شىمكەنتتە 4 اۋدان اكىمدەرى مونيتورينگتىك توپتاردىڭ كارانتين كەزىندەگى جۇمىستارى تۋرالى ايتتى. اۋدان باسشىلارىنىڭ سوزىنشە، قالادا تويلار از وتكىزىلە باستاعان، بىراق تالاپتاردى بۇزىپ جاتقاندار دا ازايماي تۇر.
سونىمەن قاتار، ءوز مەكەمەسىندە كۇنىنە بىرنەشە رەت مەرەكە وتكىزەتىن ءتارتىپ بۇزۋشىلار دا بار. ولارعا ايىپپۇل عانا ەمەس، جۇمىسىنا دا شەكتەۋ قويىلادى.
مونيتورينگ توپ كەنەتتەن پايدا بولىپ، ناتيجەسىندە حاتتاما مەن ايىپپۇل سالىندى. كارانتيندىك تالاپتى بۇزىپ جاتقاندار از ەمەس. شىمكەنت قالاسىنىڭ كوپتەگەن تۇرعىندارى شەكتەۋ شارالارىنا قاراماستان ساقتىق شارالارىن مۇلدەم ۇمىتىپ جاتادى.
اباي اۋدانىنىڭ اكىمى مونيتورينگ توپتار كۇشەيتىلگەن رەجيمدە جۇمىس ىستەپ جاتىر دەيدى. ەندى تەكسەرۋ توبىندا وتكەن جىلعىداي 6 ەمەس، 10 توپ جۇرەتىن بولادى. كوبىنەسە كارانتين رەجيمىن بۇزۋشىلار سالتاناتتى مەرەكەلەر وتكىزگەندەر. سالدارىنان قانشاما ادامدار اۋرۋحاناعا ءتۇسىپ جاتىر.
بۇحارباي پارمانوۆ، اباي اۋدانىنىڭ اكىمى: «اباي اۋدانىندا كاسىپكەرلەردىڭ كارانتيندى بۇزۋىنىڭ بەس جۇزدەن استام جاعدايى انىقتالدى، ونىڭ ىشىندە 29 ملن. تەڭگەگە ايىپپۇل تولەندى. ءبىرىنشى شىلدەدەن باستاپ 28 شىلدەگە دەيىن كارانتيندىك شارالار كۇشەيتىلدى جانە قازىر 6 ەمەس 10 ءموبيلدى توپ جۇمىس ىستەيدى. وسى كەزەڭدە 109 بۇزۋشىلىق انىقتالىپ، سوت شەشىمىمەن ايىپپۇل سالىندى».
ال ءال-فارابي اۋدانىندا مونيتورينگتىك توپتاردىڭ مۇشەلەرى ادامدار كوپ جينالاتىن ورىنداردى انىقتاپ، سودان سوڭ تەكسەرۋشىلەردى شاقىرادى.
راشيد مىڭباەۆ، ءال-فارابي اۋدانىنىڭ اكىمى: «1 شىلدەدەن باستاپ ايىپپۇل سوماسى 30 ملن. تەڭگەنى قۇرادى، ءتورت جۇزدەن استام بۇزۋشىلىق ورىن الدى. بۇل توي، ءتۇرلى مەرەكەلەر جانە باسقا دا زاڭ بۇزۋشىلىقتار. بىزدە بۇزۋشىلىقتار تۋرالى ەسەپ بەرەتىن ارنايى قىزمەتكەرلەر بار جانە ءبىز دەرەۋ سول جەرگە بارامىز».
ەڭبەكشى اۋدانىندا زاڭبۇزۋشىلىقتار ازايىپتى. اۋدان اكىمىنىڭ مالىمەتىنشە، ءبىر ايدا جۇزدەن استام زاڭبۇزۋشىلىق انىقتالعان. ال قاراتاۋ اۋدانىنىڭ اكىمى جۇرت ادامدار شوعىرلانعان جەرگە بارۋدىڭ قاۋپىن ەندى تۇسىنە باستاعانىن العا تارتتى.
ابزال الىقۇلوۆ، قاراتاۋ اۋدانىنىڭ اكىمى: «توي جاساپ، كوپ ادامنىڭ باسىن قوسۋ – زاڭبۇزۋشىلىقتىڭ ەڭ باستى ءتۇرى بولىپ تۇر. كافە مەن دۇكەندەردە ونداي جۇرتشىلىق جوق. قازىر تاراپ جاتقان ۆيرۋستىڭ جاڭا شتامى ەڭ قاۋىپتى بولىپ سانالادى. ول 8 ساعاتتىڭ ىشىندە 8 ادامعا جۇعادى. سوندىقتان، حالىقتان ادام كوپ جينالاتىن ورىنعا بارماۋىن سۇرايمىن».
ايتا كەتسەك، ەكىنشى تامىزدان باستاپ ەلىمىزدىڭ بەس قالاسىندا، اتاپ ايتقاندا: نۇر-سۇلتان، الماتى، شىمكەنت، قاراعاندى جانە اتىراۋدا Ashyq جوباسىنا قاتىسپايتىن بارلىق مەكەمە قىزمەتىن توقتاتاتىن بولادى.
