پارلامەنت ءماجىلىسىنىڭ توراعاسى اقتوبەلىكتەردى ەل تاۋەلسىزدىگىنىڭ 30 جىلدىعىمەن قۇتتىقتادى

1530
Adyrna.kz Telegram

اقتوبە قالاسىنداعى ونەر ورتالىعىندا ەل تاۋەلسىزدىگىنىڭ 30 جىلدىعىنا ارنالعان مەرەكەلىك شارا ءوتتى. وعان قر پارلامەنتى ءماجىلىسىنىڭ توراعاسى نۇرلان نىعماتۋلين، وبلىس اكىمى وڭداسىن ورازالين، سونداي-اق زيالى قاۋىم وكىلدەرى، ەڭبەك ارداگەرلەرىكاسىپورىنداردىڭ باسشىلارى، ءماسليحات دەپۋتاتتارى، كاسىپكەرلەر، مەملەكەتتىك مەكەمەلەردىڭ قىزمەتكەرلەرى، باق وكىلدەرى قاتىستى.

شارادا الدىمەن ءسوز سويلەگەن قر پارلامەنتى ءماجىلىسىنىڭ توراعاسى نۇرلان نىعماتۋلين اقتوبە وبلىسى تاۋەلسىزدىك جىلدارىندا ەل ەكونوميكاسىنا ىقپال ەتكەن ءىرى جوبالاردى جۇزەگە اسىرىپ، بۇگىندە الدىڭعى قاتارلى ونەركاسىپتىك ايماققا اينالعانىن اتاپ ءوتتى.

— تاۋەلسىزدىك جىلدارىندا اقتوبە وبلىسىنىڭ ەل دامۋىنا قوسقان ۇلەسى زور. ماسەلەن، «باتىس ەۋروپا-باتىس قىتاي» حالىقارالىق ترانزيتتىك ءدالىزى بۇگىندە ەل ەكونوميكاسىنا ەرەكشە سەرپىن بەرۋدە. سوندىقتان اقتوبە وبلىسى ەلباسى نۇرسۇلتان نازارباەۆتىڭ قولداۋىمەن وتىز جىلدىڭ ىشىندە جالپى ەلىمىزدىڭ دامۋىنا زور ۇلەس قوسقان نەگىزگى يندۋستريالدى ولكەگە اينالدى.

بۇگىنگى كۇنى مەملەكەت باسشىسى قاسىم-جومارت توقاەۆتىڭ باستاماسىمەن ەلىمىزدە، سونىڭ ىشىندە اقتوبەدە جاڭا الەۋمەتتىك-ەكونوميكالىق باعدارلامالار جۇزەگە اسىرىلىپ جاتىر. تاۋەلسىزدىكتىڭ ارقاسىندا كەلگەن تابىستارىمىز الداعى ۋاقىتتا دا ەلىمىزدى، وبلىستاردى جاڭا بيىكتەرگە جەتكىزەتىنى ءسوزسىز. ءبىزدىڭ الدىمىزدا ءالى دە باعىندىراتىن بەلەستەر، اساتىن اسۋلار كوپ. سوندىقتان بۇگىنگى سالتاناتتى شاراعا جينالعان بارشا اقتوبەلىكتەردى ەل ەگەمەندىگىنىڭ 30 جىلدىق مەرەيتويىمەن قۇتتىقتاي وتىرىپ، الداعى ۋاقىتتا العا قويعان ۇلى ماقساتتارىمىزعا جەتۋ جولىندا ءبىر ەل، ءبىر حالىق بولىپ ۇلەس قوسايىق دەگىم كەلەدى. تاۋەلسىزدىكتىڭ 30 جىلدىعى قۇتتى بولسىن! ەلىمىز تىنىش، حالقىمىز امان بولسىن! قازاقستانىمىز ماڭگى جاساسىن! — دەدى ءماجىلىس توراعاسى.

بۇدان كەيىن جيىندا ءسوز سويلەگەن وبلىس اكىمى وڭداسىن ورازالين تاۋەلسىزدىك جىلدارىندا وڭىردە جۇزەگە اسىرىلعان اۋقىمدى جوبالار مەن حالىقتىڭ ءال-اۋقاتىن ارتتىرۋعا باعىتتالعان جۇمىستارعا توقتالىپ ءوتتءى.

