قىتايدىڭ سولتۇستىك-باتىسىنداعى شىڭجاڭ-ۇيعىر اۆتونوميالىق اۋدانىندا قىرعىز حالقىنىڭ اۋىز ادەبيەتىنىڭ ۇلگىسى "ماناس" ەپوسىن ساقتاۋ تۋرالى جاڭا زاڭ كۇشىنە ەندى, دەپ حابارلايدى “ادىرنا” ۇلتتىق پورتالى قىتاي اگەنتتىگىنە سىلتەمە جاساپ.
«ماناس» ەپوسى تيبەت تايپاسىنان شىققان گەسار پاتشا مەن موڭعول ۇلتىنان شىققان جانعاردىڭ قاھارماندىق ەپوستارىمەن قاتار، قىتايداعى از ۇلتتاردىڭ ءۇش قاھارماندىق ەپوسىنىڭ ءبىرى رەتىندە تانىمال.
بۇل ەپوس – قىرعىز حالقىنىڭ اۋىز ادەبيەتىنەن ماڭىزدى ورىن الاتىن، قىرعىز تايپالارىن بىرىكتىرگەن اڭىزداعى باتىر ماناستىڭ ءومىرى مەن ەرلىكتەرىن باياندايتىن حيكايالار تسيكلىنان تۇرادى.
26 باپتان تۇراتىن جاڭا ەرەجەلەر قىرعىز حالقىنىڭ ماتەريالدىق ەمەس مادەني مۇراسى بولىپ سانالاتىن بۇل ەپوستى جۇيەلى تۇردە قورعاۋدى كوزدەيدى. ونىڭ ىشىندە ەپوستى ساقتاۋ مەن جالعاستىرۋ، زەرتتەۋ، اۋدارۋ جانە جاريالاۋ، سونداي-اق ەپوسقا بايلانىستى ادەبي جانە كوركەم شىعارماشىلىقتى دامىتۋ شارالارى بار.
"ماناس" 2009 جىلى يۋنەسكو-نىڭ ادامزاتتىڭ ماتەريالدىق ەمەس مادەني مۇراسىنىڭ رەپرەزەنتاتيۆتىك تىزىمىنە ەنگىزىلگەن بولاتىن. ول وزىنە ءتان ىرعاقتى جىرلاۋ مانەرى ارقىلى ۇرپاقتان ۇرپاققا اۋىزشا جولمەن جەتكىزىلىپ وتىرعان، كەيىنىرەك ونى جازباشا تۇردە حاتقا ءتۇسىرۋ ارەكەتتەرى قولعا الىندى.
"قۇقىقتىق نەگىزدىڭ بولۋىنا بايلانىستى “ماناستىڭ” بولاشاعى بۇدان دا جارقىن بولادى دەپ ۇمىتتەنەمىز", – دەدى بيىل ناۋرىزدا ۇلتتىق دەڭگەيدەگى ماتەريالدىق ەمەس مادەني مۇرانىڭ التىنشى بۋىن مۇراگەرلەرىنىڭ قاتارىنا ەنگەن 59 جاستاعى جاننۇر تۇرعانباي.
شىڭجاڭ مادەنيەت جانە تۋريزم باسقارماسى باسشىسىنىڭ ورىنباسارى پەن چەن جاڭا ەرەجەلەردىڭ شىڭجاڭنىڭ ماتەريالدىق ەمەس مادەني مۇراسىن شىعارماشىلىقپەن دامىتۋ مەن يننوۆاتسيالىق جاڭارتۋعا ىقپال ەتەتىنىنە توقتالدى.
