بۇگىن، 2 جەلتوقساندا سەناتورلار "قازاقستان رەسپۋبليكاسى تاۋەلسىزدىگىنىڭ وتىز جىلدىعىنا بايلانىستى راقىمشىلىق جاساۋ" تۋرالى زاڭدى قابىلدادى. الدىن الا مالىمەت بويىنشا بيىل 14 مىڭ سوتتالۋشى راقىمشىلىققا ىلىنەدى، ونىڭ ىشىندە مىڭعا جۋىق ادام بوساتىلادى، دەپ حابارلايدى "ادىرنا" ۇلتتىق پورتالى "Tengrinews.kz-كە" سىلتەمە جاساپ.
زاڭعا سايكەس، قىلمىستىق كودەكستىڭ كەيبىر باپتارى بويىنشا سوتتالعاندارعا جازانىڭ وتەلمەگەن بولىگى قىسقارتىلادى نە پروباتسيالىق ەسەپتەن شىعارىلادى، ال ونشا اۋىر ەمەس قىلمىستىق ىستەر بويىنشا ءىس جۇرگىزۋ توقتاتىلادى.
"بۇگىن ءبىز مەملەكەت باسشىسىنىڭ تاپسىرماسى بويىنشا دايىندالعان ماڭىزدى زاڭدى قابىلدادىق. راقىمشىلىق – بۇل گۋمانيزم اكتىسى، زاڭدى بۇزعان ازاماتتارعا قاتىستى مەملەكەتتىڭ ىزگى نيەتى مەن بىلدىرگەن سەنىمى. ول جاساعان ارەكەتىنىڭ اۋىرلىعى ەسكەرىلە وتىرىپ، ارداگەرلەرگە، كامەلەت جاسىنا تولماعاندارعا، ەگدە جاستاعى ازاماتتارعا، I, II توپتاعى مۇگەدەكتەرگە جانە ازاماتتار مەن مەملەكەتتىڭ قاۋىپسىزدىگىنە اسا قاتەر توندىرمەيتىن ادامدارعا قاتىستى قولدانىلادى", - دەدى ماۋلەن اشىمباەۆ.
تەرروريستىك جانە ەكسترەميستىك قىلمىس جاساپ سوتتالعاندارعا راقىمشىلىق جاسالمايدى. وسىلايشا، الدىن الا دەرەكتەر بويىنشا 14 مىڭنان اسا سوتتالعان ادام راقىمشىلىققا ىلىگەدى، ولاردىڭ تەك ءبىر مىڭعا جۋىعى عانا بوستاندىققا شىعادى.
ەندى زاڭ پرەزيدەنتكە قول قويۋعا جىبەرىلەدى جانە ول قولدانىسقا ەنگىزىلگەن كۇننەن باستاپ 6 اي ىشىندە راقىمشىلىق جاسالادى.
سونىمەن قاتار زاڭدا ۇكىمەت پەن اكىمدىكتەر راقىمشىلىق جاسالعاندارعا جۇمىسقا ورنالاستىرۋ مەن ەمدەلۋ بويىنشا الەۋمەتتىك كومەك كورسەتەتىنى جازىلعان. بۇل — قازاقستاننىڭ تاۋەلسىزدىك تاريحىنداعى توعىزىنشى راقىمشىلىق.
"ادىرنا" ۇلتتىق پورتالى.
