Úı jóndeý jumystary kezinde án aıtyp jelide juldyz bolǵan ánshi Gúlmaıdan Serikbaı (laqapaty - Dana) ózi týraly tolyǵyraq baıandady, dep habarlaıdy "Adyrna" ulttyq portaly Tengrinews.kz saıtyna silteme jasap.
Gúlmaıdan 1994 jyly Qyzylorda oblysy, Shıeli aýdany, Bestam aýylynda dúnıege kelgen. Ánshi Qorqyt Ata ýnıversıtetinde "joǵary mýzykalyq bilim" mamandyǵynda oqyǵan.
"Otbasylyq jaǵdaıyma baılanysty oqý ornynan 3-kýrstan keıin ketip qaldym. Qazir otbasylymyn. Tórt jasar ulym bar", - deıdi ol.
Gúlmaıdan negizi ánshilik ónerde júrgen eken, kóbine kafe, meıramhanalarda án salǵan. Alaıda koronavırýs pandemııasy bastalyp, bári karantınge jabylǵannan keıin úı jóndeý jumysyna kirisip, nápaqa tabýǵa kóshken.
Sondaı-aq, ánshi jelide kóp taralǵan vıdeo qashan jáne qandaı jaǵdaıda túsirilgenin aıtyp berdi.
"Sodan beri kórshi kelinshek ári jaqyn qurbyma aınalǵan Juldyzben birge jumys istep júrdim. Birge stroıkaǵa shyqqanbyz, bos úıde akýstıkasy jaqsy bolǵannan keıin daýys jaqsy shyqty. Sol qurbym maǵan baıqatpaı, vıdeoǵa túsirip alypty. Vıdeo ótken aptada jumada túsirilgen, men bilmeı, ánimdi aıtyp otyrǵan ekenmin. Bólmede akýstıka jaqsy bolǵan soń elge jaqsy taraldy dep oılaımyn", - deıdi Dana laqapatymen ónerge kelgen Gúlmaıdan Serikbaı.
Kómekshisi Gaýhar Ramatýllanyń aıtýynsha, Gúlmaıdan bastapqyda TikTok áleýmettik jelisinde tanylyp, keıin túrli messendjerler arqyly vıdeosy taralǵan.
"TikTok-ta vıdeo taraldy, ápkeme osy qyzdy otbasymyzben kórip jatyrmyz dep, taýyp alyp, ózim jelide belsendilik jasaý jolyn bilgendikten, ınsta-paraqshasyn ashtym, pablıkter birinshi tarata bastady. Sol pablıkterde shyqqan soń halyq birden maqtap, ónerin baǵalady. Sol pikirlerge Dana jaýap jazyp, raqmetin aıtyp júrdi. Osylaısha keshke qaraı bloger Dáýlet Muqaevtyń kómekshisi habarlasyp, óz paraqshasyna júktedi. Sosyn barlyǵy habarlasa bastady", - deıdi ánshiniń kómekshisi.
Dana dúnıege kelgende perzenthanadan shyǵarǵanda "Qazaqstan áıelderi" jýrnalynda Gúlmaıdan Súndetova degen ánshiniń sýreti turǵan eken. Sondyqtan ata-anasy oǵan ánshi bolsyn degen tilekpen osyndaı esim tańdapty.
"Ánshi bolsyn dep, atymdy qoıǵanda perishteler áýmın degen shyǵar. Taǵy bir jaǵynan naǵashy ájem Yrysqal Óksikbaeva daýsy jaqsy bolǵan. Ol kisini ózim kórmedim. Biraq úlkender aıtyp otyrady. Sol kisiniń óneri daryǵan shyǵar", - deıdi ánshi.
Aıta keteıik, qazirgi ýaqytta ánshiniń paraqshasyna 20 myńǵa jýyq adam jazylyp úlgergen. Dananyń vıdeosyn ánshi Sáken Maıǵazıev te jarııalaǵan.
"Jelini "jaryp jatqan" arýdy men de jarııalap qoıaıyn. "Qazaqstan daýysy" jobasyna kelgende tetikti tórteýmiz de basar ma edik. "Áý" demeıtin QAZAQ joq" degen sózdiń dáleli osy emes pe. Tanys bolyńyzdar, Dana Serikbaı 1994 jyly Qyzylorda oblysynda dúnıege kelgen. Dananyń mýzykalyq bilimi joq. Tek 3 kýrs oqyp, oqýy aıaqtalmaı qalǵan. Iaǵnı, qolynda dıplom da joq. Biraq Alla bergen daýys bar. Qazirgi ýaqytta Almatydaǵy páterlerde jóndeý jumystaryn (evroremont) jasap, nápaqasyn taýyp júr eken. Jolyń ashyq bolsyn, Dana kyz!", - dep qoldaý bildiripti Maıǵazıev.
Jas ónerpazdy birinshi bolyp qoldaǵandar arasynda bloger Dáýlet Muqaev bar.
"Mynandaı daýyspen Dananyń án aıtatyn jeri adam joq tar bólme emes, myńdaǵan kórermeni bar úlken sahnalar dep oılaımyn. Talanty bar, tanysy joq janǵa myqty prodıýser tabylsa eken deımin. Sáttilik, Dana!", - deıdi bloger Dáýlet Muqaev (Dauletten).
"Adyrna" ulttyq portaly
