Almatyda «Táýelsizdik taǵylymy-30» atty fotokórme ótedi

2516
Adyrna.kz Telegram

Almatydaǵy Qazaqstan Respýblıkasy Ulttyq kitaphanasynda 2021 jyldyń 20 jeltoqsany, saǵat 15.00-de «Fotoóner» qoǵamdyq birlestiginiń uıymdastyrýy jáne Qazaqstan avtorlary qoǵamy men QR Ulttyq kitaphanasynyń qoldaýymen, Táýelsizdiktiń 30 jyldyǵyna arnalǵan «Táýelsizdik taǵylymy-30» atty fotokórmeniń ashylýy ótedi.

Kórmege elimizdiń egemendik alǵannan bergi tarıhı oqıǵalardy, ulttyq salt-dástúrdi, óńirlerdegi tirshilikti nazardan qalt jibermegen úzdik fotojýrnalısterdiń týyndylary qoıylady. Sharanyń maqsaty – egemen el retindegi otyz jyl ishinde fotosýretshilerdiń obektıvterine ilingen memlekettik, qoǵamdyq, saıası jáne rýhanı mańyzy bar sátter men oqıǵalardy keler urpaqqa shejire túrinde qaldyrý bolyp tabylady.

Fotokórmege usynylǵan árbir qundy sýretten halqymyzdyń azattyq alǵan jyldaǵy «aq túıeniń qarny jarylǵan» qýanyshynan bastap, ony qalyptastyrýdaǵy san qatparly jumystar men sezimdi selt etkizer sátterdi kórermen bir kúnde tamashalap shyǵýyna bolady.

Kórmege usynylǵan 100-ge jýyq týyndynyń avtorlary qatarynda qazaqstandyq fotografııanyń abyz tulǵalary sanalatyn Iosıf Býdnevıch, Rahymbaı Hanaly, Murat Mámbetov, Nurǵoja Jubanov, Júnisbek Paıyzov, Sıez Básibekov,Qaırat Mustafın,Denderbaı Egizov, Saılaý Pernebaev, Qalıǵumar Qabdeshuly, Anatolıı Ýstınenko, Esimhan Orynbaev, Bolat Omaralıev, Nurmanbet Qızatuly, Jaqsylyq Turlybekov,Aleksandr Pavskıı, Shúkir Shahaı, Iýrıı Bekker, Aıtjan Murzanov, Farhad Qabdyqaıyrov jáne búgingi jas býyn ókilderinen Erlan Omarov, Jeńis Ysqabaı, Maqsat Shaǵyrbaı jáne t.b. talantty azamattardyń eńbekteri qoıylady.

"Adyrna" ulttyq portaly

 

Pikirler