كەشە ەلباسى، پارتيا كوشباسشىسى ن.ءا. نازارباەۆتىڭ توراعالىعىمەن پارتيانىڭ ساياسي كەڭەسىنىڭ كەڭەيتىلگەن وتىرىسى ءوتتى. پرەمەر-مينيستر ا.ۇ. مامين ەلدىڭ الەۋمەتتىك-ەكونوميكالىق جاعدايى تۋرالى جانە ن.ز. نىعماتۋللين پارتيانىڭ سايلاۋالدى باعدارلاماسىن ىسكە اسىرۋعا ارنالعان جول كارتانىڭ ورىندالۋ بارىسى تۋرالى باياندامالار جاسادى.
ساياسي كەڭەستىڭ باستى جاڭالىعىن پارتيا توراعاسى نۇرسۇلتان نازارباەۆ جاريا ەتتى. ول: "مەن پارتيانىڭ باستاۋىندا تۇردىم، ونى وسى جىلدار بويى باسقاردىم جانە"Nur Otan" پارتياسىن ەل پرەزيدەنتى باسقارسا، ماڭىزدى بولاتىنىن بىلەمىن" - دەدى. بۇل قازاقستان رەسپۋبليكاسى پرەزيدەنتى قاسىم-جومارت كەمەلۇلى توقاەۆقا بيلەۋشى پارتيا توراعاسىنىڭ لاۋازىمى بەرىلەتىنىن ايقىندايدى جانە ول پروتسەدۋرا پارتيا جارعىسىنا سايكەس ىسكە اسادى.
بۇل شەشىم قازاقستان بيلىگىندەگى ترانسفورماتسيانىڭ ەۆوليۋتسيالىق جولمەن ىسكە اسۋىنىڭ ايقىن كورىنىسى. ەلىمىزدىڭ تاۋەلسىزدىگىنە 30 جىل قارساڭىندا، ءبىز تۇراقتى دامۋدىڭ جاڭا ءبىر كەزەڭىنە اياق باسقالى وتىرمىز.
ساياسي كەڭەس سوڭىندا ەلباسى ن. نازارباەۆ وسكەلەڭ ۇرپاققا "ەلدىكتىڭ جەتى تۇعىرى" اتتى ۇندەۋىن جولدادى.
1. تاۋەلسىزدىك – كەز-كەلگەن ازامات ءۇشىن ەڭ قاستەرلى قۇندىلىق.
2. بىرلىك پەن كەلىسىم – ەلدىگىمىزدىڭ مىزعىماس تۇعىرى.
3. جەر – اتا-بابا مۇراسى، حالىق قازىناسى.
4. وتباسى مەن سالت-ءداستۇر – قوعامنىڭ التىن دىڭگەگى.
5. ۇلتتىق مادەنيەت – حالىقتىڭ رۋحاني تىرەگى.
6. ءبىلىم مەن ەڭبەك – باقۋاتتى ءومىردىڭ كىلتى.
7. پراگماتيزم – باسەكەگە قابىلەتتى بولۋدىڭ كەپىلى.
الەمدەگى تۋربۋلەنتتىك ۇردىستەر مەن تەكتونيكالىق وزگەرىستەر قازاقستانعا دا قاتتى اسەر ەتۋدە. ءبىزدىڭ ماقساتىمىز سول قيىنشىلىقتان ءبىر جاعادان باس، ءبىر جەڭنەن قول شىعارىپ، امان شىعۋ.
ەدىل جاڭبىرشين
"ادىرنا" ۇلتتىق پورتالى
