Táýelsizdik urpaqtary - jańa Qazaqstannyń basty sımvoldarynyń biri. Bul týraly búgin Aqordada «Táýelsizdik qurdastary» grantyn saltanatty tabystaý sharasynda Memleket basshysy Qasym-Jomart Toqaev aıtty.
«Qurmetti jastar! Barshańyzdy kele jatqan uly meıram - Táýelsizdik kúnimen shyn júrekten quttyqtaımyn. Búgingi kezdesýimizdiń erekshe mán-mańyzy bar. Táýelsizdik urpaqtary - shyn máninde jańa Qazaqstannyń basty sımvoldarynyń biri. Elimiz derbes memleket bolǵannan beri oıy erkin, rýhy azat tutas býyn ósip jetildi. Táýelsizdik perzentteriniń aldyńǵy tolqyny er jetip, el isine aralasa bastady. Olar Otanymyzdyń ósip-órkendeýine óz úlesin qosyp kele jatyr», - dep atap ótti Memleket basshysy. Qasym-Jomart Toqaev egemendik kezeńinde týyp ósken jastarymyzǵa arnaýly grant berýdi tapsyrǵanyn atap ótti.
«Bul - talanty ul-qyzdarymyzdyń bastamalaryn qoldaý úshin jasalǵan qadam. Qazaqta «jas kelse iske» degen jaqsy sóz bar. Halqymyz jastarǵa árdaıym senim artyp, erekshe úmit kútken. Urpaqtyń tárbıesine, bilimdi, bilikti bolýyna aıryqsha den qoıady. Daryndy jastarymyz elimizdiń bolashaǵyna degen senimdi nyǵaıta túsedi. Olardyń týǵan elge qyzmet etýge qulshynysy qýantady. Men grant jeńimpazdary usynǵan jobalarmen tanysyp shyqtym. Bul jobalardyń kópshiliginde ekologııaǵa basa mán berilgenin baıqadym. Bul óte durys. Óıtkeni, qorshaǵan ortany qorǵaý qazir barsha azamat úshin asa mańyzdy másele. Keń baıtaq jerimizdiń biregeı tabıǵatyn saqtaý bárimizdiń qasıetti boryshymyz. Jastardyń tyń ıdeıalary naqty júzege asyp, halyqtyń ıgiligine aınalady dep senemin. Shyn máninde bul elimizdiń mereıtoıyna Táýelsizdik urpaqtarynyń tartýy bolmaq», - dedi QR Prezıdenti.