— ءوز الدىمىزعا دەربەس ەل بولۋ — ءبىزدىڭ ماڭدايىمىزعا جازىلعان باق. عاسىرلار بويى اتا-بابامىز اڭساپ وتكەن تاۋەلسىزدىككە قول جەتكىزىپ، ونىڭ نىعمەتىن كورىپ وتىرعانىمىزعا، مىنە، وتىز جىل تولدى. وسى وتىز جىل ەركىندىك بىزگە نە بەردى دەسەك، اۋىز تولتىرىپ ايتار جەتىستىكتەرىمىز جەتەرلىك. ماسەلەن، وبلىسىمىزدا وتىز جىل ىشىندە حالىق سانى ەكى ەسەگە ارتىپ، بۇگىندە قالا حالقىنىڭ سانى جارتى ميلليوننان استى. ال تۇرعىنداردىڭ ورتاشا جاس كورسەتكىشى 67 جاستان 72 جاسقا دەيىن ۇلعايدى. اۋىلدارىمىزدىڭ ءوڭى كىرىپ، جاڭا زامان تالابىنا ساي ءزاۋلىم ۇيلەر بوي كوتەردى، كوشەلەرگە اسفالت توسەلدى، جاڭا ساياباقتار مەن سكۆەرلەر سالىندى. وسىلايشا دالامىز مالعا، قالامىز جانعا تولدى. مۇنىڭ بارلىعى — ەلباسىنىڭ كورەگەن، سارابدال ساياساتىنىڭ ارقاسىندا ەلدىڭ بەرەكە-بىرلىگىن ساقتاعان حالقىمىزدىڭ قول جەتكىزگەن جەتىستىگى، تاۋەلسىزدىكتىڭ جەمىسى. سوندىقتان بۇگىنگى شارادا بارشاڭىزعا ءوز ريزاشىلىعىمدى جەتكىزە وتىرىپ، ەلدىڭ ەرتەڭىنە دەگەن سەنىمىمىز بەرىك، جارقىن كۇندەرىمىز جاقىن بولسىن دەمەكپىن! مەرەيلى مەرەكەمىز — ەل تاۋەلسىزدىگىنىڭ وتىز جىلدىق مەرەيتويى قۇتتى بولسىن! — دەدى و.ورازالين.

سالتاناتتى شارادا قر پارلامەنتى ءماجىلىسىنىڭ توراعاسى نۇرلان نىعماتۋلين ەلىمىز بەن وبلىستىڭ الەۋمەتتىك-ەكونوميكالىق جانە مادەني دامۋىنا قوسقان سۇبەلى ۇلەسى ءۇشىن قوعام قايراتكەرى، فيلوسوفيا عىلىمدارىنىڭ دوكتورى، پروفەسسور  امانگەلدى ايتالىعا II دارەجەلى «بارىس» وردەنىن، وبلىستىق قوعامدىق كەڭەستىڭ توراعاسى مارات قويلىباەۆقا «پاراسات» وردەنىن، بەلگىلى ولكەتانۋشى، ەڭبەك ارداگەرى بەكارىستان مىرزاباي مەن ەڭبەك ارداگەرى «قۇرمەت» وردەنىن، تەمىرجولشى قانتورە اۋاش، ۇستا بايعالي ماتاعۇلوۆ جانە اقتوبە فەرروقورىتپا زاۋىتىنىڭ كرانشىسى گالينا ۋتەشوۆاعا III دارەجەلى «ەڭبەك داڭقى» وردەنىن تابىستادى.

وبلىس ەكونوميكاسىن، دەنساۋلىق ساقتاۋ، الەۋمەتتىك سالالارىن دامىتۋعا قوسقان ۇلەسى جانە قوعامدىق ومىرگە بەلسەنە قاتىسقانى ءۇشىن «اقتوبە وبلىسىنىڭ قۇرمەتتى ازاماتى» اتاعى «ستەپنوي» جشس-نىڭ ديرەكتورى امانعوس تولەۋوۆكە، «اقتوبە حروم قوسىندىلارى زاۋىتى» اق باسقارماسىنىڭ توراعاسى الەكسەي حيميچكە، مادەنيەت قايراتكەرى ەركىن قۇرمانبەككە، كاسىپكەر زامزاگۇل بايماعامبەتوۆاعا جانە ەڭبەك ارداگەرى ەستاي جايلىبايعا بەرىلدى.

سونداي-اق جيىندا «ەرەن ەڭبەگى ءۇشىن» مەدالىمەن دارىگەرلەر — قۋانىشقۇل دۇيسەمبەكوۆ، نۇرلان قاۋقاقوۆ، امەت نابيەۆ، جۋرناليستەر ەلەنا اكچۋرينا، باياندى سارسەمبينا، وبلىستىق فيلارمونيانىڭ باس ديريجەرى ءمادينا قابيجانوۆا ماراپاتتالسا، «شاپاعات» مەدالى مەدبيكەلەر — گۇلبادا بيمانوۆا، ولگا كەفەرگە بەرىلدى. ال قۇرمەت گراموتاسىمەن ماراپاتتالعاندار قاتارىندا تاجىريبەلى ۇستازدار — باقتىعۇل قويشىعۇلوۆا مەن جاننا حابيبۋللينا، سونداي-اق وبلىستىق فيلارمونيانىڭ قازاق كامەرالىق حورى بار.

شارادا وبلىستىق فيلارمونيانىڭ ونەرپازدارى ونەر كورسەتىپ، كورەرمەندەرگە ەرەكشە كوڭىل كۇي سىيلادى. كەشتە پاتريوتتىق، سونداي-اق حالىق اندەرى ورىندالدى.

پىكىرلەر