دەنساۋلىق ساقتاۋ مينيسترلىگى باسشىسىنىڭ مىندەتىن ۆيتسە-مينيستر جاندوس بۇركىتباەۆ اتقارادى، دەپ حابارلايدى "ادىرنا" ۇلتتىق پورتالى sputnik.kz-كە سىلتەمە جاساپ.
دەنساۋلىق ساقتاۋ ءمينيسترىنىڭ مىندەتىن اتقارۋ دەنساۋلىق ساقتاۋ ۆيتسە-ءمينيسترى جاندوس قونىسۇلى بۇركىتباەۆقا جۇكتەلسىن، - دەلىنگەن پرەمەر-مينيستر قول قويعان قۇجاتتا.
ايتا كەتەيىك، 20 جەلتوقساندا مەملەكەت باسشىسى الەكسەي تسويدى دەنساۋلىق ساقتاۋ ءمينيسترى قىزمەتىنەن بوساتۋ تۋرالى جارلىققا قول قويدى. سودان كەيىن دەنساۋلىق ساقتاۋ مينيسترلىگىنىڭ ءباسپاسوز قىزمەتى تسويدىڭ ءوز ەركىمەن قىزمەتىنەن بوساتىلعانىن ايتتى.
ال الەكسەي تسوي الەۋمەتتىك جەلىدە جازبا جاريالاپ, دەنساۋلىق ساقتاۋ سالاسىن عىلىم مەن الەۋمەتتىك باستامالار ارقىلى دامىتۋدى قولعا الاتىنىن مالىمدەدى.
جاندوس بۇركىتباەۆ دەگەن كىم؟
جاندوس بۇركىتباەۆ 1971 جىلى جامبىل وبلىسىندا دۇنيەگە كەلگەن. مەديتسينا عىلىمدارىنىڭ كانديداتى. اسفەندياروۆ اتىنداعى الماتى مەملەكەتتىك مەديتسينا ۋنيۆەرسيتەتىن "ەمدەۋ ءىسى" باعىتى بويىنشا بىتىرگەن. ل.ن. گۋميلەۆ اتىنداعى ەۋرازيا ۇلتتىق ۋنيۆەرسيتەتىن "مەملەكەتتىك جانە جەرگىلىكتى باسقارۋ" ماماندىعى بويىنشا، وڭتۇستىك قازاقستان مەديتسينالىق اكادەمياسىن "فارماتسيا" ماماندىعى بويىنشا جانە "تۇران-استانا" ۋنيۆەرسيتەتىن "قۇقىقتانۋ" ماماندىعى بويىنشا تامامداعان.
ەڭبەك جولىن 1996 جىلى الماتىداعى قالالىق جەدەل مەديتسينالىق كومەك كلينيكالىق اۋرۋحاناسىنىڭ دارىگەرى بولىپ باستاعان. ءار جىلدارى دەنساۋلىق ساقتاۋ مينيسترلىگىنىڭ ءتۇرلى قۇرىلىمدىق بولىمشەلەرىندە جۇمىس ىستەدى. ەلوردادا قان ورتالىعىن، ترانسفۋزيولوگيا عىلىمي-وندىرىستىك ورتالىعىن باسقاردى.
2019-2021 جىلدارى ۇلتتىق عىلىمي ونكولوگيالىق ورتالىقتىڭ باسقارما باسشىسى بولدى. 2021 جىلدىڭ 22 قاڭتارىندا باستاپ دەنساۋلىق ساقتاۋ ۆيتسە-ءمينيسترى لاۋازىمىنا تاعايىندالدى.
"ادىرنا" ۇلتتىق پورتالى
