شىمكەنت قالاسى ءال-فارابي اۋدانىنىڭ اكىمى راشيد مىڭباەۆ «Shanyraq» ورتالىعىنىڭ جۇمىسىمەن تانىستى.
اشىلعانىنا نەبارى ءبىر جىل بولعان ورتالىق قالاداعى وسال توپتاردىڭ الەۋمەتتىك كارتاسىن دايىنداۋدا ەلەۋلى ىستەر اتقارىپ كەلەدى.
الەۋمەتتىك ماسەلەلەر جونىندە قالانىڭ ءتورت اۋدانىمەن تىعىز بايلانىس ورناتقان ورتالىقتا جاس انالارمەن بىرگە اجەلەر جانە جالعىزىلىكتى اكەلەردىڭ دە مەكتەبى جولعا قويىلعان.
ورتالىق مەڭگەرۋشىسى ابيبۋللا قالىمبەتتىڭ سوزىنشە، ورتالىققا ازاماتتار ايىنا ءبىر رەت باس قوسىپ، ءوزىن مازالاپ جۇرگەن ماسەلەلەردى ورتاعا سالادى. سەبەبى ورتالىقتا پسيحولوگيالىق، الەۋمەتتىك جانە قۇقىقتىق كەڭەس بەرۋ قىزمەتى اقىسىز جۇرگىزىلەدى.
ءتىپتى مۇندا بالا اسىراپ الۋ جونىندە كەڭەس الۋمەن وزگە كاسىپ يگەرۋگە جانە جۇمىسپەن قامتۋ تۇرعىسىنان دا جاردەم الۋعا مۇمكىندىك بار.
ءبىر جىل ىشىندە 9 859 ازامات ورتالىقتا پسيحولوگيالىق، قۇقىقتىق، ااك-كە قۇجات تاپسىرۋ، ءۇي كەزەگىنە تۇرۋ بويىنشا كەڭەس العان.
بۇدان وزگە، كوپبالالى جانە ناۋقاس بالا كۇتىمىندەگى 143 انا تىگىن، ماسساج، سمم كۋرستارى مەن كونديتەرلىك شەبەرلىك ساعاتىنا قاتىسىپ، قازىر ءوز كاسىبىن دوڭگەلەتىپ وتىر.
– اجىراسۋ – قوعامداعى ەڭ ۇلكەن ماسەلەنىڭ ءبىرى. كۇيزەلىسكە ۇشىراعان اتا-انالار پسيحولوگيالىق كومەككە ءزارۋ. ال تولىق ەمەس وتباسىدا وسكەن بالانىڭ كەلەشەكتە قوعامعا ءسىڭىسۋى، ادامدارمەن ءتىل تابىسۋى قيىنعا سوعادى. جاسقانشاق بولعان بالالاردىڭ وزدەرى دە تۇراقسىز ءارى دەپرەسسياعا جاقىن كەلەدى. وسى ماسەلەنىڭ الدىن الۋ ءۇشىن «Shanyraq» ورتالىعى اشىلىپ، يگى ىستەر اتقارىلۋدا. الداعى ۋاقىتتا سىزدەرمەن ەتەنە جاقىن جۇمىس ىستەيتىن بولامىز،-دەدى راشيد مامىتۇلى.
