جۇمىسپەن قامتۋدىڭ 2020-2021 جىلدارعا ارنالعان جول كارتاسى شەڭبەرىندە اعىمداعى جىلى شىمكەنتتە بارلىعى 12 ينفراقۇرىلىمدىق جوبا ناقتىلانىپ، ميكروكرەديت بەرۋ جانە بيزنەستى دامىتۋ باعىتتارى بەكىتىلگەن بولاتىن.
جوبا اياسىندا 12 نىساننىڭ قۇرىلىسىن جۇرگىزۋ جوسپارلانعان. اتاپ ايتقاندا، 2 ءبىلىم بەرۋ، 1 سپورت، 1 سۋمەن جانە 8 ەلەكترمەن قامتۋ نىساندارى بوي كوتەرۋدە. وندا 392 جۇمىس ورىندارىن قۇرۋ جوسپارلانسا، ونىڭ ىشىندە 198 ورىنعا ازاماتتار جۇمىسقا قالالىق حالىقتى جۇمىسپەن قامتۋ ورتالىعى ارقىلى جولداۋ جوسپارلانۋدا. بۇگىندە جوبا اياسىندا جالپى 230 ازامات جۇمىسقا ورنالاسسا، ورتالىق ارقىلى 154 ازامات قۇرىلىس جۇمىستارىنا جولداندى . قازىرگى تاڭدا تارتىلعان جۇمىس كۇشىمەن نىسانداردا قۇرىلىس-مونتاج جۇمىستارى جۇرگىزىلۋدە.
قۇرىلىس نىساندارىنىڭ ىسكە اسىرىلۋى بارىسىمەن شىمكەنت قالاسىنىڭ اكىمدىگى جانىنان قۇرىلعان جول كارتاسىنىڭ ىسكە اسىرىلۋىن ۇيلەستىرۋ جانە مونيتورينگتەۋ جونىندەگى كوميسسيا مۇشەلەرى تانىستى. قالا اكىمىنىڭ ورىنباسارى، باسقارما وكىلدەرى، قالالىق ءماسليحات دەپۋتتارى مەن قوعامدىق بىرلەستىكتەردىڭ وكىلدەرى جانە باق وكىلدەرىنەن قۇرالعان كوميسسيا مۇشەلەرى نىسانداردا اتقارىلىپ جاتقان جۇمىس بارىسى مەن جۇمىسشىلاردىڭ ەڭبەك جاعدايىن باقىلادى. مۇنداي شارالار الداعى ۋاقىتتا دا جالعاسىن تاپپاق.
سونداي-اق، مەملەكەتتىك باعدارلاما اياسىندا شاعىن، ورتا بيزنەستى دامىتۋ، جۇمىس ورىندارىن قۇرۋ ءۇشىن ميكروكرەديتتەر بەرۋ كوزدەلگەن. جۇمىس ىزدەپ جۇرگەن ازاماتتار تۇرعىلىقتى جەرى بويىنشا حالىقتى جۇمىسپەن قامتۋ ورتالىقتارىنا جۇگىنىپ، ينفراقۇرىلىمدىق جوبالاردى ىسكە اسىرۋعا قاتىسا الادى.
حالىقتى جۇمىسپەن قامتۋ ورتالىقتارى قاجەتتى بىلىكتىلىگى بار مامانداردى ىرىكتەپ، جۇمىس بەرۋشى-مەردىگەر كومپانياعا جولدايدى.
