الماتىداعى قازاقستان رەسپۋبليكاسى ۇلتتىق كىتاپحاناسىندا 2021 جىلدىڭ 20 جەلتوقسانى، ساعات 15.00-دە «فوتوونەر» قوعامدىق بىرلەستىگىنىڭ ۇيىمداستىرۋى جانە قازاقستان اۆتورلارى قوعامى مەن قر ۇلتتىق كىتاپحاناسىنىڭ قولداۋىمەن، تاۋەلسىزدىكتىڭ 30 جىلدىعىنا ارنالعان «تاۋەلسىزدىك تاعىلىمى-30» اتتى فوتوكورمەنىڭ اشىلۋى وتەدى.
كورمەگە ەلىمىزدىڭ ەگەمەندىك العاننان بەرگى تاريحي وقيعالاردى، ۇلتتىق سالت-ءداستۇردى، وڭىرلەردەگى تىرشىلىكتى نازاردان قالت جىبەرمەگەن ۇزدىك فوتوجۋرناليستەردىڭ تۋىندىلارى قويىلادى. شارانىڭ ماقساتى – ەگەمەن ەل رەتىندەگى وتىز جىل ىشىندە فوتوسۋرەتشىلەردىڭ وبەكتيۆتەرىنە ىلىنگەن مەملەكەتتىك، قوعامدىق، ساياسي جانە رۋحاني ماڭىزى بار ساتتەر مەن وقيعالاردى كەلەر ۇرپاققا شەجىرە تۇرىندە قالدىرۋ بولىپ تابىلادى.
فوتوكورمەگە ۇسىنىلعان ءاربىر قۇندى سۋرەتتەن حالقىمىزدىڭ ازاتتىق العان جىلداعى «اق تۇيەنىڭ قارنى جارىلعان» قۋانىشىنان باستاپ، ونى قالىپتاستىرۋداعى سان قاتپارلى جۇمىستار مەن سەزىمدى سەلت ەتكىزەر ساتتەردى كورەرمەن ءبىر كۇندە تاماشالاپ شىعۋىنا بولادى.
كورمەگە ۇسىنىلعان 100-گە جۋىق تۋىندىنىڭ اۆتورلارى قاتارىندا قازاقستاندىق فوتوگرافيانىڭ ابىز تۇلعالارى سانالاتىن يوسيف بۋدنەۆيچ، راحىمباي حانالى، مۇرات مامبەتوۆ، نۇرعوجا جۇبانوۆ، جۇنىسبەك پايىزوۆ، سيەز باسىبەكوۆ،قايرات مۇستافين،دەندەرباي ەگىزوۆ، سايلاۋ پەرنەباەۆ، قاليعۇمار قابدەشۇلى، اناتولي ۋستينەنكو، ەسىمحان ورىنباەۆ، بولات وماراليەۆ، نۇرمانبەت قيزاتۇلى، جاقسىلىق تۇرلىبەكوۆ،الەكساندر پاۆسكي، شۇكىر شاحاي، يۋري بەككەر، ايتجان مۇرزانوۆ، فارحاد قابدىقايىروۆ جانە بۇگىنگى جاس بۋىن وكىلدەرىنەن ەرلان وماروۆ، جەڭىس ىسقاباي، ماقسات شاعىرباي جانە ت.ب. تالانتتى ازاماتتاردىڭ ەڭبەكتەرى قويىلادى.
"ادىرنا" ۇلتتىق پورتالى
