وتكەن جىلى شىمكەنت قالاسىندا 31 445 بالا دۇنيەگە كەلگەن. بۇل كورسەتكىش 2019 جىلمەن سالىستىرعاندا 3 342-گە ارتقان. ءۇشىنشى مەگاپوليستە كۇنىنە ورتاشا ەسەپپەن 120 ءسابي دۇنيەگە كەلەدى دەپ حابارلايدى "ادىرنا" ۇلتتىق پورتالى شىمكەنت قالاسى اكىمدىگىنىڭ ءباسپاسوز قىزمەتىنە سىلتەمە جاساپ.
ياعني ءار ون بەس مينۋت سايىن ءبىر شىمكەنتتىك دۇنيە ەسىگىن اشادى.
شىمكەنت قالاسىنىڭ اكىمى مۇرات ايتەنوۆ «Egemen Qazaqstan» گازەتىنىڭ مەنشىكتى ءتىلشىسى عالىمجان ەلشىبايعا بەرگەن سۇحباتىندا ميلليوندى قالانىڭ بۇگىنگى دەموگرافيالىق جاعدايىنا تۋرالى ايتقان بولاتىن.
«وتكەن جىلى دۇنيەگە كەلگەن سابيلەردىڭ اراسىندا ەگىزدەر مەن ۇشەمدەردىڭ دە سانى ارتتى. ءيا، قالا حالقى 90-جىلدارداعى 400 مىڭنان قازىر ءبىر ميلليوننان استى. دەموگرافيالىق ءوسىم دە - ەل تاۋەلسىزدىگىنىڭ جەمىسى، ياعني شىمكەنتتىڭ ءار ەكىنشى تۇرعىنى – تاۋەلسىزدىك تۋماسى. وتىز جىل بۇرىن قالادا 69 مىڭ وقۋشىسى بار 72 مەكتەپ بولسا، قازىر 226 مىڭ وقۋشى وقيتىن 186 مەكتەپ بار»،-دەپ اتاپ ءوتتى.
"ادىرنا" ۇلتتىق پورتالى
