ەل تاۋەلسىزدىگىنىڭ 30 جىلدىعىنا ورايلاستىرىلعان «تاۋەلسىزدىك – قاسيەتىم، قاستەرلىم!» اتتى «التىن دومبىرا» رەسپۋبليكالىق اقىندار ايتىسى مارەسىنە جەتتى. ەكى كۇنگە سوزىلعان جىر الامانى «Nur Otan» پارتياسىنىڭ قولداۋىمەن قر مادەنيەت جانە سپورت مينيسترلىگى مەن نۇر-سۇلتان قالاسى اكىمدىگىنىڭ ۇيىمداستىرۋىمەن ءوتتى.
ەلورداداعى روزا باعلانوۆا اتىنداعى «قازاقكونتسەرت» زالىندا سۋىرىپ سالما اقىنداردىڭ 11 جۇبى ەكى كۇن بويى ايتىسسۇيەر قاۋىمدى ورەلى ونەرى، ورنەكتى سوزدەرىمەن سۋسىنداتتى. ولار تاۋەلسiز قازاقستاننىڭ 30 جىلداعى جەتكەن جەتiستiكتەرiن، ەلباسى ساياساتىنىڭ ارقاسىندا بەرەكەسى ارتىپ، بىرلىگى جاراسقان ەلدەگى اۋىزبىرشىلىك پەن ساياسي تۇراقتىلىقتى، تاۋەلسىزدىك جولىندا جان اياماي كۇرەسكەن تۇلعالار تۋرالى جىرلادى. اراسىندا ادەمى ءازىل مەن جاراسىمدى قالجىڭ دا ايتىلدى.
اقىنداردىڭ ونەرىنە كورنەكتى ونەر قايراتكەرى، قازاقستان جانە كسرو حالىق ءارتيسى، مەملەكەتتىك سىيلىقتىڭ يەگەرى ءاسانالى ءاشىموۆ باستاعان قازىلار القاسى باعا بەردى. سونداي-اق، قازىلار قۇرامىندا ايتىس اقىنى، قازاقستاننىڭ حالىق اقىنى ءاسيا بەركەنوۆا، ءۇش دۇركىن «التىن دومبىرا» يەگەرى مۇحتار نيازوۆ، ايتىسكەر اقىن، قازاقستاننىڭ ەڭبەك سىڭىرگەن قايراتكەرى امانجول التاەۆ جانە وزگە دە ونەر، قوعام قايراتكەرلەرى بولدى. الاماندى قازاقستاننىڭ ەڭبەك سىڭىرگەن قايراتكەرى، حالىقارالىق ايتىس جانە جىرشى-تەرمەشىلەر وداعىنىڭ توراعاسى ءجۇرسىن ەرمان جۇرگىزدى.
ايتىستىڭ شىراقشىسى اتانعان ءجۇرسىن ەرمان اتا-بابالارىمىزدان ميراس بولىپ جەتكەن ءتول ونەرىمىزگە قولداۋ ءبىلدىرىپ كەلە جاتقان «Nur Otan» پارتياسىنا العىسىن جەتكىزدى.
«قازاقتىڭ بەكزات ونەرى ايتىستى «Nur Otan» پارتياسى قاناتىنىڭ استىنا العالى 3 جىلدان استى. ەركىندىكتى، كەڭدىكتى، قۋاتتى قولداۋدى سەزىنىپ جاتىرمىز. سوندىقتان، وسى ايتىسقا قولداۋ ءبىلدىرىپ وتىرعان ەلىمىزدىڭ باس پارتياسىنا اقىنداردىڭ اتىنان شىنايى العىسىمىزدى بىلدىرەمىز»، – دەدى ءجۇرسىن ەرمان.
سونىمەن، قازىلار القاسىنىڭ شەشىمىمەن مەرەكەلىك ايتىستا اقىنداردىڭ ەشقايىسى دا جۇلدەسىز قالمادى. ىنتالاندىرۋ سىيلىعىنا ارعىنبەك قالباەۆ، تولەگەن جامانوۆ، باۋىرجان شيرمەدين، نۇرزات قارۋ، راۋان قايداروۆ، قاليجان ءبىرداش يە بولدى. قازىلار القاسىنىڭ توراعاسى ءاسانالى ءاشىموۆتىڭ ۇسىنىسىمەن تاعايىندالعان ارنايى جۇلدە بوكەن جىگەرگە بەرىلدى. ءۇشىنشى ورىنعا ەكى اقىن لايىق دەپ تانىلسا، ونى رۇستەم قايىرتاي مەن جانسايا مۋسينا ەنشىلەدى. ەكىنشى ورىنعا مەيىربەك سۇلتانحان يە بولدى. ءبىرىنشى ورىن مەن «ايتىستىڭ اقتاڭگەرى» توسبەلگىسى ەركەبۇلان قاينازاروۆقا بەرىلدى. ال باس جۇلدە – «التىن دومبىرا» جانە نۇر-سۇلتان قالاسىنىڭ اكىمدىگى تاعايىنداعان تەمىر تۇلپار جىر الامانىندا شاشاسىنا شاڭ جۇقتىرماعان بەكارىس شويبەكوۆكە بۇيىردى.
