El Táýelsizdiginiń 30 jyldyǵyna oraılastyrylǵan «Táýelsizdik – qasıetim, qasterlim!» atty «Altyn dombyra» respýblıkalyq aqyndar aıtysy máresine jetti. Eki kúnge sozylǵan jyr alamany «Nur Otan» partııasynyń qoldaýymen QR Mádenıet jáne sport mınıstrligi men Nur-Sultan qalasy ákimdiginiń uıymdastyrýymen ótti.
Elordadaǵy Roza Baǵlanova atyndaǵy «Qazaqkonert» zalynda sýyryp salma aqyndardyń 11 juby eki kún boıy aıtyssúıer qaýymdy óreli óneri, órnekti sózderimen sýsyndatty. Olar Táýelsiz Qazaqstannyń 30 jyldaǵy jetken jetistikterin, Elbasy saıasatynyń arqasynda berekesi artyp, birligi jarasqan eldegi aýyzbirshilik pen saıası turaqtylyqty, Táýelsizdik jolynda jan aıamaı kúresken tulǵalar týraly jyrlady. Arasynda ádemi ázil men jarasymdy qaljyń da aıtyldy.
Aqyndardyń ónerine kórnekti óner qaıratkeri, Qazaqstan jáne KSRO Halyq artısi, Memlekettik syılyqtyń ıegeri Asanáli Áshimov bastaǵan qazylar alqasy baǵa berdi. Sondaı-aq, qazylar quramynda aıtys aqyny, Qazaqstannyń halyq aqyny Ásııa Berkenova, úsh dúrkin «Altyn dombyra» ıegeri Muhtar Nııazov, aıtysker aqyn, Qazaqstannyń eńbek sińirgen qaıratkeri Amanjol Áltaev jáne ózge de óner, qoǵam qaıratkerleri boldy. Alamandy Qazaqstannyń eńbek sińirgen qaıratkeri, Halyqaralyq aıtys jáne jyrshy-termeshiler odaǵynyń tóraǵasy Júrsin Erman júrgizdi.
Aıtystyń shyraqshysy atanǵan Júrsin Erman ata-babalarymyzdan mıras bolyp jetken tól ónerimizge qoldaý bildirip kele jatqan «Nur Otan» partııasyna alǵysyn jetkizdi.
«Qazaqtyń bekzat óneri aıtysty «Nur Otan» partııasy qanatynyń astyna alǵaly 3 jyldan asty. Erkindikti, keńdikti, qýatty qoldaýdy sezinip jatyrmyz. Sondyqtan, osy aıtysqa qoldaý bildirip otyrǵan elimizdiń bas partııasyna aqyndardyń atynan shynaıy alǵysymyzdy bildiremiz», – dedi Júrsin Erman.
Sonymen, qazylar alqasynyń sheshimimen merekelik aıtysta aqyndardyń eshqaıysy da júldesiz qalmady. Yntalandyrý syılyǵyna Arǵynbek Qalbaev, Tólegen Jamanov, Baýyrjan Shırmedın, Nurzat Qarý, Raýan Qaıdarov, Qalıjan Birdásh ıe boldy. Qazylar alqasynyń tóraǵasy Asanáli Áshimovtiń usynysymen taǵaıyndalǵan arnaıy júlde Bóken Jigerge berildi. Úshinshi orynǵa eki aqyn laıyq dep tanylsa, ony Rústem Qaıyrtaı men Jansaıa Mýsına enshiledi. Ekinshi orynǵa Meıirbek Sultanhan ıe boldy. Birinshi oryn men «Aıtystyń aqtańgeri» tósbelgisi Erkebulan Qaınazarovqa berildi. Al bas júlde – «Altyn dombyra» jáne Nur-Sultan qalasynyń ákimdigi taǵaıyndaǵan temir tulpar jyr alamanynda shashasyna shań juqtyrmaǵan Bekarys Shoıbekovke buıyrdy.
Dúbirli dodanyń bas júldesin tapsyrǵan «Nur Otan» partııasy Tóraǵasynyń Birinshi orynbasary Baýyrjan Baıbek ulttyq ónerimizdi ulyqtaýǵa atsalysyp júrgen azamattarǵa jáne jyr báıgesiniń alamanyna qatysqan barsha aqyndarǵa rızashylyǵyn bildirip, shyǵarmashylyq tabys tiledi.
«Aıtyskerlerimiz eki kún boıy óte jaqsy óner kórsetti. Qanshama tuymdy oı, qanatty sóz aıtyldy. Táýelsizdik jyldaryndaǵy jetistikterimizdi jan-jaqty kórsetip, jyrǵa qosty. Biz shyn máninde Máńgilik el bolamyz desek, onda aıtysty qoldaýymyz kerek. Nege deseńiz, ol – aldymen ana tilimizdi qoldaý. Sodan soń, óner jarystyryp, sóz saıystyrý bolǵan kezde aqyndardyń sheberligi shyńdalady. Qazirgideı pandemııa jaǵdaıynda konertter burynǵydaı kóp óte bermeıtindikten, shyǵarmashylyq adamdarynyń tabysyna áser etýde. Osynyń bárin eskerip, onyń ústine jas urpaq ulttyq ónerimizdi umytpasyn jáne ana tilimizdiń abyroıy asqaqtasyn ári halyq aıtys kórip, aıyzy qansyn degen maqsat boldy», – dedi partııa Tóraǵasynyń Birinshi orynbasary.
Sondaı-aq, ol kil myqtylar jınalǵan alamanda naǵyz júırikti anyqtaý qazylar alqasyna ońaı bolmaǵanyn aıta kele, inilik izetpen aǵasyna jol bergen túrkistandyq aqyn Erkebulan Qaınazarovqa rızashylyǵyn bildirdi.
«Sońǵy jyldary Elbasynyń tapsyrmasy boıynsha Túrkistan shyn máninde Túrki áleminiń rýhanı ortalyǵy retinde damyp kele jatqanyn bilesizder. Qanshama qurylys júrgizilgen kıeli shahar búginde qaıta túlep jatyr. Osy joly «Altyn dombyranyń» ıesi – Bekarys Shoıbekov. Endi «Altyn dombyra» da Túrkistanǵa ketedi. Túrkistan jurtyn quttyqtaımyz! Bastysy, elimiz aman, jurtymyz tynysh bolsyn! Táýelsizdigimiz tuǵyrly, eldigimiz máńgilik bolsyn!», – dedi Baýyrjan Baıbek.
Óz kezeginde, bas júldeni qanjyǵasyna baılaǵan Bekarys Shoıbekov lebizin óleńmen jetkizdi:
Atyńnan aınalaıyn Alty Alashym
Saǵan kelip, keńidi-aý arqa-basym.
Azattyq alǵan kúni bastalǵan toı,
Qazaq aman bolǵanda tarqamasyn!
Biz endi Túrkistanǵa bet alamyz,
Buıyrsa birer kúnde jete alarmyz.
Ol bizdiń tórt qaqpaly qalamyz ǵoı,
Tanytpaı ony qalaı jata alamyz?!
Ashyp qoı tórt qaqpańnyń tórteýinde,
Aramyzda joq bizdiń shekaramyz.
Erkebulan ekeýmiz qatarlasyp,
Saǵan «Altyn dombyra» aparamyz!
"Adyrna" ulttyq portaly
