Shymkentte tórt aýdan boıynsha mobıldi toptardyń jumysy qorytyndylandy

1997
Adyrna.kz Telegram

Shymkentte 4 aýdan ákimderi monıtorıngtik toptardyń karantın kezindegi jumystary týraly aıtty. Aýdan basshylarynyń sózinshe, qalada toılar az ótkizile bastaǵan, biraq talaptardy buzyp jatqandar da azaımaı tur.

Sonymen qatar, óz mekemesinde kúnine birneshe ret mereke ótkizetin tártip buzýshylar da bar. Olarǵa aıyppul ǵana emes, jumysyna da shekteý qoıylady.

Monıtorıng top kenetten paıda bolyp, nátıjesinde hattama men aıyppul salyndy. Karantındik talapty buzyp jatqandar az emes. Shymkent qalasynyń kóptegen turǵyndary shekteý sharalaryna qaramastan saqtyq sharalaryn múldem umytyp jatady.

Abaı aýdanynyń ákimi monıtorıng toptar kúsheıtilgen rejımde jumys istep jatyr deıdi. Endi tekserý tobynda ótken jylǵydaı 6 emes, 10 top júretin bolady. Kóbinese karantın rejımin buzýshylar saltanatty merekeler ótkizgender. Saldarynan qanshama adamdar aýrýhanaǵa túsip jatyr.

Buharbaı Parmanov, Abaı aýdanynyń ákimi: «Abaı aýdanynda kásipkerlerdiń karantındi buzýynyń bes júzden astam jaǵdaıy anyqtaldy, onyń ishinde 29 mln. teńgege aıyppul tólendi. Birinshi shildeden bastap 28 shildege deıin karantındik sharalar kúsheıtildi jáne qazir 6 emes 10 mobıldi top jumys isteıdi. Osy kezeńde 109 buzýshylyq anyqtalyp, sot sheshimimen aıyppul salyndy».

Al Ál-Farabı aýdanynda monıtorıngtik toptardyń músheleri adamdar kóp jınalatyn oryndardy anyqtap, sodan soń tekserýshilerdi shaqyrady.

Rashıd Myńbaev, Ál-Farabı aýdanynyń ákimi: «1 shildeden bastap aıyppul somasy 30 mln. teńgeni qurady, tórt júzden astam buzýshylyq oryn aldy. Bul toı, túrli merekeler jáne basqa da zań buzýshylyqtar. Bizde buzýshylyqtar týraly esep beretin arnaıy qyzmetkerler bar jáne biz dereý sol jerge baramyz».

Eńbekshi aýdanynda zańbuzýshylyqtar azaıypty. Aýdan ákiminiń málimetinshe, bir aıda júzden astam zańbuzýshylyq anyqtalǵan. Al Qarataý aýdanynyń ákimi jurt adamdar shoǵyrlanǵan jerge barýdyń qaýpin endi túsine bastaǵanyn alǵa tartty.

Abzal Áliqulov, Qarataý aýdanynyń ákimi: «Toı jasap, kóp adamnyń basyn qosý – zańbuzýshylyqtyń eń basty túri bolyp tur. Kafe men dúkenderde ondaı jurtshylyq joq. Qazir tarap jatqan vırýstyń jańa shtamy eń qaýipti bolyp sanalady. Ol 8 saǵattyń ishinde 8 adamǵa juǵady. Sondyqtan, halyqtan adam kóp jınalatyn orynǵa barmaýyn suraımyn».

Aıta ketsek, ekinshi tamyzdan bastap elimizdiń bes qalasynda, atap aıtqanda: Nur-Sultan, Almaty, Shymkent, Qaraǵandy jáne Atyraýda Ashyq jobasyna qatyspaıtyn barlyq mekeme qyzmetin toqtatatyn bolady.

Pikirler