مينيسترلەرىنىڭ ورنى اۋىسقانىمەن، ءمانى وزگەرمەيتىن ۇكىمەت

2077

الەۋمەتتىك جەلىدە جۋىق ارادا مامين باسقاراتىن ۇكىمەتتىڭ وتستاۆكاعا كەتىپ، سەنات پەن ءماجىلىستىڭ بىرلەسكەن وتىرىسىندا ۇكىمەتتىڭ جاڭا باسشىسى تاعايىندالادى دەگەن سىبىس قايتا تاراي باستادى. ۇكىمەتتى سىنايتىنداردىڭ دا دەنى «مامين ۇكىمەتى وتستاۆكاعا كەتۋى كەرەك» دەپ سانايدى.

ال ۇكىمەت پەن حالىق اراسى الشاقتاعان ۇستىنە الشاقتاي تۇسۋدە. ەلدە شىرىلداپ ۇندەۋ جولداعاندار مەن جاعدايىن ايتىپ كومەك سۇراعاندار دا جەتەرلىك. ەستىسە دە، بۇقارانىڭ بازىناسىنا قۇلاق ءتۇرىپ جاتقان ولار جوق.

«ءتۇبىن بىلمەگەن - تۇگىن بىلمەيدى» دەگەنى راس-اق. كيت ولسە دە كورمەيتىن ۇكىمەتتەن كىرىسى كۇرت تومەندەگەن حالىققا نە پايدا؟ ساراپشىمىزدىڭ پىكىرىن سۇراماققا بەكىندىك. كاسىپكەر سانجار بوقاەۆتان پىكىر الدىق.

- ءسىز اسقار ءماميننىڭ جۇمىسىن سىناپ جۇرگەن بەلسەندى ازاماتسىز. سوڭعى كەزدەرى ۇكىمەت وتستاۆكاعا كەتەدى دەگەن سىبىس قايتا ءوربىدى. بۇل قانشالىقتى شىندىققا جاناسادى؟

- ۇكىمەتكە وڭ باعا بەرۋ قيىن. ءبىر عانا مىسال، ەل بيۋدجەتىنەن كوروناۆيرۋسقا قارسى كۇرەسكە قىرۋار قاراجات ءبولىندى. ءدارى-دارمەك، مەديتسينالىق ماسكا جەتىسپەدى. اۋرۋحانالار مەن ەمحانالار ناۋقاسقا تولدى. اقيقاتىندا، ولار پوستپاندەميالىق كەزەڭگە دايىن بولعان جوق. دالىرەك ايتساق، ۇكىمەت كوروناۆيرۋسقا قارسى ەشقانداي ستراتەگيا ۇسىنا المادى.

- ۇكىمەت باسشىسى اۋىسىپ جاڭادان پرەمەر-مينيستر كەلسە، نە وزگەرمەك؟

- بيلىككە ءدال وسىنداي ۇكىمەتپەن جۇمىس جاساۋ ءتيىمدى ءارى ىڭعايلى. ىستە دەگەندى ىستەيدى. تەك ءوز قامىن ويلاۋمەن الەك. ۇكىمەت اۋىسىپ جاتسا دا، ەشتەڭە وزگەرمەيدى. وزگەرىستى كۇتۋدىڭ قاجەتى جوق.

ايتالىق، ۇلتتىق ەكونوميكا ءمينيسترى وتباسىمىزعا ءبىر ايعا ازىق-تۇلىك ساتىپ الۋعا 50 000 تەڭگە جەتەدى دەپ جاۋاپ بەرگەن بولاتىن. ول نەنى كورسەتەدى؟ ءبىر ءۇيدىڭ ەكونوميكاسىن باسقارا المايتىن ادامعا، ءبىز ءبىر مەملەكەتتىڭ ەكونوميكاسىن تاپسىرىپ وتىرمىز دەگەن ءسوز.

سالا ماماندارى، ۇكىمەتتەگى اۋىس-ءتۇيىس تۋرالى اڭگىمە شىندىققا اينالسا، اكىمدەر كورپۋسى دا وزگەرىستەرگە ۇشىرايتىنى انىق دەيدى.

«ساياسي ساراپشىلاردان بولەك، مامين باسقاراتىن ۇكىمەتتى سىناماعان ادام جوق. ۇكىمەت وتستاۆكاعا كەتكەن كۇننىڭ وزىندە ەشتەڭە وزگەرمەسى بەلگىلى.

بىراق ءماميندى جۇمىسسىز قالدىرمايدى. ونى استانا قالاسىنىڭ اكىمى ەتىپ تاعايىنداپ، ونىڭ ورنىنا ءاليحان سمايىلوۆ نەمەسە ومىرزاق شوكەەۆتى قويۋى مۇمكىن. ۆيتسە-پرەمەرلىككە باۋىرجان بايبەكتى تاعايىندايدى دەگەن ماسەلەلەر دە ايتىلۋدا»، - دەدى تىركەلمەگەن «دەمپارتيا» جەتەكشىسى جانبولات ماماي.

ورالباي مەرگەنبايۇلى

"ادىرنا" ۇلتتىق پورتالى

پىكىرلەر
رەداكتسيا تاڭداۋى
Серіктес/Партнер
Студия IMA - создание сайтов