كابۋلدا ءبىر توپ ايەل كوشەگە شىقتى. جوقشىلىقتان ءسىڭىرى شىققان ولار ءتالىپ جاساعىنان قورقۋدى دا قويعان، دەپ حابارلادى “ادىرنا” ۇلتتىق پورتالى 24.kz سايتىنا سىلتەمە جاساپ.
ايەلدەر «تاليبان» (قازاقستاندا تىيىم سالىنعان ۇيىم) بيلىگىنەن جۇمىس ىستەۋگە كەدەرگى جاساماۋدى تالاپ ەتتى. ولار كوشەگە «تاماق، جۇمىس، بوستاندىق» جانە «اۋعانستاندى وپاتتان قۇتقارىڭدار» دەگەن ۇران كوتەرىپ شىققان.
بەلسەندىلەردىڭ ايتۋىنشا، مەملەكەتتىك قىزمەتتە ىستەپ كەلگەن ايەلدەر قازىر ۇيدە وتىر. سونداي-اق ەلدىڭ كوپ بولىگىندە قىزداردىڭ مەكتەپكە بارۋىنا تىيىم سالىنعان. اشىنعان ايەلدەر «جاعداي بۇلاي بولا بەرسە، ءبارىمىز اشتان قاتامىز» دەيدى.
«وتباسىمىزدى اسىراۋعا ءبىر ءتىلىم نان تابا الماي وتىرمىز. كۇندەلىكتى قاجەتتى ۇن مەن سۇيىق ماي ساتىپ الۋعا كوك تيىنىمىز جوق. ۇكىمەتتەن ەش قايران جوق. جاعدايىمىز وتە قيىن»، – دەپ اشىندى ەرەۋىلشىلەردىڭ ءبىرى مارجان احمادي.
“ادىرنا” ۇلتتىق پورتالى
