تاۋەلسىزدىك كۇنى الماتىدا 106 ءسابي دۇنيەگە كەلدى، دەپ حابارلايدى “ادىرنا” ۇلتتىق پورتالى الماتى تەلەارناسىنا سىلتەمە جاساپ.
تاۋەلسىزدىكتىڭ 30 جىلدىعىندا №2 قالالىق پەرزەنتحانادا 14 ءسابي دۇنيەگە كەلدى: 11 ۇل جانە 3 قىز. دارىگەرلەردىڭ ايتۋىنشا، بارلىق بوسانۋ ءساتتى وتكەن. قازىر دارىگەرلەر بوسانعان ايەلدەردىڭ وزدەرىن جايلى سەزىنۋى ءۇشىن بارلىق جاعدايدى جاساپ جاتىر. مەرەيتويلىق داتاعا وراي ەمدەۋ مەكەمەسىنىڭ ۇجىمى انالارعا سىي-سياپات جاساۋدى ءجون كوردى.
"انالارىمىز مەرەكەنى سەزىنسىن دەپ سىي جاسادىق. پەرزەنتحانادا جۇرگەندە بىزدە مەرەكە ەكەنىن ۇمىتىپ كەتەدى", - دەيدى №2 قالالىق پەرزەنتحانا باس دارىگەرىنىڭ ورىنباسارى نازگۇل يمانعاليەۆا.
مۇنداي اتاۋلى داتالاردا بالالارعا ەرەكشە ەسىمدەر بەرۋ – ۇيرەنشىكتى ادەت دەيدى ماماندار. نەگىزىنەن جاڭا تۋعان نارەستەلەرگە كورنەكتى قايراتكەرلەر، ارتىستەر مەن اكتەرلەردىڭ ەسىمدەرى بەرىلگەن. ماسەلەن، وسى پەرزەنتحانادا ءبىر كەلىنشەك سابيىنە حالىق قاھارمانى قايرات رىسقۇلبەكوۆ ەسىمىن بەرۋدى ۇيعاردى.
ء"سابيىمىز 16 جەلتوقساندا دۇنيەگە كەلگەندىكتەن وعان قايرات باتىردىڭ ەسىمىن بەرۋدى ۇيعاردىق. تاۋەلسىز قازاقستاننىڭ انا اتانعانىما وتە قۋانىشتىمىن. بالامىزدىڭ سالماعى 2 كەلى 100 گرامم بولدى", - دەيدى قالا تۇرعىنى سامال ءجۇرسىنباي.
بوسانعاننان كەيىنگى ايەلدەردىڭ جاعدايى تولىق جاسالعان. مۇندا ءبارى ۇساق-تۇيەككە دەيىن ويلاستىرىلعان. مىسالى، ءار توسەكتىڭ جانىندا قوڭىراۋ تۇيمەلەرى ورناتىلعان. بۇل جاڭا تۋعان نارەستە نەمەسە ونىڭ اناسى كەنەتتەن اۋىرىپ قالسا، ونى باسۋعا بولادى جانە دارىگەرلەر شۇعىل تۇردە وسىندا كەلەدى. وسىلايشا، ماماندار ناۋقاستارعا دەر كەزىندە جانە قاجەتتى كومەك كورسەتەدى.
ستاتيستيكاعا سۇيەنسەك، الماتىدا كۇنىنە 100-دەن استام ءسابي دۇنيەگە كەلەدى. حالىق ساناعىنىڭ قورىتىندىسى بويىنشا قازاقستاندىقتاردىڭ سانى بۇگىندە 19 ميلليوننان اسادى. ولاردىڭ 34 پايىزعا جۋىعى 17 جاسقا دەيىنگى بالالار مەن جاسوسپىرىمدەر.
”ادىرنا” ۇلتتىق پورتالى
