شىمكەنت قالاسىندا ەل تاۋەلسىزدىگىنىڭ 30 جىلدىعىنا وراي، ە.برۋسيلوۆسكيدىڭ «قىز جىبەك» وپەراسى جاڭا مۋزىكالىق رەداكتسياسىندا كورەرمەن نازارىنا ۇسىنىلدى.
وپەرا شاھاردا 2010 جىلى ا.التىنبەكوۆتىڭ رەجيسسەرلىگىمەن ساحنالانعان بولاتىن. ال، بۇل جىلى قازاقتىڭ تۇڭعىش وپەراسىن جاڭا باعىتتا ساحنالاۋ ءۇشىن رەسەي فەدەراتسياسىنىڭ رەجيسسەرى ميحايل پاندجاۆيدزە ارنايى شاقىرتىلدى.
بۇل جولى وپەرانىڭ مۋزىكاسى قايتا رەداكتسيالانىپ، جاڭا اكۋستيكالىق، كومپيۋتەرلىك، جارىق بەرۋ تەحنولوگياسى قولدانىلدى. قويىلىم – حورەوگرافيا تۇجىرىمداماسى مەن كەيىپكەرلەردىڭ ويناۋ، سويلەۋ، ءان ايتۋ تاسىلدەرى ارقىلى قازاقتىڭ ءداستۇرلى ونەرىنىڭ باسىمدىعىمەن ەرەكشەلەنەدى.
قويىلىمدا ارۋ جىبەكتى ءرولىن ايكەرىم شارىپبەك پەن جاس سوليست جۇلدىزاي مۇساەۆا سومدادى. تولەگەننىڭ ءرولىن تالانتتى ءانشى ءمادىحان دۇيسەەۆ ورىندادى.
قازاق ساحناسىندا ويىپ تۇرىپ ورىن العان بۇل تۋىندى كوپشىلىكتىڭ كوڭىلىندە قايتا جاڭعىردى.
شىمكەنت قالاسىنىڭ اقپاراتتىق-كوممۋنيكاتسيالىق ورتالىعى
