بۇگىن 15 جەلتوقسان كۇنى مەملەكەت باسشىسىنىڭ تاپسىرماسىنا سايكەس اقتاۋدا كوممۋنالدىق بازار مەن اۆتوۆوكزالدىڭ قۇرىلىسى باستالدى. ورتالىقتا جەرگىلىكتى شارۋالارعا ءوز ونىمدەرىن دەلدالسىز ساتۋى ءۇشىن ساۋدا ورىندارى ۇسىنىلىپ، قالاارالىق جانە قالا ماڭىنداعى باعىتتارعا قىزمەت كورسەتەتىن كولىكتەر تۇراعى بولادى، - دەپ حابارلايدى اقتاۋ قالاسى اكىمىنىڭ ءباسپاسوز قىزمەتى.
پرەزيدەنت قاسىم-جومارت توقاەۆ 22 قىركۇيەكتە ماڭعىستاۋ وبلىسىنا كەلگەن ساپارىندا ءوڭىردىڭ الەۋمەتتىك-ەكونوميكالىق دامۋى جونىندەگى جيىندا ينفلياتسيا دەڭگەيىنىڭ جوعارى ەكەنىن، مۇنىڭ ازىق-تۇلىك تاۋارلارى باعاسىنىڭ تەز وسۋىنە اسەر ەتىپ جاتقانىن اتاپ وتكەن ەدى.
ازىق-تۇلىك باعاسىنىڭ قىمباتتاۋىن توقتاتۋ ءۇشىن اۋىل شارۋاشىلىعى ونىمدەرىنە تولىق قول جەتىمدى ءارى رەتكە كەلتىرىلگەن ساۋدا الاڭدارىن اشۋ كەرەكتىگىن تاپسىرعان بولاتىن.
- وبلىس اكىمى پرەزيدەنت تاپسىرماسىنا سايكەس بىرقاتار ناقتى مىندەتتەر جۇكتەدى. قۇنى 1,5 ملرد. تەڭگە بولاتىن جوبانى جۇزەگە اسىراتىن ينۆەستورلار تابىلىپ، 36 شاعىن اۋداننان جەر ۋچاسكەسى بەرىلدى. جوبانىڭ باستى ماقساتى – باسەكەلەستىكتى ارتتىرۋ ارقىلى ازىق-تۇلىك باعالارىنىڭ نەگىزسىز ءوسۋىن بولدىرماۋ. بۇل ءوز كەزەگىندە دەلدالسىز ءونىم ساتۋ ارقىلى تۇتىنۋشىلار ءۇشىن باعانى تۇراقتاندىرۋعا وڭ اسەر ەتەدى. مۇندا سالىناتىن قۇرعاق قويما، توڭازىتقىش جانە مۇزداتقىش قويمالارعا جىلىنا 73 مىڭ توننا ءونىم ساقتالاتىن بولادى. ينۆەستور جوبا اياسىندا 250 جاڭا جۇمىس ورنى قۇرىلادى دەپ كۇتىلۋدە،-دەدى اقتاۋ قالاسىنىڭ اكىمىنىڭ ورىنباسارى ەربول ىزبەرگەنوۆ.
جالپى اۋدانى 15 گا تۇراتىن ورتالىقتىڭ 9,4 گا كوممۋنالدىق بازار ءۇشىن، 5,6 گا اۆتوۆوكزال ءۇشىن بولىنگەن. قالا بويىنشا بۇگىنگى كۇنگە دەيىن قالالىق جانە قالالارالىق باعىتتا قاتىنايتىن قوعامدىق كولىكتەر ءۇشىن اۆتوۆوكزال بولعان جوق. سىيىمدىلىعى 750 ورىندىق اۆتوۆوكزالدا جولاۋشىلار تەرمينالى دا بوي كوتەرەدى. تەرمينال ءبىر ۋاقىتتا 500 ادامعا دەيىن قابىلداي الادى. وسىلايشا ايماقتىڭ لوگيستيكا سالاسىنىڭ دامۋىنا وڭ اسەرىن تيگىزبەك.
كوممۋنالدىق بازار مەن اۆتوۆوكزال 2024 جىلى ىسكە قوسىلادى دەپ جوسپارلانۋدا.
