پرايمەريز - تۇرعىندارمەن كەرى بايلانىستى بارىنشا كۇشەيتۋدى كوزدەيدى، دەيدى شىمكەنت قالاسىنىڭ اكىمى، «Nur Otan» پارتياسىنىڭ قالالىق فيليالىنىڭ توراعاسى مۇرات ايتەنوۆ.بۇل تۋرالى اكىم بۇگىن الەۋمەتتىك جەلىدەگى پاراقشاسىندا ءمالىم ەتتى، دەپ حابارلايدى قازاقپارات.
جازباسىندا قالا اكىمى ەلىمىزدە «Nur Otan» پارتياسىنىڭ پارتياىشىلىك ىرىكتەۋ باسەكەسى باستالعانىن ايتىپ، قازاقستاننىڭ پارتيالىق-ساياسي دامۋ تاريحىندا پرايمەريز العاش رەت وتكىزىلىپ جاتقانىنا توقتالادى. ونىڭ ايتۋىنشا، پرايمەريزدىڭ ماقساتى – پارلامەنت ماجىلىسىندەگى جانە ماسليحاتتاعى ءتيىمدى دەپۋتاتتىق كورپۋستى ودان ءارى قالىپتاستىرۋ، پارتيالىق جەلى بويىنشا ىلگەرىلەتۋ، ولاردى مەملەكەتتىك ورگاندارداعى لاۋازىمدارعا ۇسىنۋ ءۇشىن باسەكەلەستىك كۇرەس نەگىزىندە ناقتى جانە مىقتى كوشباسشىلاردى انىقتاۋ. «پرايمەريز كەزىندە پارتيالىقتارمەن پارتيا باعدارلامالارىندا ءوز شەشىمىن تاباتىن وزەكتى، ناقتى جەرگىلىكتى ماسەلەلەر انىقتالادى. پرايمەريز كوروناۆيرۋس پاندەمياسى كەزەڭىمەن سايكەس كەلگەندىكتەن پارتياىشىلىك ىرىكتەۋگە ارنالعان ءىس-شارالاردىڭ باسىم بولىگىن ونلاين فورماتتا وتكىزۋ مىندەتتەلىپ وتىر. «مىقتى ليدەرلەر – مىقتى پارتيا» قاعيداسىن باسشىلىققا العان «پرايمەريز» جۇيەسى تۇرعىندارمەن كەرى بايلانىستى بارىنشا كۇشەيتۋدى، جالپى جۇرتشىلىقتىڭ پىكىرلەرىن ەسكەرە وتىرىپ، ءتۇرلى باستامالار مەن زاڭ جوبالارىن ونلاين-تالقىلاۋ مۇمكىندىگىن كوزدەيدى»،-دەپ جازدى اكىم. ونىڭ ايتۋىنشا، «Nur Otan» پارتياسىنىڭ شىمكەنت قالالىق فيليالى پرايمەريز وتكىزۋگە قارقىندى دايىندىق جۇرگىزدى. ازىرگە شىمكەنتتىك 36 ۇمىتكەر پرايمەريزگە قاتىسۋعا ءوتىنىش بەرگەن. ۇمىتكەرلەردىڭ ىشىندە 9 ادام 35 جاسقا دەيىنگى جاس وكىلدەرى. «ەلىمىزدىڭ بارلىق باستاماشىل، وتانسۇيگىش جانە جاۋاپكەرشىلىگى مول ازاماتتارىن ساياسي باسەكەگە بەلسەندى قاتىسۋعا شاقىرامىن! ساياسي دوداعا قاتىسىپ، ءوز ەلىنىڭ دامۋىنا ۇلەس قوسامىن دەگەن ازاماتتار ءوز مۇمكىندىكتەرىن جىبەرىپ الماۋى ءتيىس»، -دەيدى شىمكەنت قالاسىنىڭ اكىمى، «Nur Otan» پارتياسى قالالىق فيليالىنىڭ توراعاسى.
