Búgin, 2 jeltoqsanda senatorlar "Qazaqstan Respýblıkasy Táýelsizdiginiń otyz jyldyǵyna baılanysty raqymshylyq jasaý" týraly Zańdy qabyldady. Aldyn ala málimet boıynsha bıyl 14 myń sottalýshy raqymshylyqqa ilinedi, onyń ishinde myńǵa jýyq adam bosatylady, dep habarlaıdy "Adyrna" ulttyq portaly "Tengrinews.kz-ke" silteme jasap.
Zańǵa sáıkes, Qylmystyq kodekstiń keıbir baptary boıynsha sottalǵandarǵa jazanyń ótelmegen bóligi qysqartylady ne probaııalyq esepten shyǵarylady, al onsha aýyr emes qylmystyq ister boıynsha is júrgizý toqtatylady.
"Búgin biz Memleket basshysynyń tapsyrmasy boıynsha daıyndalǵan mańyzdy zańdy qabyldadyq. Raqymshylyq – bul gýmanızm aktisi, zańdy buzǵan azamattarǵa qatysty memlekettiń izgi nıeti men bildirgen senimi. Ol jasaǵan áreketiniń aýyrlyǵy eskerile otyryp, ardagerlerge, kámelet jasyna tolmaǵandarǵa, egde jastaǵy azamattarǵa, I, II toptaǵy múgedekterge jáne azamattar men memlekettiń qaýipsizdigine asa qater tóndirmeıtin adamdarǵa qatysty qoldanylady", - dedi Máýlen Áshimbaev.
Terrorıstik jáne ekstremıstik qylmys jasap sottalǵandarǵa raqymshylyq jasalmaıdy. Osylaısha, aldyn ala derekter boıynsha 14 myńnan asa sottalǵan adam raqymshylyqqa iligedi, olardyń tek bir myńǵa jýyǵy ǵana bostandyqqa shyǵady.
Endi Zań Prezıdentke qol qoıýǵa jiberiledi jáne ol qoldanysqa engizilgen kúnnen bastap 6 aı ishinde raqymshylyq jasalady.
Sonymen qatar Zańda Úkimet pen ákimdikter raqymshylyq jasalǵandarǵa jumysqa ornalastyrý men emdelý boıynsha áleýmettik kómek kórsetetini jazylǵan. Bul — Qazaqstannyń táýelsizdik tarıhyndaǵy toǵyzynshy raqymshylyq.
"Adyrna" ulttyq portaly.
