اقتوبە وبلىسىنىڭ مارتوك اۋدانىنا قاراستى ۆوزنەسەنوۆكا جانە دوستىق اۋىلدارىنا گاز كىردى. گاز قۇبىرلارىن ىسكە قوسۋ راسىمىنە وبلىس اكىمى وڭداسىن ورازالين قاتىستى دەپ حابارلايدى "ادىرنا" ۇلتتىق پورتالىنىڭ ءتىلشىسى.
— مەملەكەت باسشىسىنىڭ اۋىلدىق ايماقتاردى دامىتۋ تۋرالى تاپسىرمالارىنا سايكەس اقتوبە وبلىسىندا اۋىلداردى گازداندىرۋ، سۋمەن جانە باسقا دا يگىلىكتەرمەن قامتۋ بويىنشا اۋقىمدى شارالار جۇرگىزىلىۋدە. بۇل باعىتتاعى جۇمىستار جالعاساتىن بولادى،- دەدى وبلىس اكىمى قۇتتىقتاۋ سوزىندە.
بۇگىندە ۆوزنەسەنوۆكا اۋىلىندا 148 ءۇي مەن التى الەۋمەتتىك نىسان، ال دوستىق اۋىلىندا 112 ءتۇتىن مەن ەكى الەۋمەتتىك نىسان بار.
— ارينە، گاز كەلمەي تۇرىپ، كوپ قيىندىقتار بولدى. سۋ ءتورت جىل بۇرىن جۇرگىزىلگەن. قازىر ۇيدە سۋ بار، ەندى گاز كەلدى. قۋانىپ جاتىرمىز. بارلىق اۋىل تۇرعىندارىنىڭ اتىنان پرەزيدەنتكە، وبلىس اكىمىنە، ۇلكەن جۇمىس اتقارعان جۇمىسشىلارعا العىس ايتامىن. گاز قۇبىرلارى سالىنا باستاعاندا ەكى ايدان كەيىن گازدىڭ يگىلىگىن كورەتىنىمىزگە سەنبەگەن ەدىك، - دەيدى قۋانىشىمەن بولىسكەن دوستىق اۋىلىنىڭ تۇرعىنى التىناي ەسقارينا.
ايتا كەتەيىك، اۋىلداردى گازداندىرۋ جوبالارى "Nur Otan" پارتياسىنىڭ سايلاۋالدى باعدارلاماسىنىڭ جول كارتاسى اياسىندا جۇزەگە اسىرىلعان. بۇل ماقساتقا 617 ملن تەڭگەدەن استام قاراجات ءبولىندى.
ۆوزنەسەنوۆكادا وبلىس اكىمى سونداي-اق، مادەنيەت ءۇيىنىڭ جۇمىسىمەن تانىستى. مەكەمە عيماراتى 1975 جىلى سالىنعان. مۇندا جۋىردا جوندەۋ جۇرگىزىلىپ، قاسبەتى، تەرەزەلەرى، ەسىكتەرى مەن ساحناسى جاڭارتىلدى، جارىق پەن گاز جۇرگىزىلدى، كيىم-كەشەك تۇراتىن بولمە جابدىقتالدى.
سارىجار اۋىلدىق وكرۋگىندە وڭداسىن ورازالين "باي وردا" شارۋا قوجالىعىندا بولدى. قوجالىق شارۋالاردى مەملەكەتتىك قولداۋ باعدارلامالارىن پايدالانىپ، مامانداندىرىلعان تەحنيكا ساتىپ الۋ ءۇشىن 28 ملن تەڭگە جەڭىلدەتىلگەن قارىز الىپتى، بىلتىر تۇيىرشىكتەلگەن جەم شىعاراتىن تسەحتى ىسكە قوسقان. تسەحتىڭ قۋاتتىلىعى – ساعاتىنا 1 توننا تۇيىرشىك.
— مەن تەلەكوممۋنيكاتسيا سالاسىندا سەگىز جىل ەڭبەك ەتتىم. 2017 جىلى جۇمىستان شىعىپ كەتتىم دە، اۋىل شارۋاشىلىعىمەن اينالىسامىن دەپ شەشتىم. قازىر ءشارتارى شىعارامىز. گۇلتاجى وسىرەمىز، بۇل قۇرعاقشىلىققا ءتوزىمدى بىرجىلدىق داقىل. ءار گەكتاردان 20 تونناعا دەيىن جاسىل ماسسا الۋعا بولادى. ءبىرىنشى جىلى، ارينە، قيىن بولدى – جەردى زەرتتەپ، وڭدەۋ كەرەك دەگەندەي. وتكەن جىلى، تسەحتى ىسكە قوسقاندا دا وڭاي بولعان جوق، ادامدار ءتىپتى تۇيىرشىكتىڭ نە ەكەنىن بىلمەدى. بيىل، قۇرعاقشىلىققا بايلانىستى اقتاۋدان ساتىپ الۋشىلار بار. جەرگىلىكتى تۇرعىندار ازىرگە از الىپ جاتىر، بىراق جايلاپ ەتتەرى ۇيرەنۋدە. سۇرانىس كوپ. بىلتىر وتكىزۋ جاعى پروبلەما بولعان، بيىل كەرىسىنشە – ساتىپ الۋشىلار كوپ. مەملەكەت ۇلكەن قولداۋ كورسەتىپ، ماعان جەردى 49 جىلعا بەردى، ەكى جىل سالىق تولەمەيمىن، - دەيدى قوجالىق باسشىسى ەرتاي كەنجەبەكوۆ وبلىس اكىمىنە.
