24 قاراشا كۇنى ءال-فارابي اتىنداعى قازاق ۇلتتىق ۋنيۆەرسيتەتىنىڭ فيلوسوفيا جانە ساياساتتانۋ فاكۋلتەتى فيلوسوفيا كافەدراسى جانە ءال-فارابي ورتالىعى اعىن حايروللاۇلى قاسىمجانوۆتىڭ 90 جىلدىعىنا جانە قازاقستان رەسپۋبليكاسى تاۋەلسىزدىگىنىڭ 30 جىلدىعىنا ارنالعان "اعىن قاسىمجانوۆ – عالىم-فيلوسوف، فارابيتانۋشى" اتتى حالىقارالىق دوڭگەلەك ۇستەل وتكىزەدى.
فيلوسوفيا عىلىمدارىنىڭ دوكتورى، پروفەسسور، قازاقستان رەسپۋبليكاسى ۇلتتىق عىلىم اكادەمياسىنىڭ كوررەسپوندەنت-مۇشەسى اعىن حايروللاۇلى قاسىمجانوۆ ءال-ءفارابيدىڭ فيلوسوفيالىق ويى مەن مۇراسى تاريحىنىڭ تەوريالىق ماسەلەلەرىن العاشقى زەرتتەۋشىلەردىڭ ءبىرى بولدى. ونىڭ تىكەلەي قاتىسۋىمەن 1993 جىلى ءال-فارابي اتىنداعى قازۇۋ جانىنان ءال-فارابي ورتالىعى قۇرىلدى.
2003 جىلدىڭ قازان ايىنان باستاپ كورنەكتى عالىم، ويشىل، تالىمگەر ا.ح. قاسىمجانوۆتى ەسكە الۋ ماقساتىندا فيلوسوفيا كافەدراسى ا. ح. قاسىمجانوۆتىڭ تۋعان كۇنىنە ارنالعان "قاسىمجانوۆ وقۋلارى" حالىقارالىق كونفەرەنتسياسىن وتكىزەدى.
دوڭگەلەك ۇستەلدە ا.ح. قاسىمجانوۆتىڭ شىعارماشىلىعى مەن تۇلعاسى، قازاقستان قوعامىنىڭ رۋحاني دامۋى كونتەكسىندە ونىڭ ءال-ءفارابيدىڭ زياتكەرلىك مۇراسىن زەرتتەۋگە قوسقان ۇلەسى تالقىلانادى.
حالىقارالىق دوڭگەلەك ۇستەل جۇمىسىنا قازاقستاننان، جاقىن جانە الىس شەتەلدەردەن ا. ح. قاسىمجانوۆتىڭ شاكىرتتەرى مەن عالىمدارى قاتىسادى.
«ادىرنا» ۇلتتىق پورتالى
