قازاقستاندىقتار Telegram مەسسەندجەرىندە COVID-19-عا قارسى ۆاكتسينا العان ساربازداردىڭ جاپپاي قايتىس بولعانى ايتىلاتىن ۆيدەو تاراتىپ جاتىر. جەلىدەگى ۆيدەودا راسىمەن دە اسكەري قىزمەتكەرلەر مەن ولارعا كومەك كورسەتىلىپ جاتقان ءسات تۇسىرىلگەن، دەپ حابارلايدى “ادىرنا” ۇلتتىق پورتالى. Stopfake اقپارات كوزى راس وتىرىگىن انىقتاپ بەردى.
بۇل ۆيدەو 2021 جىلدىڭ تامىزىندا اعىلشىن ءتىلدى ورتادا كوپ تاراعان. وعان سيپاتتاما رەتىندە ۆيدەوداعى اسكەريلەردىڭ COVID-19 ينفەكتسياسىنا قارسى ۆاكتسينا العانى، ولاردىڭ كەنەتتەن قايتىس بولۋىنا دا ۆاكتسينا سەبەپ بولعانى جازىلعان.
ال شىندىعىندا بۇل ۆيدەو بيىل 21 تامىزدا ءۇندىستاندا توزىمدىلىك جارىسى كەزىندە تۇسىرىلگەن. قاتتى ىستىق پەن اۋانىڭ ىلعالدىعىنا بايلانىستى 34 سارباز ەسىنەن تانىپ قالعان. جارىستىڭ 72 ساعاتقا سوزىلعانى بەلگىلى جانە ساربازدار ەسىنەن تانباس بۇرىن 10 شاقىرىمدى تولىق جابدىق پەن قارۋ-جاراقتى كوتەرىپ ءجۇرىپ وتكەن.
زارداپ شەككەن ساربازدىڭ بارلىعى اۋرۋحاناعا ىستىق وتكەن دەگەن دياگنوزبەن جەتكىزىلدى. ىشىندە ءبىر سارباز قايتىس بولدى، بىراق وعان COVID-19 ينفەكتسياسىنا قارسى ۆاكتسينانىڭ ەش قاتىسى جوق.
“ادىرنا” ۇلتتىق پورتالى
