شىمكەنتتە 31 جاستاعى ەر ادام پوليتسيا دەپارتامەنتىندە بولعان تەرگەۋ كەزىندە قايتىس بولدى دەپ حابارلايدى "ادىرنا" ۇلتتىق پورتالى "Ratel.kz"-كە سىلتەمە جاساپ.
دەپارتامەنت تاراتقان رەسمي مالىمدەمەدە مارقۇمنىڭ كولىك ۇرلىعىنا قاتىستى ۇستالعانى جانە تەرگەۋگە الىنعانى ايتىلعان. ودان جاۋاپ الۋ كەزىندە ەر ادام ءوزىن ناشار سەزىنىپ، ارتىنشا ەسىن جوعالتىپ الىپتى.
"دەرەۋ جەدەل جاردەم شاقىرىلدى، الايدا، دارىگەرلەر كەلگەنشە ول قايتىس بولىپ كەتتى. ءولىمنىڭ ناقتى نەدەن بولعانى انىقتالىپ جاتىر", - دەيدى پوليتسەيلەر.
ال مارقۇمنىڭ تۋىستارى بولسا پوليتسەيلەر تاراپىنان قىسىم بولعانىنا سەنىمدى. قايتىس بولعان جىگىت – قوستاناي قالاسىنىڭ تۇرعىنى نۇربولات جۇماباەۆ، 1990 جىلى تۋعان. ول بۇعان دەيىن ۇرلىق ءۇشىن سوتتالىپ، جازاسىن وتەگەن ەكەن. ءبىر جىل بۇرىن تۇرمەدەن شىعىپ، ۇيلەنۋگە شەشىم قابىلداعان. سۇيىكتىسى شىمكەنتتە تۇرعاندىقتان، جۋىردا وسى قالاعا كەلىپتى.
"7 جەلتوقساندا ونىمەن تەلەفون ارقىلى سويلەستىم. جاعدايى جاقسى ەكەنىن ايتتى. ال، 8 جەلتوقساندا ماعان شىمكەنتتەگى دوستارىم حابارلاسىپ، نۇربولات پەن جانىنداعى سەرىگىن پوليتسيا ۇستاپ اكەتكەنىن حابارلادى. ارتىنشا، پوليتسيادان حابارلاسىپ، ءمايىتتى الىپ كەتىڭدەر دەدى. دوستارىم دەرەۋ ادۆوكات جالدادى، ول پوليتسيا دەپارتامەنتىنە بارىپ، نۇربولاتتىڭ دەنەسىندە سوققى ىزدەرى بارىن حابارلادى. قازىر شىمكەنتكە ءوزىم بارا جاتىرمىن، باۋىرىمنىڭ دەنەسىن ءوز كوزىممەن كورۋىم كەرەك. ول بۇعان دەيىن ەشقاشان جۇرەك اۋرۋىنا شاعىمدانعان ەمەس، شاڭعى سپورتىمەن اينالىسقان. دەنساۋلىعى جاقسى ەدى. پوليتسەيلەر ايتقانداي، جۇرەك اۋرۋىنان قايتىس بولۋى مۇمكىن ەمەس", - دەيدى مارقۇمنىڭ باۋىرى جانبولات.
اتالعان ىسپەن قازىر شىمكەنت قالالىق پوليتسيا دەپارتامەنتى وزىندىك قاۋىپسىزدىك باسقارماسىنىڭ ماماندارى اينالىسىپ جاتىر.
"ادىرنا" ۇلتتىق پورتالى
