الماتىدا ديۆالي مەرەكەسى اتالىپ ءوتتى

2305
Adyrna.kz Telegram

2021 جىلدىڭ 5 قاراشاسىندا الماتى ق.، قازاقكونتسەرت زالىندا ديۆالي مەرەكەسىنە ارنالعان مەرەكەلىك كونتسەرت (قازىرگى تاڭدا ءۇندىستاندا بۇل مەرەكە جاڭا جىل بولىپ سانالادى) ءوتتى، دەپ حابارلايدى "ادىرنا" ۇلتتىق پورتالى.

ءۇندىستاندا ديۆالي مەرەكەسىندە شامدار جاعۋدىڭ ماڭىزى زور. ءۇندى حالقىندا قاراڭعىلىق – ناداندىقتىڭ، ال جارىق – ءبىلىمنىڭ نىشانى بولىپ سانالادى. جارىقتىڭ ارقاسىندا دۇنيەنىڭ اسەمدىگى اشىلادى. وسىلايشا، وت جانە شامدار جاعۋ ارقىلى ايلا، زورلىق، اشۋ، قىزعانىش، ەكىجۇزدىلىك، قورقىنىش، ادىلەتسىزدىك جانە ازاپ سياقتى تەرىس كۇشتەردەن ارىلۋعا بولادى. شامدار جاعۋ ارقىلى جاراتقانعا قۇلشىلىق ەتە وتىرىپ، ءبىلىم، دەنساۋلىق، ادامگەرشىلىك، ەرلىك، رۋحاني بايلىق جانە جان تىنىشتىعى سياقتى اسىل قاسيەتتەرگە جەتۋگە بولادى دەپ ەسەپتەلىنەدى.

قازاقستان مەن ءۇندىستاندى ەلىمىز تاۋەلسىزدىك العاننان بەرى كوپجىلدىق دوستىق قارىم-قاتىناستار بايلانىستىرىپ كەلەدى. ءۇندىستان قازاقستان تاۋەلسىزدىك العاننان كەيىن ءبىزدىڭ ەلمەن ديپلوماتيالىق قارىم-قاتىناس ورناتقان العاشقى ەلدەردىڭ ءبىرى بولدى. سودان بەرى ەكى ەل اراسىنداعى ىنتىماقتاستىق – عىلىم، مادەنيەت، ءبىلىم جانە بيزنەستىڭ ءارتۇرلى سالالارىندا جۇزەگە اسىرىلىپ كەلەدى. وسى ورايدا، بىرەگەي ءال-فارابي اتىنداعى قازاق ۇلتتىق ۋنيۆەرسيتەتىندە عانا ءۇندىستاننىڭ باي مادەنيەتى، ادەبيەتى مەن تاريحىن زەرتتەيتىن، قازاق، ورىس، حيندي، ۋردۋ تىلدەرىن بىردەي جەتىك مەڭگەرگەن ءۇندىتانۋشى – مامانداردىڭ دايىندالاتىنىن ايتا كەتكەن ءجون.

ءال-فارابي اتىنداعى قازاق ۇلتتىق ۋنيۆەرسيتەتى مەن ءۇندىستان رەسپۋبليكاسىنىڭ ەلشىلىگى اراسىنداعى بىرلەسكەن ءىس-شارالار ەكى ەل اراسىنداعى عىلىم جانە مادەنيەت سالاسىنداعى ىنتىماقتاستىقتى دامىتۋدىڭ ماڭىزدى ەلەمەنتى بولىپ تابىلادى. ماسەلەن، شىعىستانۋ فاكۋلتەتىندە ماحاتما گاندي ورتالىعىنىڭ اشىلۋى، ءۇندىستاننىڭ استاناسى نيۋ-دەلي قالاسىندا ءال-فارابي ورتالىعىنىڭ اشىلۋى، ءۇندىستان رەسپۋبليكاسىنا بايلانىستى اپتالىقتار جانە جىل سايىن ۇيىمداستىرىلاتىن حالىقارالىق يوگا كۇنى جانە ت.ب. ءارتۇرلى مادەني شارالاردى ايتۋعا بولادى. وسى ورايدا 5 قاراشا كۇنى ۇيىمداستىرىلعان ديۆالي مەرەكەلىك كونتسەرتى جوعارىدا اتالىپ وتكەن بىرلەسكەن ءىس-شارالاردىڭ ءبىرى بولىپ تابىلادى.

كونتسەرت الماتى-قازاقستان ءۇندى كلاسسيكالىق بي جانە يوگا ورتالىعىمەن، سۆامي ۆيۆەكاناندا مادەني ورتالىعى، قازاقستان رەسپۋبليكاسىنداعى ءۇندىستان ەلشىلىگى جانە ءال-فارابي اتىنداعى قازاق ۇلتتىق ۋنيۆەرسيتەتى، شىعىستانۋ فاكۋلتەتى، ءۇندىتانۋ بولىمىمەن بىرلەسكەن تۇردە ۇيىمداستىرىلدى. وسىلايشا كونتسەرتتىك باعدارلاماعا تاياۋ شىعىس جانە وڭتۇستىك ازيا كافەدراسىنىڭ ءۇندىتانۋ ءبولىمىنىڭ 3-4 كۋرس ستۋدەنتتەرى قاتىستى. ولار قازاق جانە ورىس تىلدەرىنە اۋدارمالارىمەن بىرگە حيندي تىلىندە پرەزەنتاتسيالار دايىنداپ، ولەڭ شۋماقتارىن وقىپ، اسەم ءان تارتۋ ەتتى.

مەرەكەلىك كونتسەرت Instagram جانە Facebook پلاتفورمالارداعى تىكەلەي ترانسلياتسيانىڭ ارقاسىندا حالىقارالىق دەڭگەيدە ءوتىپ، ءارتۇرلى ەلدەردەن دە تاماشالاعان اۋديتوريانىڭ جوعارى باعاسىنا يە بولدى.

قازۇۋ، شىعىستانۋ فاكۋلتەتى

تاياۋ شىعىس جانە وڭتۇستىك ازيا كافەدراسى

مەرۋەرت پەرنەقۇلوۆا

 

پىكىرلەر