شىمكەنتتە قوعامدىق كەڭەستىڭ كەزەكتى وتىرىسى ءوتتى. ونلاين فورماتتا وتكەن جيىن بارىسىندا شاھاردا قالىپتاسقان ەپيداحۋال بارىسىندا كاسىپكەرلىكتى قولداۋ، ينۆەستيتسيا تارتۋ ماسەلەلەرى جان-جاقتى تالقىلاندى. سونىمەن قاتار، اۋىل شارۋاشىلىعى ونىمدەرىنىڭ باعالارىن تۇراقتاندىرۋ، سۋبسيديا جايى دا كۇن تارتىبىندە قارالدى.
قوعامدىق كەڭەس مۇشەلەرى وتىرىسقا تىڭعىلىقتى دايىندالىپتى. شىمكەنتتەگى كاسىپكەرلىك سالاسىنداعى اتقارىلىپ جاتقان ەسەپتەگى حالىق اراسىندا داۋ تۋدىرعان ماسەلەلەر بويىنشا سۇراقتار جەتكىلىكتى بولدى. سولاردىڭ ءبىرى – گرانت ۇلەستىرۋ جۇمىستارى.
بەرەكە دۇيسەبەكوۆ، شىمكەنت قالالىق كاسىپكەرلىك جانە يندۋستريالدى-يننوۆاتسيالىق دامۋ باسقارماسىنىڭ باسشىسى: «كونكۋرسقا قاتىستى سۇراقتار كوپ، بولىنگەن قارجى شەكتەۋلى، گرانتتاردى بولۋدە تەرىس ۇعىمداردى جويۋ ماقساتىندا مەملەكەتتىك قىزمەتكەرلەر قاتىستىرىلمايدى. گرانتتى بولۋگە قالالىق ءماسليحاتتىڭ دەپۋتاتتارى، «ازاماتتىق اليانس» باق وكىلدەرى قاتىسادى. اشىق وتۋدە».
شاھارداعى قازىرگى ەپيداحۋالعا بايلانىستى شاعىن جانە ورتا بيزنەستىڭ جۇمىسىنا قاتىستى شەكتەۋلەر دە بۇگىنگى وتىرىستا نازاردان تىس قالمادى.
جيىندا ۇكىمەت بەكىتكەن الەۋمەتتىك ماڭىزى بار 19 تاۋاردىڭ باعاسىن تۇراقتاندىرۋ باعىتىندا قالالىق اۋىل شارۋاشىلىعى جانە ۆەتەريناريا باسقارماسى باسشىسىنىڭ ەسەبى تىڭدالدى. 102 جىلىجايى 3 مىڭنان استام شارۋا قوجالىعى بار شىمكەنت كارتوپ، ءسابىز ، پياز سياقتى ونىمدەرمەن تۇرعىلىقتى حالىقتى قامتي الماي وتىر.
بۇل باعىتتا جۇمىستى جانداندىرۋ قاجەت دەگەن قوعامدىق كەڭەستەگىلەر قىزۋ تالقىلانىپ جاتقان ماسەلەلەر بويىنشا تۇرعىنداردىڭ سىن-ەسكەرتپە، ۇسىنىستارىن تىڭداۋعا دايىنبىز دەيدى. جانە دە شىمكەنتتىكتەردى بەلسەندىلىك تانىتۋعا شاقىردى.
نۇرعازى بۇحارباەۆ، شىمكەنت قالاسىنىڭ قوعامدىق كەڭەسى توراعاسى: «قوعامدىق كەڭەستىڭ ءوزى اتاۋى ايتىپ تۇرعانداي قوعامعا پايدامىزدى تيگىزۋىمىز كەرەك. سوندىقتان سىزدەردى بەلسەندى بولۋعا شاقىرامىز. بىزدە سايت بار، ءوز پىكىرلەرىڭدى بىلدىرە الاسىزدار».
