نۇر-سۇلتان قالاسىندا «استانا» كاسىبي ۆەلوكومانداسىنىڭ رەسمي تۇساۋكەسەرى ءوتتى. جاڭا ماۋسىمدا بۇل كوماندا Astana Qazaqstan Team دەگەن اتاۋمەن ونەر كورسەتەدى.
بيىل ەلوردالىق ۇجىم 17-ءشى ماۋسىمىنا دايىندالىپ جاتىر. كوماندا جاڭا ويىنشىلارمەن تولىعىپ، قۇراماعا 29 ۆەلوشاباندوز كىردى. ولاردىڭ اراسىندا ۆەلوسپورت الەمىندە اتى ءماشھۇر ۆينچەنتسو نيبالي (يتاليا), ميگەل انحەل لوپەس (كولۋمبيا) سياقتى سپورتشىلار بار. Astana Qazaqstan Team باس مەنەدجەرى الەكساندر ۆينوكۋروۆتىڭ ايتۋىنشا، ترانسفەرلىك كەزەڭدەگى قيىندىقتارعا قاراماستان، ماۋسىم الدىندا جوعارى جەتىستىكتەرگە جەتۋگە قاۋقارلى جانە كوماندانى جەڭىسكە جىگەرلەندىرەتىن بىرقاتار شاباندوزدارمەن كەلىسىمگە كەلگەن.
«بىرنەشە مىقتى كوشباسشىلارمەن قوش ايتىسقانىمىزبەن دەڭگەيى جوعارى شاباندوزداردى قاتارعا قوستىق. كوماندا جاڭارتىلدى، بىراق ءبىز جانكۇيەر ءبىلىپ ۇيرەنگەن «استانا» كومانداسى بولىپ قالا بەرەمىز، ءبىزدى الەم تانيدى. ۆينچەنتسو نيبالي، ميگەل انحەل لوپەس پەن اندرەي زەيتس سىندى شاباندوزداردىڭ ورالۋى كومانداعا قوسىمشا سپورتتىق تۇراقتىلىق پەن سەنىمدىلىك بەرەدى. دجانني موسكون، دجو دومبروۆسكي، داۆيد دە لا كرۋس، ۆالەريو كونتي جانە باسقا دا سپورتشىلاردىڭ كەلۋى ماقساتىمىزدى ايقىنداي ءتۇستى، جاڭا مۇمكىندىكتەر اشتى. ال الەكسەي لۋتسەنكو سياقتى كوشباسشىلار كوماندانىڭ بەتكە ۇستارلارى. شاباندوزدارمەن قاتار باپكەرلەر قۇرامىن دا كۇشەيتتىك، وتاندىق مامان الەكساندر شەفەردىڭ ءالى دە بەرەرى مول. قازاقستان تاۋەلسىزدىگىنىڭ وتىز جىلدىعى قارساڭىندا نۇر-سۇلتاندا تانىستىرىلعان كوماندا جاڭا ماۋسىمدا تولاعاي تابىسقا جەتەتىن جانە Astana Qazaqstan Team نامىسىن ابىرويمەن قورعايتىن مىقتى ۇجىم بولادى دەپ سەنەمىن»,- دەدى ا.ۆينوكۋروۆ.
23 جاسقا دەيىنگى شاباندوزدار اراسىندا قازاقستان چەمپيونى نۇربەرگەن نۇرلىحاسىم مەن «گران پرەميو دەللا ليبەراتسيا» ءبىر كۇندىك جارىسىنىڭ جەڭىمپازى، يتاليالىق ميشەل گادزولي جاڭا ماۋسىمدا كوماندا قۇرامىنا ەنگەن جاس سپورتشىلار رەتىندە تانىستىرىلدى.
Astana Qazaqstan Team باس سپورت ديرەكتورى، وتاندىق مامان الەكساندر شەفەر، سپورت ديرەكتورلار ماريو مانزوني مەن ورلاندو مايني (ەكەۋى دە - يتاليا) باپكەرلەر تىزىمىنە ەندى.
كوماندا كوشباسشىلارىنىڭ، سونداي-اق كوماندانىڭ باسقا مۇشەلەرى قاتىساتىن جارىس كۇنتىزبەسى 4-19 جەلتوقساندا يسپانيادا وتەتىن كوماندانىڭ دايىندىق جاتتىعۋ جيىنىندا انىقتالادى.
«قازاقستان تاۋەلسىزدىگىنىڭ وتىز جىلدىق مەرەيتويىنا بىرنەشە كۇن قالعاندا Astana Qazaqstan Team كومانداسىنىڭ رەسمي تۇساۋكەسەرى ەلوردامىز نۇر-سۇلتان قالاسىندا وتكەنى ەرەكشە مانگە يە. شىنىندا دا، الەمدىك پەلوتوندا ءوز ورنى بار كوماندادا جاڭا سەرپىن پايدا بولدى. كوشباسشىلار جانكۇيەرلەرگە جاقسى تانىس، جاڭادان قوسىلعاندار دا وزدەرىن باسقا جوبالاردا جوعارى دەڭگەيدە كورسەتكەندەر. جاستىق پەن تاجىريبەنىڭ ۇيلەسىمى، جوعارى موتيۆاتسيا جانە جەڭىسكە دەگەن جىگەر – جاڭا ماۋسىمدا كوماندانى العا سۇيرەيتىن ماڭىزدى قاجەتتىلىكتەر. ۇلتتىق ۆەلوسپورت فەدەراتسياسىنىڭ پرەزيدەنتى رەتىندە كوماندا ساپىندا قازاقستاندىق شاباندوزداردى كورگەنىمە قۋانىشتىمىن. جاس شاباندوز نۇربەرگەن نۇرلىحاسىم مەن قازاق سپورتىنا ەڭبەگى سىڭگەن اندرەي زەيتسكە قوش كەلدىڭىزدەر دەگىم كەلەدى! 17-ءشى ماۋسىمدا كومانداعا ساتتىلىك تىلەيمىن»،- دەدى قر ۆەلوسپورت فەدەراتسياسىنىڭ پرەزيدەنتى نۇرلان سماعۇلوۆ.
كوماندانىڭ جاڭا ماۋسىمداعى قۇرامى:
الەكسەي لۋتسەنكو، ارتەم زاحاروۆ، اندرەي زەيتس، گلەب برۋسەنسكي، ەۆگەني فەدوروۆ، ۆاديم پرونسكي، يۋري ناتاروۆ، ەۆگەني گيديچ، دميتري گرۋزدەۆ، نۋربەرگەن نۋرلىحاسىم (بارلىعى - قازاقستان), ميگەل انحەل لوپەس، سەباستيان ەناو، حارولد تەحادا (بارلىعى - كولۋمبيا), ۆينچەنتسو نيبالي، انتونيو نيبالي، لەوناردو باسسو، سامۋەلە باتتيستەللا، مانۋەلە بوارو، ۆالەريو كونتي، فابيو فەللينە، ميكەلە گادزولي، داۆيدە مارتينەللي، دجانني موسكون، سيمونە ۆەلاسكو (بارلىعى - يتاليا), ستەفان دە بود (وار), داۆيد دە لا كرۋس، حاۆەر رومو (بارلىعى - يسپانيا), دجو دومبروۆسكي (اقش), الەكساندر ريابۋشەنكو (بەلارۋس).
«استانا» كاسىبي سپورت كلۋبىنىڭ باس سەرىكتەسى – «سامۇرىق-قازىنا» ۇاق» اق، قۇرىلتايشىسى – تۋريزم يندۋسترياسى مەن سپورتتى قولداۋ قورى
“ادىرنا” ۇلتتىق پورتالى
