نۇر-سۇلتاندا 2022 جىل ماۋسىمىنداعى Astana Qazaqstan Team كومانداسى تانىستىرىلدى

9932
Adyrna.kz Telegram

قازاقستان ەلورداسى نۇر-سۇلتان قالاسىندا «سارىارقا» ۆەلوترەگىندە Astana Qazaqstan Team كاسىبي ۆەلوكومانداسىنىڭ 2022 جىل ماۋسىمىنا ارنالعان رەسمي تۇساۋكەسەرى ءوتتى. ءىس-شارا قازاقستان رەسپۋبليكاسىنىڭ 30 جىلدىعىنا ورايلاستىرىلعان.

الەمدىك تۋردا 17-ءشى ماۋسىمدى باستاۋعا دايىندالىپ جاتقان كوماندانىڭ جاڭا قۇرامىنا الەمنىڭ جەتى ەلىنەن (قازاقستان، يتاليا، كولۋمبيا، يسپانيا، اقش، بەلارۋس، وڭتۇستىك افريكا) 29 شاباندوز كىردى.

وتكەن ماۋسىمدا ءۇش رەت جەڭىس تۇعىرىنا كوتەرىلگەن جانە «تۋر دە فرانس» كوپكۇندىگىنىڭ جالپى ەسەبىندە 7-ءشى ورىنعا يە بولعان الەكسەي لۋتسەنكو (قازاقستان), «دجيرو د'يتاليا» مەن «يسپانيا ۆۋەلتا» قولا جۇلدەگەرى ميگەل انحەل لوپەس (كولۋمبيا), گراند-تۋردىڭ ءۇش دۇركىن جەڭىمپازى (استانا» كومانداسىنىڭ قۇرامىندا ەكى رەت «دجيرو د'يتاليا» مەن ءبىر «تۋر دە فرانس») ۆينچەنتسو نيبالي (يتاليا), كلاسسيكالىق ۆەلوبايگە شەبەرى، وتكەن ماۋسىمدا ەكى رەت جەڭىسكە جەتكەن جانە تارتىسقا تولى «پاريج-رۋبە» جارىسىندا 4-ءشى ورىنعا يە بولعان دجانني موسكون (يتاليا) كوماندا كوشباسشىسى اتاندى.

23 جاسقا دەيىنگى شاباندوزدار اراسىندا قازاقستان چەمپيونى نۇربەرگەن نۇرلىحاسىم مەن  «گران پرەميو دەللا ليبەراتسيا» ءبىر كۇندىك جارىسىنىڭ جەڭىمپازى، يتاليالىق ميشەل گادزولي  جاڭا ماۋسىمدا كوماندا قۇرامىنا ەنگەن جاس سپورتشىلار رەتىندە تانىستىرىلدى.

كوماندا كوشباسشىلارىنىڭ، سونداي-اق كوماندانىڭ باسقا مۇشەلەرى قاتىساتىن جارىس كۇنتىزبەسى 4-19 جەلتوقساندا يسپانيادا وتەتىن كوماندانىڭ دايىندىق جاتتىعۋ جيىنىندا انىقتالادى.

Astana Qazaqstan Team باس سپورت ديرەكتورى، وتاندىق مامان الەكساندر شەفەر,  سپورت ديرەكتورلار  ماريو مانزوني مەن ورلاندو مايني (ەكەۋى دە - يتاليا) باپكەرلەر تىزىمىنە ەندى.

الداعى ماۋسىمدا ۆەلوۇجىم قۇرامىن جاڭارتىپ قانا قويماي جارىس جولىنا جاڭا Astana Qazaqstan Team اتاۋىمەن شىعادى.

Qazaqstan - قازاقستاننىڭ اعىلشىن ترانسكريپتسياسىنداعى ەڭ ءدال جانە دۇرىس اتاۋ. Qazaqstan - حالىقارالىق سپورت ارەنادا  عاسىرلىق ءداستۇردى، ءتىلدى، مادەنيەت پەن ەلدىڭ قازىرگى الەمدەگى دامۋ ستراتەگياسىن بىرىكتىرگەن جاڭا برەند.

«ترانسفەرلىك كەزەڭدەگى قيىندىقتارعا قاراماستان، ماۋسىم الدىندا جوعارى جەتىستىكتەرگە جەتۋگە قاۋقارلى جانە كوماندانى جەڭىسكە جىگەرلەندىرەتىن بىرقاتار شاباندوزدارمەن كەلىسىمگە كەلدىك. بىرنەشە مىقتى كوشباسشىلارمەن قوش ايتىسقانىمىزبەن دەڭگەيى جوعارى  شاباندوزداردى قاتارعا قوستىق. كوماندا جاڭارتىلدى، بىراق ءبىز جانكۇيەر ءبىلىپ ۇيرەنگەن «استانا» كومانداسى بولىپ قالا بەرەمىز، ءبىزدى  الەم تانيدى. ۆينچەنتسو نيبالي، ميگەل انحەل لوپەس پەن اندرەي زەيتس سىندى شاباندوزداردىڭ ورالۋى كومانداعا قوسىمشا سپورتتىق تۇراقتىلىق پەن ءوز كۇشىنە دەگەن سەنىمدىلىكتى بەرەدى. دجانني موسكون، دجو دومبروۆسكي، داۆيد دە لا كرۋس، ۆالەريو كونتي جانە باسقا دا سپورتشىلاردىڭ كەلۋى ماقساتىمىزدى ايقىنداي ءتۇستى، جاڭا مۇمكىندىكتەر اشتى. ال الەكسەي لۋتسەنكو سياقتى كوشباسشىلار  كوماندانىڭ بەتكە ۇستارلارى، ونىڭ نەگىزىن قالاۋشىلار. شاباندوزدارمەن قاتار باپكەرلەر قۇرامىن دا كۇشەيتتىك، وتاندىق مامان الەكساندر شەفەردىڭ ءالى دە بەرەرى مول. بۇگىن قازاقستان تاۋەلسىزدىگىنىڭ وتىز جىلدىعى قارساڭىندا نۇر-سۇلتاندا تانىستىرىلعان كوماندا جاڭا ماۋسىمدا تولاعاي تابىسقا جەتەتىن جانە Astana Qazaqstan Team نامىسىن ابىرويمەن قورعايتىن مىقتى ۇجىم بولادى دەپ سەنەمىن»، - دەدى Astana Qazaqstan Team كومانداسىنىڭ باس مەنەدجەرى الەكساندر ۆينوكۋروۆ.

