ماڭعىستاۋ وبلىسىندا بيىل 153 كوپبالالى انا باسپانالى بولادى

2087
Adyrna.kz Telegram

بيىل “نۇرلى جەر” مەملەكەتتىك باعدارلاماسىنىڭ شەڭبەرىندە ماڭعىستاۋ وبلىسىندا 153 كوپبالالى انا جاڭا پاتەرلەرگە قول جەتكىزەدى. قازىرگى تاڭدا كەيبىر اۋدانداردا پاتەرلەردىڭ الدى بەرىلىپ باستالعان.

باسپانالى بولاتىنداردىڭ قاتارىندا قاراقيا اۋدانىنا قاراستى جەتىباي اۋىلىندا تۇراتىن بەس بالانىڭ اناسى زاعيپا ەلتىجيەۆا دا بار. ولار ەكى اپتا بۇرىن ءوزىنىڭ كوپتەن كۇتكەن 5 بولمەلى ۇيىنە قونىستاندى. كوپبالالى انا ءدان ريزا.

وبلىستىق قۇرىلىس باسقارماسى ماماندارىنىڭ ايتۋىنشا، ماڭعىستاۋ وبلىسىندا "نۇرلى جەر" مەملەكەتتىك باعدارلاماسى بويىنشا كوپ بالالى انالارعا باستاپقى تۇرعىن ۇيلەردەن پاتەر ساتىپ الۋعا بيىل رەسپۋبليكالىق بيۋدجەتتەن 1 ميلليارد 300 ميلليون تەڭگە ءبولىندى. پاتەرلەر اقتاۋ قالاسى مەن ماڭعىستاۋ، قاراقيا، تۇپقاراعان جانە مۇنايلى اۋداندارىنان ساتىپ الىنادى. پايدالانۋعا بەرىلەتىن تۇرعىن ۇيلەردىڭ جالپى اۋدانى - 8 400 شارشى مەتردى قۇرايدى.
سونىڭ ىشىندە اقتاۋ - 54 پاتەر، ماڭعىستاۋ اۋدانى - 24 ءۇي،  قاراقيا اۋدانى - 30 ءۇي،  تۇپقاراعان اۋدانى - 15 ءۇي،  مۇنايلى اۋدانى - 30 ءۇي.

سونىمەن قاتار، مامانداردىڭ ايتۋىنشا، "نۇرلى جەر" مەملەكەتتىك باعدارلاماسىن جۇزەگە اسىرۋ كەلەسى جىلى دا جالعاسىن تاپپاق. شامامەن 500-گە جۋىق كوپبالالى انا پاتەرلى بولادى دەپ جوسپارلانۋدا.

 

"ادىرنا" ۇلتتىق پورتالى.

پىكىرلەر