ق.توقاەۆ: تاۋەلسىزدىك ۇرپاقتارى - جاڭا قازاقستاننىڭ باستى سيمۆولدارىنىڭ ءبىرى

1035
Adyrna.kz Telegram

تاۋەلسىزدىك ۇرپاقتارى - جاڭا قازاقستاننىڭ باستى سيمۆولدارىنىڭ ءبىرى. بۇل تۋرالى بۇگىن اقوردادا «تاۋەلسىزدىك قۇرداستارى» گرانتىن سالتاناتتى تابىستاۋ شاراسىندا مەملەكەت باسشىسى قاسىم-جومارت توقاەۆ ايتتى.

«قۇرمەتتى جاستار! بارشاڭىزدى كەلە جاتقان ۇلى مەيرام - تاۋەلسىزدىك كۇنىمەن شىن جۇرەكتەن قۇتتىقتايمىن. بۇگىنگى كەزدەسۋىمىزدىڭ ەرەكشە ءمان-ماڭىزى بار. تاۋەلسىزدىك ۇرپاقتارى - شىن مانىندە جاڭا قازاقستاننىڭ باستى سيمۆولدارىنىڭ ءبىرى. ەلىمىز دەربەس مەملەكەت بولعاننان بەرى ويى ەركىن، رۋحى ازات تۇتاس بۋىن ءوسىپ جەتىلدى. تاۋەلسىزدىك پەرزەنتتەرىنىڭ الدىڭعى تولقىنى ەر جەتىپ، ەل ىسىنە ارالاسا باستادى. ولار وتانىمىزدىڭ ءوسىپ-وركەندەۋىنە ءوز ۇلەسىن قوسىپ كەلە جاتىر»، - دەپ اتاپ ءوتتى مەملەكەت باسشىسى. قاسىم-جومارت توقاەۆ ەگەمەندىك كەزەڭىندە تۋىپ وسكەن جاستارىمىزعا ارناۋلى گرانت بەرۋدى تاپسىرعانىن اتاپ ءوتتى.

«بۇل - تالانتى ۇل-قىزدارىمىزدىڭ باستامالارىن قولداۋ ءۇشىن جاسالعان قادام. قازاقتا «جاس كەلسە ىسكە» دەگەن جاقسى ءسوز بار. حالقىمىز جاستارعا ءاردايىم سەنىم ارتىپ، ەرەكشە ءۇمىت كۇتكەن. ۇرپاقتىڭ تاربيەسىنە، ءبىلىمدى، بىلىكتى بولۋىنا ايرىقشا دەن قويادى. دارىندى جاستارىمىز ەلىمىزدىڭ بولاشاعىنا دەگەن سەنىمدى نىعايتا تۇسەدى. ولاردىڭ تۋعان ەلگە قىزمەت ەتۋگە قۇلشىنىسى قۋانتادى. مەن گرانت جەڭىمپازدارى ۇسىنعان جوبالارمەن تانىسىپ شىقتىم. بۇل جوبالاردىڭ كوپشىلىگىندە ەكولوگياعا باسا ءمان بەرىلگەنىن بايقادىم. بۇل وتە دۇرىس. ويتكەنى، قورشاعان ورتانى قورعاۋ قازىر بارشا ازامات ءۇشىن اسا ماڭىزدى ماسەلە. كەڭ بايتاق جەرىمىزدىڭ بىرەگەي تابيعاتىن ساقتاۋ ءبارىمىزدىڭ قاسيەتتى بورىشىمىز. جاستاردىڭ تىڭ يدەيالارى ناقتى جۇزەگە اسىپ، حالىقتىڭ يگىلىگىنە اينالادى دەپ سەنەمىن. شىن مانىندە بۇل ەلىمىزدىڭ مەرەيتويىنا تاۋەلسىزدىك ۇرپاقتارىنىڭ تارتۋى بولماق»، - دەدى قر پرەزيدەنتى.

 

پىكىرلەر