الماتىدا قازاقستان ۇيعىرلارىنىڭ رەسپۋبليكالىق مادەني ورتالىعى وكىلدەرىنىڭ كەزدەسۋى ءوتتى، دەپ حابارلايدى قازاقپارات قر اقپارات جانە قوعامدىق دامۋ مينيسترلىگىنە سىلتەمە جاساپ.
كەزدەسۋ قازاقستان تاۋەلسىزدىگىنىڭ 30 جىلدىعىنا ورايلاستىرىلىپ، اقپارات جانە قوعامدىق دامۋ مينيسترلىگىنىڭ قولداۋىمەن ءوتتى. «ناتيجەلى پىكىر الماسۋ بولىپ، وزەكتى ماسەلەلەر تالقىلاندى. قازاقستاننىڭ 1991 جىلى مەملەكەتتىك ەگەمەندىك الۋى – ەتنوسارالىق قاتىناستاردى دامىتۋعا جاڭا مۇمكىندىكتەر اشقانى اتاپ ءوتىلدى»، - دەلىنگەن ءباسپاسوز حابارلاماسىندا.
كەزدەسۋگە قازاقستان حالقى اسسامبلەياسىنىڭ مۇشەلەرى، ەتنومادەني بىرلەستىكتەردىڭ جەتەكشىلەرى مەن بەلسەندى مۇشەلەرى، عىلىمي-شىعارماشىلىق زيالى قاۋىم، جاستار ۇيىمدارىنىڭ وكىلدەرى قاتىستى.
ايتا كەتەيىك، ۇيعىرلاردىڭ رەسپۋبليكالىق مادەني ورتالىعى – قازاقستان حالقى اسسامبلەياسىنا قاراستى قازاقستان ۇيعىرلارىن بىرىكتىرەتىن جالعىز ۇيىم.
«قازاقستان حالقى اسسامبلەياسى ۇيعىر ەتنوسىنىڭ تۋعان مادەنيەتىن ساقتاۋعا، سونداي-اق تۇڭعىش پرەزيدەنت – ەلباسى نۇرسۇلتان نازارباەۆ نەگىزىن قالاعان قازاقستانداعى ەتنوسارالىق كەلىسىم قاعيداتتارىن دامىتۋعا جاردەمدەسەدى. قازاقستان ۇيعىرلارى، ادەتتە، ءۇشتىلدى. انا تىلىنەن باسقا مەملەكەتتىك قازاق جانە ورىس تىلدەرىن جاقسى بىلەدى»، - دەدى ءىس-شارانىڭ مودەراتورى، قازاقستان حالقى اسسامبلەياسىنىڭ مۇشەسى جانە ۇيعىر رەسپۋبليكالىق مادەني ورتالىعىنىڭ توراعاسى شايماردان نۇرىموۆ.
