى اۋىلدىڭ اراسى تىم الىس بولماسا كەرەك، دولىلىقپەن جاياۋ تارتقان جەڭگەسىنىڭ سوڭىنان تۇرا قۋىپتى جىگىت. جەتىپ الىپ "جەڭەشە، قايت" دەپتى.جەڭەشەسى قۇلاعىنا دا قىستىرماپتى. "جەڭەشە، قايت" دەپتى قايتالاپ.جەڭەشەسى كوكىرەگى قايقايعان كۇيى العا تارتا بەرىپتى."جەڭەشە، سوڭعى رەت ايتامىن، جاقسىلىقپەن ۇيگە قايت " دەپتى جىگىت. جەڭگەسى تىڭدار ەمەس. "اتتىڭ باۋىرىنا سالىپ ساباپ ،الدىنا وڭگەرىپ الىپ كەلىپتى داعى، " قاتىنىڭا يە بول! " دەپ اعاسىنىڭ الدىنا لاقتىرىپ جىبەرىپتى.
ەرتەسىنە كۇيەۋى جوق كەزدە، ابىسىندارى جيىلىپ كەلىپ، كەلىنشەكتىڭ جاعدايىن ءبىلىپتى. "سۇراماڭدار، مەن راحاتتانىپ جاتىرمىن دەپتى اساۋ كەلىن ءتىلى زورعا قيمىلداپ. سورلى اۋ، ولەيىن دەپ جاتىپ، راحاتىڭ نە ايتىپ تۇرعان ؟ تاياق قاتا ءتيىپ ميىڭا زاقىم كەلگەن شىعار ؟" دەگەن ايەلدەرگە " جووق، مەن شىنىندا دا " ەركەكتىڭ قولى" دەگەن قانداي بولاتىنىن ءبىرىنشى رەت سەزىنىپ، جانىم را-حات-تانىىپ جاتىر "- دەگەن جاۋاپ ەستىپتى.
ايەلدىڭ تەنتەك بولسا دا اقىلدى بولعانى،
ەركەكتىڭ نامىستى، جىگەرلى، وتتى بولعانى دۇرىس-اۋ دەپ قالاسىڭ وسىندايدا».
پرەزيدەنت كەڭەسشىسىنىڭ جازباسى وسى. ارينە، بۇل بار بولعانى ءتامسىل عانا. دەسەك تە، بۇل جازبانىڭ تەرەڭىنە ۇڭىلگەن ادامنىڭ ويىنا ەڭ الدىمەن نە كەلەدى؟ «ايەلدى ۇرۋ كەرەك. تاياق جەگەن ايەل «راحاتتانىپ، ەسىن، اقىلىن جينايدى» دەگەن سارىن بايقالادى ەمەس پە؟ پرەزيدەنتتىڭ كەڭسشىسى وسىنداي دۇنيەمەن ءبولىسىپ جاتقاندا، باسقالار قاراپ قالسىن با، استىنا جازىلعان پىكىرلەر دە جاعا ۇستاتارلىق ەكەن. قاراڭىز:(پىكىرلەر تۇزەتىلمەگەن كۇيى بەرىلىپ وتىر-رەد.)
مەنىڭدە ءبىر كەلىنىم بار. توركىنگە كەلىپ وتىرعادا. ايەلدەر قالىپ اڭگىمە بولىپ كەتتى وسى ەرلى زايىتىلار اراسىندا. سونداعى كەلءىنىمنىڭ ايتقانى”كەيدە سول جۇدىرىقتى ءوزىمىز تىلەپ تۇرعانداي،تۇشتاڭداپ ،ايقايلاپ،ۇرىسىپ كەتەمىز. سول كەزدە جۇدىرىق تيگەنەن كەيىن،جىنىنىڭ باسىلعانداي،تىنىش جايباراحات جاعىدايعا كىرەسىڭ”دەپ كۇلدىرگەنى بار😁👍. ومىردە اقىلمەن كوتەرە بىلۋدە كورەگەندىلىك دەپ ويلايمىن.
