تاۋەلسىزدىكتىڭ 30 جىلدىعىنا وراي شىمكەنت قالاسىنىڭ 1000-عا جۋىق ازاماتى جىل باسىنان بەرى ەلىمىزدىڭ ءتۇرلى شيپاجايلارىندا تەگىن ەمدەلدى. ونىڭ ىشىندە 736 جولداما زەينەت جاسىنداعىلارعا، 393 جولداما مۇگەدەكتىگى بار ازاماتتارعا بەرىلگەن.
بۇگىندە تاعى 4 مىڭعا جۋىق مۇمكىندىگى شەكتەۋلى ازاماتتارعا جولداما بەرۋ جوسپارلانۋدا. بۇل تۋرالى قالالىق جۇمىسپەن قامتۋ جانە الەۋمەتتىك قورعاۋ باسقارماسى مالىمدەدى.
بيىل قاڭتار ايىنان باستاپ «الەۋمەتتىك پورتال» ارقىلى مۇگەدەكتىگى بار ازاماتتار ۇيىندە وتىرىپ-اق ءوز تاڭداۋى بويىنشا قالاعان شيپاجايىنا تەگىن جولداما الا الادى. ايتا كەتەيىك، مۇگەدەك ازاماتتىڭ جەكە وڭالتۋ باعدارلاماسىندا ساناتورلىق-كۋرورتتىق ەمدەلۋ بولعان جاعدايدا عانا 14 كۇن تەگىن ەم قابىلدايدى.
باسقارمانىڭ مالىمەتىنشە، ۇلى وتان سوعىسى ارداگەرلەرىنە جانە ولارعا تەڭەستىرىلگەن ازاماتتارعا، تىل ارداگەرلەرىنە، زەينەت جاسىنداعى «التىن القا»، «كۇمىس القا» يەلەرى شيپاجايدا قىزمەت ءتۇرىن 100 پايىز تەگىن الادى. ال زەينەت جاسىنداعى ازاماتتارعا جولداما قۇنىنىڭ 50 پايىزىن تولەۋمەن بەرىلەدى. ياعني، مەملەكەت تاراپىنان 6 كۇن تەگىن قىزمەت الىپ، ۇناعان جاعدايدا قالعان 6 كۇننىڭ اقىسىن ءوز قالتاسىنان تولەپ شيپاجايدا قالسا بولادى.
بيىل شىمكەنت قالاسىندا ورنالاسقان «دەنساۋلىق» شيپاجايى مەن تۇلكىباس اۋدانىنداعى «اقسۋ-جاباعىلى» جانە تاراز قالاسىنداعى «ايشا ءبيبى» شيپاجايلارى قىزمەت كورسەتۋدە. شيپاجايلارداعى ەم-دوم جۇمىستارى مەملەكەتتىك تاپسىرىس اياسىندا جۇزەگە اسىرىلادى. ول ءۇشىن قالالىق جۇمىسپەن قامتۋ جانە الەۋمەتتىك قورعاۋ باسقارماسىنا، س.بايتەرەكوۆ كوشەسى 89, مەكەنجايى بويىنشا ءوتىنىم قالدىرۋ كەرەك. جولداما كەزەك بويىنشا تاراتىلادى. كەزەككە تۇرۋ ءۇشىن جەكە كۋالىگى مەن 068 نىسانىنداعى انىقتاما قاجەت.
