موڭعوليانىڭ بايان-ولگي ايماعىندا بۇركىت سالىپ، سايات قۇراتىن ءجاسوسپىرىم قازاق قىزدار كوبەيە باستادى. سولاردىڭ ءبىرى ايگەرىم اسكەردى اكە-شەشەسى «ەڭ جاس بۇركىتشى» دەپ اتايدى.
موڭعوليانىڭ بايان-ولگي ولكەسىندەگى التاي ايماعىندا تۇراتىن 12 جاستاعى ايگەرىم اسكەر بۇركىتپەن اڭ اۋلاۋ ىسىنە ءبۇلدىرشىن كەزىنەن باستاپ قىزىعا باستاعان. كىشكەنتايىنان اتقا ءمىنىپ، اكەسىمەن ەرىپ، سونارعا شىققان. ونىڭ ىنتاسىن كورگەن اتا-اناسى ايگەرىمگە ارناپ ۇيادان بۇركىت بالاپانىن اپەرىپ، ارنايى ۇيرەتكەن. قازىر قۇسىنىڭ جاسى تورتتە. اتى – اقبالاق. اكەسى اسكەر ۇلىقپانۇلىنىڭ ايتۋىنشا، قىردا تۇراتىن قىستاقتاعى اقبالاقتى وقۋىنا بايلانىستى ايگەرىم كۇن سايىن كورە المايدى. ەسەسىنە دەمالىس كۇندەرى كەلگەن كەزدە باعىپ-قاعادى.
- ءوزى بۇركىتتى جاقسى كورەدى. ساباققا دا الىپ كەتەم دەيدى. وعان قايدان (كۇلەدى). تەلەفونمەن سويلەسكەن سايىن بۇركىتىن سۇرايدى، - دەيدى اكەسى.
ال ايگەرىمنىڭ ءوزى بۇركىتشىلىكتىڭ وقۋىنا ەش كەدەرگى جوعىن، قايتا وقۋدان سەرگۋگە كومەكتەسەتىنىن ايتادى.
ءبىزدىڭ مەكتەپتە مەنەن باسقا تاعى ءبىر بۇركىتشى قىز بار. بىراق ول 12-سىنىپتا وقيدى. مۇعالىمدەردىڭ، دوستارىمنىڭ كوزقاراسى جاقسى. قولداپ كومەكتەسەدى، - دەيدى ايگەرىم.
ايگەرىمنىڭ اناسى اقگۇل قىزىنىڭ قىزىعى مەن قيىندىعى بىردەي بۇركىتشىلىك ونەرىنە قىزىعۋىن قولدايدى. ايتكەنمەن اۋەلگى كەزدە قورىققانىن دا جاسىرمايدى.
- بۇركىتشى بولۋ ءۇشىن باتىلدىق كەرەك. شىدامدىلىق كەرەك. سۋىقتا تايعاق كەزدە تاۋ-تاستا جۇرەدى. باسىندا قورىققانبىز. بالانىڭ ءوزى قالاپ تۇرعاننان كەيىن شىدايدى دەپ ويلادىق. ويلاعانىمىزداي بولدى، - دەيدى اناسى.
ونەرىن شىڭداۋ ءۇشىن ايگەرىمدى اكە-شەشەسى ءتۇرلى جارىستارعا جىبەرىپ تۇرادى. ماسەلەن، بىلتىر ناۋرىزدا وتكەن بۇركىتشىلەر جارىسىندا ايگەرىم اۋدان بويىنشا 1-ورىن السا، قىركۇيەك ايىندا وتكەن قۇسبەگىلەر جارىسىندا 4-ورىن العان.
- وتىزعا تارتا بۇركىتشى قاتىستى. بىرنەشە قىز بالا بولدى. كوبى 18-19 جاستاعىلار. ەڭ كىشكەنەسى ايگەرىم بولدى، - دەيدى اكەسى اسكەر ۇلىقپانۇلى.
اتا-اناسى 7-سىنىپتا وقيتىن ايگەرىمدى «بايان-ولگيدەگى ەڭ جاس بۇركىتشى قىز» دەپ سيپاتتايدى. ولاردىڭ سوزىنشە، قىزدارىنىڭ ونەرىنە قىزىققان سينگاپۋردىڭ كينو كومپانياسى ايگەرىم تۋرالى دەرەكتى فيلم تۇسىرمەكشى. اسكەر ۇلىقپانۇلى ازىرگە كينوكومپانيامەن ارادا ەشقانداي كەلىسىم جاسالماعانىن، بىراق ءتۇسىرۋشى توپتىڭ ماۋسىم ايىندا كەلىپ ءتۇسىرۋ جۇمىستارىن باستايتىنىن حابارلاعانىن ايتتى.
- قىركۇيەك ايىندا سينگاپۋردان 14 كىسى كەلىپ كەتكەن بولاتىن. ءۇش كۇندەي ءبىزدىڭ ايماقتا بولىپ كەتتى. ساپار سوڭىنان كينو تۇسىرەتىندەرىن ايتتى. قازىر كۇن سۋىق بولعاندىقتان با، كەلە الماي جاتقانعا ۇقسايدى. التىنشى ايعا قاراي كەلەمىز دەدى. دەرەكتى ءفيلمنىڭ باستى كەيىپكەرى ايگەرىم بولادى، - دەدى اسكەر ۇلىقپانۇلى.
قازىر ايگەرىم اقبالاقتى ماۋسىم ايىندا تۇسىرىلەتىن فيلمگە دايىنداپ، باپتاۋعا كىرىسكەن. دەمالىسقا كەلگەن سايىن تاۋعا شىعىپ، بۇركىتىن ۇشىرىپ جاتتىعىپ ءجۇر.
بۇعان دەيىن ازاتتىق بايان-ولگيدەگى تانىمال بۇركىتشى قىز ايشولپان نۇرعايىپ تۋرالى ءبىرىنشى بولىپ جازعان ەدى.
امەريكالىق رەجيسسەر وتتو بەلل ول تۋرالى «بۇركىتشى قىز» (The Eagle Huntress) اتتى دەرەكتى فيلم ءتۇسىرىپ، 2016 جىلدىڭ قازان ايىندا كوپشىلىكتىڭ نازارىنا ۇسىنعان. قازىر ولگي قالاسىندا 11-سىنىپتا وقيتىن ايشولپاندى الەمگە تانىتقان فيلمنەن كەيىن باتىس اقپارات قۇرالدارى بۇركىتشى قىز تۋرالى كوپ جازدى. قازاق دياسپوراسى تۇراتىن ايماقتى ءدۇر سىلكىنتكەن ايشولپان فاكتورى باسقا ءجاسوسپىرىم قىزداردى دا ءداستۇرلى اڭشىلىق ونەرىنە قۇمار قىلا باستاعانى بايقالادى.