Əيەل ءۇشىن جۇماق.. كۇيەۋىنىڭ تابانىنىڭ استىندا...
سوندا قاينىسى جەڭگەسىن ساباپ اكەلىپ بەردىما ،
ناگىز ەركەك كاينىسى.
👍👍👍دۇرىس ومىردەن الىنعان جاعداي
قايىن ءىنىسى جەڭگەسىن ۇرعانى ەرىسى ەتىلەدى ەكەن😬
اگا سالاماتسىز با،تىم اسيرەلەپ جيبەرگەن جوكسىز با؟
دۋرىس بولگان ەكەن ايەل ادامگا جىن شايتان جاكىن جۋرەدي سوندىكتان اندا ساندا ايەلدين شانىن كاگىپ تۋرگان دۋرىس اۋ👍
دۇرىس ايتاسىن
دۋرىس ەكەن
بىزبەن تىلدەسكەن ازاماتتاردىڭ پىكىرى مىناداي:
«بيلىكتە جۇرگەن كوكەلەرىمىز ايەلدى ۇرۋدى دۇرىس كورسە، وندا جەتكەن جەرىمىز وسى بولار. بۇل قالاي؟ ايەلدى ۇرىپ، اقىل كىرگىزۋ دەگەن نە سۇمدىق؟ ءسىزدىڭ ايەلىڭىز بىرەۋدىڭ الپەشتەپ وسىرگەن قىزى ەمەس پە؟ مارات سقاقوۆتىڭ ەگەر قىزى بولسا، سول قىزىن قاينىسى ساباپ، كوالا قويداي ەتسە، نە ىستەر ەكەن؟ «دۇرىس، اقىلىن كىرگىزدىڭ» دەپ العىس ايتار ما ەكەن قۇدا بالاسىنا؟» دەپ كۇيىنەدى زەينەتكەر وقىرمانىمىز اۋەلحان شونجان.
«ايەلگە قول كوتەرگەن ەركەكسىماقتىڭ ءوزىن سولاي ساباۋ كەرەك! بۇل ناداندىق! بۇل قاراڭعىلىق! كۇشى تاسىپ بارا جاتسا، سول ەركەك مال تاۋىپ، وتباسىنىڭ جاعدايىن جاساسىنشى. ايەلگە عانا شاماسى جەتەتىن بەيشارا ەركەكتەرگە جانىم اشيدى»، دەيدى ءبىز سۇراۋ سالعان جاننا ادامبەكقىزى.
«ايەلدىڭ شايتانىن ءتۇسىرۋ كەرەك دەيتىن وسىنداي ۇستانىمداعى دۇمشەلەر قاپتادى. ايەلدە شايتان بولسا، نەمەنەگە قاسىندا جاتاسىڭ دەگىم كەلەدى سونداي توپاستارعا. ءدىن دەپ شوقشا ساقالى شوشاڭداپ، تەكە قۇساپ سەلكىلدەگەن قىسقا بالاقتى پەندەلەردىڭ ءوزى كىمگە ۇقسايتىنىن اجىراتىپ السا ەكەن اۋەلى. ايەلدىڭ جاتىرىنان شىعىپ، اق ءسۇتىن ەمىپ ءوسىپ الىپ، «شايتانعا» تەڭەيتىن پاقىرلاردىڭ جۇرەگىندە تامشى يمانى، باسىندا ءبىر تۇتام اقىلى جوق دەپ سانايمىن!» دەيدى ءدىنتانۋشى ايبار قاراباي.
قالاي دەسەك تە، ايەلدى تاياقپەن تاربيەلەۋدى بيلىك وكىلدەرىنىڭ ءسوز ەتۋى قازىرگى قوعامىمىزدىڭ كورىنىسى، سيقى دەمەسكە لاج جوق سياقتى. ءسىز قالاي ويلايسىز، قۇرمەتتى وقىرمان؟
راۋانا ديماشقىزى،
«ادىرنا» ۇلتتىق پورتالى.
فوتو اشىق دەرەككوزدەن الىندى.
