قازاقستاندا سوڭعى 12 جىلدا (2008 جىلدان 2020 جىلعا دەيىن) قۇرىلىس جۇمىستارىنىڭ كولەمى 2,8 ەسەگە (1,7 ترلن تەڭگەدەن 4,9 ترلن تەڭگەگە دەيىن) ۇلعايدى.
قۇرىلىس سالاسىنىڭ سەرپىندى دامۋىنىڭ ارقاسىندا قۇرىلىس ماتەريالدارى ءوندىرىسىنىڭ كولەمى 3,3 ەسە (176 ملرد تەڭگەدەن 586 ملرد تەڭگەگە دەيىن) ۇلعايدى. وڭدەۋ ونەركاسىبى كولەمىندە (10 ترلن تەڭگە) وسى سەكتوردىڭ ۇلەسى 6 %-دى قۇرايدى. قۇرىلىس سالاسىنىڭ ءوسۋ سەرپىنى تۇرعىن ءۇي-كوممۋنالدىق دامۋدىڭ «نۇرلى جەر»، يندۋستريالىق-يننوۆاتسيالىق دامۋدىڭ «نۇرلى جول»، مەملەكەتتىك باعدارلامالارى، جۇمىسپەن قامتۋدىڭ جول كارتاسى اياسىندا اۋقىمدى ينۆەستيتسيالارمەن جانە «ەكسپو-2017» حالىقارالىق كورمەسى، ۋنيۆەرسيادا، استانانىڭ 20 جىلدىعى، رەسەي-قازاقستان فورۋمى سياقتى ءىرى الەۋمەتتىك-مادەني ءىس-شارالاردى ىسكە اسىرۋمەن بايلانىستى.
ناتيجەسىندە، قالالاردىڭ، ەلدى مەكەندەردىڭ ساۋلەتى جاقسارتىلدى، تاريحي-مادەني مۇرالار جاڭعىرتىلدى، كولىك ماگيسترالدارى رەتكە كەلتىرىلدى، ءتۇرلى وندىرىستىك كەشەندەر، زاۋىتتار، الەۋمەتتىك جانە تۇرعىن ءۇي نىساندارى سالىندى. ەل تاۋەلسىزدىك العاننان بەرى بارلىعى 169 ملن شارشى مەتردەن استام جاڭا تۇرعىن ءۇي سالىندى. 1,5 ملن ادامنىڭ تۇرعىن ءۇي جاعدايى جاقساردى.
«اعىمداعى جىلى 17 ملن شارشى مەتر تۇرعىن ءۇي (163,1 مىڭ تۇرعىنجاي) سالۋ جوسپارلانعان، بيىلدىڭ ون ايىندا 11,6 ملن شارشى مەتر (+107,9%) تۇرعىن ءۇي نىساندارى پايدالانۋعا بەرىلدى. ەلىمىزدە تۇرعىن ۇيمەن قامتاماسىز ەتۋ ءبىر تۇرعىنعا شاققاندا 22,6 شارشى مەترگە، ونىڭ ىشىندە قالالىق جەرلەردە – 25 شارشى مەترگە، اۋىلدىق جەرلەردە 19,3 شارشى مەترگە جەتتى»، - دەپ اتالىپ وتكەن قر يندۋستريا جانە ينفراقۇرىلىمدىق دامۋ مينيسترلىگى مالىمەتىندە.
تۇرعىن ءۇي قورىن جاڭارتۋ جانە جاڭعىرتۋ، ساپالى اۋىز سۋمەن قامتاماسىز ەتۋ جانە كوممۋنالدىق سەكتور وبەكتىلەرىن قولداۋ ەسەبىنەن ازاماتتاردىڭ ءومىر سۇرۋىنە قولايلى ورتا قۇرۋعا ايتارلىقتاي ءمان بەرىلەدى. 2020 جىلدىڭ قورىتىندىسى بويىنشا سۋمەن جابدىقتاۋ قىزمەتتەرىنە ەلىمىزدە حالىقتىڭ 94,1 پايىزى، ونىڭ ىشىندە قالا حالقىنىڭ 97,5 پايىزى جانە اۋىل حالقىنىڭ 90,1 پايىزى قامتاماسىز ەتىلدى. بيىل سۋمەن جابدىقتاۋ جانە سۋ بۇرۋ جۇيەلەرىن سالۋعا ءارى رەكونسترۋكتسيالاۋعا 151,4 ملرد تەڭگە، ونىڭ ىشىندە قالالاردا – 77,3 ملرد تەڭگە، اۋىلداردا 74,1 ملرد تەڭگە كوزدەلگەن. 2021 جىلدىڭ قورىتىندىسى بويىنشا رەسپۋبليكانىڭ بارلىق حالقىنىڭ 95 پايىزىن سۋمەن جابدىقتاۋ قىزمەتتەرىمەن قامتۋ جوسپارلانعان، ونىڭ ىشىندە: قالالاردا 98 %، اۋىلداردا - 91,8 % بولادى.
"ادىرنا" ۇلتتىق پورتالى.
