بۇگىن، قازاقستان رەسپۋبليكاسىنىڭ تۇڭعىش پرەزيدەنتى كۇنى «نۇرسۇلتان نازارباەۆ حالىقارالىق اۋەجايى» اق-نا 90 جىل تولدى.
بۇل كۇنى، 1931 جىلعى 1 جەلتوقساندا سەمەي مەن اقمولا اراسىندا تۇراقتى اۋە قاتىناسى باستالدى (كاسىپورىننىڭ قۇرىلعان كۇنى). وسى كۇنگە وراي، ەلوردا اۋەجايى مەرەكەلىك كۇنگە دەيىن ارنايى جاريالانعان فوتوالبومعا ەنگەن تەرمينالداردىڭ قۇرىلىسى تاريحىنان مۇراعاتتىق فوتوسۋرەتتەردى كورسەتتى.
بۇگىن، 90 جىلدان كەيىن، تاڭعى رەيسپەن ەلوردادان «نۇر-سۇلتان – سەمەي» باعىتى بويىنشا اۋە كەمەسى ۇشىپ شىقتى، جولاۋشىلار سالتاناتتى جاعدايدا وركەستردىڭ اۋەنىمەن تىركەۋدەن ءوتتى.
سونداي-اق مەرەيتويلىق ءىس-شارالار اياسىندا حالىق بانكپەن بىرلەسىپ، اۋەجاي ديزاينىمەن تاقىرىپتىق بانك كارتاسى شىعارىلدى.
بۇگىندە نۇرسۇلتان نازارباەۆ حالىقارالىق اۋەجايى ەلىمىزدەگى ەڭ ءىرى اۋەجايلاردىڭ ءبىرى بولىپ تابىلادى. ەلوردانىڭ اۋە ايلاعى ورتالىق ازيا ەلدەرىنىڭ اۋەجايلارى اراسىندا جولاۋشىلار اعىنى مەن جۇك تاسىمالىنىڭ كوپتىگىنە بايلانىستى ەكىنشى ورىندا، سونداي-اق پوستكەڭەستىك كەڭىستىكتەگى اۋەجايلار اراسىندا 12-ءشى ورىندا. بۇگىنگى تاڭدا اۋەجاي نەگىزگى وتاندىق جانە بىرقاتار شەتەلدىك اۆياكومپانيالار ءۇشىن نەگىز بولىپ تابىلادى. قابىلداناتىن اۋە كەمەلەرىنىڭ ەڭ جوعارى ءتۇرى: بوينگ ب-747-800, رۋسلان ان-124 جانە تومەنگى ساناتتاعى ۇشاقتار.
بۇگىنگى تاڭدا اۋەجايدىڭ الەمدىك وزىق تاجىريبەلەرگە سايكەس جولاۋشىلارعا دا، اۆياكومپانيالارعا دا قىزمەت كورسەتۋ ءۇشىن بارلىق قاجەتتى ينفراقۇرىلىمى بار. تسيفرلىق مۇمكىندىكتەردى دامىتۋدىڭ ارقاسىندا NQZ قوسىمشاسى ارقىلى جولاۋشىلار ونلاين-تىركەۋدى جۇرگىزە الادى، رەيستەردى قاداعالاي الادى، اۋەجاي قىزمەتتەرىنە اقى تولەي الادى. اۋە كەمەلەرىنە وتىن قۇيۋدىڭ بىرەگەي جۇيەسى ءوز كەزەگىندە ۇشۋ الدىنداعى راسىمدەرگە ۋاقىتتى ىسىراپ ەتۋدى قىسقارتادى جانە اۆياكومپانيالارعا جەدەل قىزمەت كورسەتۋگە مۇمكىندىك بەرەدى.
ەلوردا اۋەجايىن دامىتۋ ياتا جانە يكاو حالىقارالىق ستاندارتتارىنا سايكەس جۇرگىزىلەدى. اۋەجايدىڭ ۇشۋ-قونۋ جولاعى ورتالىق ازياداعى ەڭ ۇزدىكتەردىڭ ءبىرى. ول ءىىىا يكاو ساناتىنا سايكەس كەلەدى جانە كەز كەلگەن اۋا رايىندا اۋە كەمەلەرىن قابىلداۋعا جانە شىعارۋعا مۇمكىندىك بەرەدى.
ەلوردا اۋەجايى نۇر-سۇلتان قوناقتارى مەن جولاۋشىلارى ءۇشىن قولايلى جاعداي جاساۋ بويىنشا بارلىق مۇمكىندىكتى قولدانادى.