ءدۇبىرلى دودانىڭ باس جۇلدەسىن تاپسىرعان «Nur Otan» پارتياسى توراعاسىنىڭ ءبىرىنشى ورىنباسارى باۋىرجان بايبەك ۇلتتىق ونەرىمىزدى ۇلىقتاۋعا اتسالىسىپ جۇرگەن ازاماتتارعا جانە جىر بايگەسىنىڭ الامانىنا قاتىسقان بارشا اقىندارعا ريزاشىلىعىن ءبىلدىرىپ، شىعارماشىلىق تابىس تىلەدى.
«ايتىسكەرلەرىمىز ەكى كۇن بويى وتە جاقسى ونەر كورسەتتى. قانشاما تۇششىمدى وي، قاناتتى ءسوز ايتىلدى. تاۋەلسىزدىك جىلدارىنداعى جەتىستىكتەرىمىزدى جان-جاقتى كورسەتىپ، جىرعا قوستى. ءبىز شىن مانىندە ماڭگىلىك ەل بولامىز دەسەك، وندا ايتىستى قولداۋىمىز كەرەك. نەگە دەسەڭىز، ول – الدىمەن انا ءتىلىمىزدى قولداۋ. سودان سوڭ، ونەر جارىستىرىپ، ءسوز سايىستىرۋ بولعان كەزدە اقىنداردىڭ شەبەرلىگى شىڭدالادى. قازىرگىدەي پاندەميا جاعدايىندا كونتسەرتتەر بۇرىنعىداي كوپ وتە بەرمەيتىندىكتەن، شىعارماشىلىق ادامدارىنىڭ تابىسىنا اسەر ەتۋدە. وسىنىڭ ءبارىن ەسكەرىپ، ونىڭ ۇستىنە جاس ۇرپاق ۇلتتىق ونەرىمىزدى ۇمىتپاسىن جانە انا ءتىلىمىزدىڭ ابىرويى اسقاقتاسىن ءارى حالىق ايتىس كورىپ، ايىزى قانسىن دەگەن ماقسات بولدى»، – دەدى پارتيا توراعاسىنىڭ ءبىرىنشى ورىنباسارى.
سونداي-اق، ول كىل مىقتىلار جينالعان الاماندا ناعىز جۇيرىكتى انىقتاۋ قازىلار القاسىنا وڭاي بولماعانىن ايتا كەلە، ىنىلىك ىزەتپەن اعاسىنا جول بەرگەن تۇركىستاندىق اقىن ەركەبۇلان قاينازاروۆقا ريزاشىلىعىن ءبىلدىردى.
«سوڭعى جىلدارى ەلباسىنىڭ تاپسىرماسى بويىنشا تۇركىستان شىن مانىندە تۇركى الەمىنىڭ رۋحاني ورتالىعى رەتىندە دامىپ كەلە جاتقانىن بىلەسىزدەر. قانشاما قۇرىلىس جۇرگىزىلگەن كيەلى شاھار بۇگىندە قايتا تۇلەپ جاتىر. وسى جولى «التىن دومبىرانىڭ» يەسى – بەكارىس شويبەكوۆ. ەندى «التىن دومبىرا» دا تۇركىستانعا كەتەدى. تۇركىستان جۇرتىن قۇتتىقتايمىز! باستىسى، ەلىمىز امان، جۇرتىمىز تىنىش بولسىن! تاۋەلسىزدىگىمىز تۇعىرلى، ەلدىگىمىز ماڭگىلىك بولسىن!»، – دەدى باۋىرجان بايبەك.
ءوز كەزەگىندە، باس جۇلدەنى قانجىعاسىنا بايلاعان بەكارىس شويبەكوۆ لەبىزىن ولەڭمەن جەتكىزدى:
اتىڭنان اينالايىن التى الاشىم
ساعان كەلىپ، كەڭىدى-اۋ ارقا-باسىم.
ازاتتىق العان كۇنى باستالعان توي،
قازاق امان بولعاندا تارقاماسىن!
ءبىز ەندى تۇركىستانعا بەت الامىز،
بۇيىرسا بىرەر كۇندە جەتە الارمىز.
ول ءبىزدىڭ ءتورت قاقپالى قالامىز عوي،
تانىتپاي ونى قالاي جاتا الامىز؟!
اشىپ قوي ءتورت قاقپاڭنىڭ تورتەۋىندە،
ارامىزدا جوق ءبىزدىڭ شەكارامىز.
ەركەبۇلان ەكەۋمىز قاتارلاسىپ،
ساعان «التىن دومبىرا» اپارامىز!
"ادىرنا" ۇلتتىق پورتالى