«قازاقستان تاۋەلسىزدىگىنىڭ وتىز جىلدىق مەرەيتويىنا بىرنەشە كۇن قالعاندا Astana Qazaqstan Team كومانداسىنىڭ رەسمي تۇساۋكەسەرى ەلوردامىز نۇر-سۇلتان قالاسىندا وتكەنى ەرەكشە مانگە يە. شىنىندا دا، الەمدىك پەلوتوندا ءوز ورنى بار كوماندادا جاڭا سەرپىن پايدا بولدى. كوشباسشىلار جانكۇيەرلەرگە جاقسى تانىس، جاڭادان قوسىلعاندار دا وزدەرىن باسقا جوبالاردا جوعارى دەڭگەيدە كورسەتكەندەر. جاستىق پەن تاجىريبەنىڭ ۇيلەسىمى، جوعارى موتيۆاتسيا جانە جەڭىسكە دەگەن جىگەر –  جاڭا ماۋسىمدا كوماندانى العا سۇيرەيتىن ماڭىزدى قاجەتتىلىكتەر. ۇلتتىق ۆەلوسپورت فەدەراتسياسىنىڭ پرەزيدەنتى رەتىندە كوماندا ساپىندا قازاقستاندىق شاباندوزداردى كورگەنىمە قۋانىشتىمىن. جاس شاباندوز نۇربەرگەن نۇرلىحاسىم مەن قازاق سپورتىنا ەڭبەگى سىڭگەن اندرەي زەيتسكە قوش كەلدىڭىزدەر دەگىم كەلەدى! 17-ءشى ماۋسىمدا كومانداعا ساتتىلىك تىلەيمىن!»، - دەدى قازاقستان ۆەلوسپورت فەدەراتسياسىنىڭ پرەزيدەنتى نۇرلان سماعۇلوۆ.

2022 جىلعى ماۋسىمداعى شاباندوزداردىڭ تولىق قۇرامى:

لەوناردو باسسو (يتاليا); سامۋەلە باتتيستەللا (يتاليا); مانۋەلە بوارو (يتاليا); گلەب برۋسەنسكي (قازاقستان); ۆالەريو كونتي (يتاليا); ستەفان دە بود (وڭتۇستىك افريكا); داۆيد دە لا كرۋس (يسپانيا); دجو دومبروۆسكي (اقش); ەۆگەني فەدوروۆ (قازاقستان); فابيو فەللينە (يتاليا); ميكەلە گادزولي (يتاليا); ەۆگەني گيديچ (قازاقستان); دميتري گرۋزدەۆ (قازاقستان); سەباستيان ەناو (كولۋمبيا); ميگەل انحەل لوپەس (كولۋمبيا); الەكسەي لۋتسەنكو (قازاقستان); داۆيدە مارتينەللي (يتاليا); دجانني موسكون (يتاليا); يۋري ناتاروۆ (قازاقستان); انتونيو نيبالي (يتاليا); ۆينچەنتسو نيبالي (يتاليا); نۇربەرگەن نۇرلىحاسىم (قازاقستان); ۆاديم پرونسكي (قازاقستان); الەكساندر ريابۋشەنكو (بەلارۋس); حاۆەر رومو (يسپانيا); حارولد تەحادا (كولۋمبيا); سيمونە ۆەلاسكو (يتاليا); ارتەم زاحاروۆ (قازاقستان); اندرەي زەيتس (قازاقستان).

 

       

سپورت ديرەكتورلار قۇرامى:

الەكساندر شەفەر (قازاقستان), دجۋزەپپە مارتينەللي (يتاليا), دميتري فوفونوۆ (قازاقستان), برۋنو چەنيالتا (يتاليا), سەرگەي ياكوۆلەۆ (قازاقستان), ستەفانو زانيني (يتاليا), ماريو مانتسوني (يتاليا), ورلاندو مايني (يتاليا).

«استانا» كاسىبي سپورت كلۋبىنىڭ باس سەرىكتەسى – «سامۇرىق-قازىنا» ۇاق» اق، قۇرىلتايشىسى – تۋريزم يندۋسترياسى مەن سپورتتى قولداۋ قورى

«ادىرنا» ۇلتتىق پورتالى.

 

 

پىكىرلەر