ەلوردادا «بالۋان تاس» اتتى ەكى تومدىق كىتاپتىڭ تۇساۋكەسەرى وتەدى

7894
Adyrna.kz Telegram

22 جەلتوقساندا قر ۇلتتىق مۋزەيى عىلىمي كىتاپحاناسىندا تاۋەلسىزدىكتىڭ 30 جىلدىعى جانە قاجىمۇقان مۇڭايتپاسۇلىنىڭ 150 جىلدىعىنا ارنالعان مادەنيەتتانۋشى-لينگۆيست ابىلايحان قالنازاروۆتىڭ «بالۋان تاس. بالۋاندار مەن كۇرەس ونەرىنە بايلانىستى اڭىز-ءافسانالار، قيسسا-داستاندار، ەل اۋزىنداعى اڭگىمەلەر (تاريحي دەرەكتەر)» اتتى ەكى تومدىق اۆتورلىق-جيناق كىتابىنىڭ تۇساۋكەسەرى وتەدى، دەپ حابارلايدى "ادىرنا" ۇلتتىق پورتالى.

كىتاپقا قازاق حالقىنىڭ بالۋاندارى مەن كۇرەس ونەرىنە قاتىستى اڭىز-ءافسانالارى، قيسسا-داستاندارى، ەل اۋزىنداعى اڭگىمەلەر، كەيبىر جەكەلەگەن تاريحي دەرەكتەر ەنگىزىلگەن. باستى مازمۇندى اتى اڭىزعا اينالعان الاپات كۇش يەلەرى مەن ولاردىڭ بالۋاندىق جولىنداعى توسىن حيكايالارى مەن وقيعالارى، شەشەندىك سوزدەرىنىڭ شوعىرى قۇرايدى. مۇندا قازاقشا كۇرەس پەن جەكپە-جەك ءداستۇرى كوشپەندى قوعامنىڭ ازاماتتىق قۇندىلىقتارى تۇرعىسىنان قاراستىرىلعان.

كىتاپ جاڭالىعى – ۇلتتىق سپورت پەن دەگدارلىق مادەنيەت تۋرالى جاڭا كوزقاراس قالىپتاستىرادى. سونىمەن قاتار باياندالعان وقيعالاردىڭ تانىمدىق-پاتريوتتىق تۇرعىدا ماڭىزى اسا زور.

ءىس-شاراعا ى.التىنسارين اتىنداعى ۇلتتىق ءبىلىم اكادەمياسىنىڭ پرەزيدەنتى عاني بەيسەمباەۆ، قازاقستان بارىسى ەرجان شىنكەەۆ جانە باسقا دا تانىمال تۇلعالار مەن ەسترادا جۇلدىزدارى، ءبىلىم-عىلىم، باق جانە سپورت سالاسى وكىلدەرى قاتىسادى دەپ كۇتىلۋدە.

كىتاپ تۇركىستاندىق «بالاۋسا» شارۋاقوجالىعىنىڭ باسشىلارى مامىرايحان قالنازاروۆ پەن مەيىرحان قالنازاروۆتىڭ دەمەۋشىلىگىمەن جارىق كورىپ وتىر.

مەكەن-جايى: نۇر-سۇلتان،  قر ۇلتتىق مۋزەيى عىلىمي كىتاپحاناسى زالى، تاۋەلسىزدىك داڭعىلى، 54

مەرزىمى: 2021 جىلدىڭ 22 جەلتوقسانى، ساعات: 15.00

"ادىرنا" ۇلتتىق پورتالى

 

پىكىرلەر