تاڭىربەرگەن اۋىلدىق وكرۋگىندە بولعان وڭداسىن ورازالين ۋچاسكەلىك پوليتسيا ينسپەكتورى مەن ۆەتەرينار دارىگەردىڭ كابينەتى ورنالاسقان اكىمدىكتىڭ جاڭا عيماراتىن قاراپ شىقتى. بۇدان بولەك، ءوڭىر باسشىسى ۇزىندىعى 15 شاقىرىمدىق ۆوزنەسەنوۆكا-مارتوك اۆتوكولىك جولىن، سونىمەن قاتار، 15 جىل پايدالانۋعا ەسەپتەلگەن قاتتى تۇرمىستىق زاتتارعا ارنالعان جاڭا پوليگوندى ارالادى.
ايتا كەتەيىك، كەلەر جىلى اقتوبە وبلىسىندا قاتتى تۇرمىستىق زاتتارعا ارنالعان پوليگوننىڭ قۇرىلىسى بويىنشا سەگىز جوبا جۇزەگە اسىرىلماق. وسىلايشا، وبلىس اۋداندارىنىڭ بارلىعى پوليگونمەن قامتىلاتىن بولادى.
سونداي-اق اۋداندا وبلىس اكىمى اۋىل شارۋاشىلىعى، تاماق جانە وڭدەۋ ونەركاسىبى قىزمەتكەرلەرى كۇنىنە ارنالعان سالتاناتتى شاراعا قاتىستى. جينالعانداردى قۇتتىقتاعان وبلىس اكىمى وڭداسىن ورازالين وڭىردەگى اگروونەركاسىپ كەشەنىنىڭ قىزمەتكەرلەرى ەڭبەكقورلىعىمەن جانە جاۋاپكەرشىلىگىمەن كوپتەگەن سالالاردا وڭ ناتيجەلەرگە قول جەتكىزىپ وتىرعانىن اتاپ ءوتتى.
— تاۋەلسىزدىك العان جىلداردان بەرى ءمۇيىزدى ءىرى قارا 110,2%، جىلقى 111,1%، سۋارمالى القاپ جەرلەرىنىڭ كولەمى 109,7 % ارتتى. اۋىل شارۋاشىلىعى سالاسىندا بۇگىن وڭىردە 34 مىڭعا جۋىق ادام ەڭبەك ەتەدى. جىلىنا اۋىل شارۋاشىلىعى سالاسىندا شامامەن مىڭعا جۋىق شارۋاشىلىق اشىلادى. 2021 جىلى 861 قوجالىق قۇرىلدى. اعىمداعى جىلى اۋىل شارۋاشىلىعى تاۋارىن وندىرۋشىلەردى سۋبسيديالاۋعا 24,3 ملرد. تەڭگە ءبولىنىپ، 2020 جىلمەن سالىستىرعاندا مەملەكەتتىك قولداۋ كولەمى 25% ءوستى. مۇنداي قولداۋدىڭ ناتيجەسىندە مال باسىنىڭ سانى ارتىپ، اۋىلشارۋاشىلىق تەحنيكاسىن جاڭارتۋ بويىنشا الدىڭعى ورىندامىز. بارشاڭىزعا وتانىمىزدىڭ ازىق-تۇلىك قاۋىپسىزدىگىن قامتاماسىز ەتۋ جولىنداعى تاباندى ەڭبەكتەرىڭىز بەن ءوز ىستەرىڭىزگە ادالدىقتارىڭىز، تۋعان جەرگە دەگەن سۇيىسپەنشىلىكتەرىڭىز ءۇشىن العىس ايتامىز،- دەدى وڭداسىن ورازالين.
شارادا اۋىل شارۋاشىلىعى كاسىپورىندارىنىڭ ۇزدىك ەڭبەككەرلەرىنە قر اۋىل شارۋاشىلىعى مينيسترلىگى مەن وبلىس اكىمى اتىنان توسبەلگىلەر، مەدالدار، قۇرمەت گراموتالارى مەن العىس حاتتار تابىس ەتىلدى. بارلىعى 62 ادام ماراپاتتالدى.
"ادىرنا" ۇلتتىق پورتالى.
