Búgin 15 jeltoqsan kúni Memleket basshysynyń tapsyrmasyna sáıkes Aqtaýda kommýnaldyq bazar men avtovokzaldyń qurylysy bastaldy. Ortalyqta jergilikti sharýalarǵa óz ónimderin deldalsyz satýy úshin saýda oryndary usynylyp, qalaaralyq jáne qala mańyndaǵy baǵyttarǵa qyzmet kórsetetin kólikter turaǵy bolady, - dep habarlaıdy Aqtaý qalasy ákiminiń baspasóz qyzmeti.
Prezıdent Qasym-Jomart Toqaev 22 qyrkúıekte Mańǵystaý oblysyna kelgen saparynda óńirdiń áleýmettik-ekonomıkalyq damýy jónindegi jıynda ınflıaııa deńgeıiniń joǵary ekenin, munyń azyq-túlik taýarlary baǵasynyń tez ósýine áser etip jatqanyn atap ótken edi.
Azyq-túlik baǵasynyń qymbattaýyn toqtatý úshin aýyl sharýashylyǵy ónimderine tolyq qol jetimdi ári retke keltirilgen saýda alańdaryn ashý kerektigin tapsyrǵan bolatyn.
- Oblys ákimi Prezıdent tapsyrmasyna sáıkes birqatar naqty mindetter júktedi. Quny 1,5 mlrd. teńge bolatyn jobany júzege asyratyn ınvestorlar tabylyp, 36 shaǵyn aýdannan jer ýchaskesi berildi. Jobanyń basty maqsaty – básekelestikti arttyrý arqyly azyq-túlik baǵalarynyń negizsiz ósýin boldyrmaý. Bul óz kezeginde deldalsyz ónim satý arqyly tutynýshylar úshin baǵany turaqtandyrýǵa oń áser etedi. Munda salynatyn qurǵaq qoıma, tońazytqysh jáne muzdatqysh qoımalarǵa jylyna 73 myń tonna ónim saqtalatyn bolady. Investor joba aıasynda 250 jańa jumys orny qurylady dep kútilýde,-dedi Aqtaý qalasynyń ákiminiń orynbasary Erbol Izbergenov.
Jalpy aýdany 15 ga turatyn ortalyqtyń 9,4 ga kommýnaldyq bazar úshin, 5,6 ga avtovokzal úshin bólingen. Qala boıynsha búgingi kúnge deıin qalalyq jáne qalalaralyq baǵytta qatynaıtyn qoǵamdyq kólikter úshin avtovokzal bolǵan joq. Syıymdylyǵy 750 oryndyq avtovokzalda jolaýshylar termınaly da boı kóteredi. Termınal bir ýaqytta 500 adamǵa deıin qabyldaı alady. Osylaısha aımaqtyń logıstıka salasynyń damýyna oń áserin tıgizbek.
Kommýnaldyq bazar men avtovokzal 2024 jyly iske qosylady dep josparlanýda.
