Mońǵolııanyń Baıan-Ólgıı aımaǵynda búrkit salyp, saıat quratyn jasóspirim qazaq qyzdar kóbeıe bastady. Solardyń biri Áıgerim Áskerdi áke-sheshesi «eń jas búrkitshi» dep ataıdy.
Mońǵolııanyń Baıan-Ólgıı ólkesindegi Altaı aımaǵynda turatyn 12 jastaǵy Áıgerim Ásker búrkitpen ań aýlaý isine búldirshin kezinen bastap qyzyǵa bastaǵan. Kishkentaıynan atqa minip, ákesimen erip, sonarǵa shyqqan. Onyń yntasyn kórgen ata-anasy Áıgerimge arnap uıadan búrkit balapanyn áperip, arnaıy úıretken. Qazir qusynyń jasy tórtte. Aty – Aqbalaq. Ákesi Ásker Ulyqpanulynyń aıtýynsha, qyrda turatyn qystaqtaǵy Aqbalaqty oqýyna baılanysty Áıgerim kún saıyn kóre almaıdy. Esesine demalys kúnderi kelgen kezde baǵyp-qaǵady.
- Ózi búrkitti jaqsy kóredi. Sabaqqa da alyp ketem deıdi. Oǵan qaıdan (kúledi). Telefonmen sóılesken saıyn búrkitin suraıdy, - deıdi ákesi.
Al Áıgerimniń ózi búrkitshiliktiń oqýyna esh kedergi joǵyn, qaıta oqýdan sergýge kómektesetinin aıtady.
Bizdiń mektepte menen basqa taǵy bir búrkitshi qyz bar. Biraq ol 12-synypta oqıdy. Muǵalimderdiń, dostarymnyń kózqarasy jaqsy. Qoldap kómektesedi, - deıdi Áıgerim.
Áıgerimniń anasy Aqgúl qyzynyń qyzyǵy men qıyndyǵy birdeı búrkitshilik ónerine qyzyǵýyn qoldaıdy. Áıtkenmen áýelgi kezde qoryqqanyn da jasyrmaıdy.
- Búrkitshi bolý úshin batyldyq kerek. Shydamdylyq kerek. Sýyqta taıǵaq kezde taý-tasta júredi. Basynda qoryqqanbyz. Balanyń ózi qalap turǵannan keıin shydaıdy dep oıladyq. Oılaǵanymyzdaı boldy, - deıdi anasy.
Ónerin shyńdaý úshin Áıgerimdi áke-sheshesi túrli jarystarǵa jiberip turady. Máselen, byltyr naýryzda ótken búrkitshiler jarysynda Áıgerim aýdan boıynsha 1-oryn alsa, qyrkúıek aıynda ótken qusbegiler jarysynda 4-oryn alǵan.
- Otyzǵa tarta búrkitshi qatysty. Birneshe qyz bala boldy. Kóbi 18-19 jastaǵylar. Eń kishkenesi Áıgerim boldy, - deıdi ákesi Ásker Ulyqpanuly.
Ata-anasy 7-synypta oqıtyn Áıgerimdi «Baıan-Ólgııdegi eń jas búrkitshi qyz» dep sıpattaıdy. Olardyń sózinshe, qyzdarynyń ónerine qyzyqqan Sıngapýrdyń kıno kompanııasy Áıgerim týraly derekti fılm túsirmekshi. Ásker Ulyqpanuly ázirge kınokompanııamen arada eshqandaı kelisim jasalmaǵanyn, biraq túsirýshi toptyń maýsym aıynda kelip túsirý jumystaryn bastaıtynyn habarlaǵanyn aıtty.
- Qyrkúıek aıynda Sıngapýrdan 14 kisi kelip ketken bolatyn. Úsh kúndeı bizdiń aımaqta bolyp ketti. Sapar sońynan kıno túsiretinderin aıtty. Qazir kún sýyq bolǵandyqtan ba, kele almaı jatqanǵa uqsaıdy. Altynshy aıǵa qaraı kelemiz dedi. Derekti fılmniń basty keıipkeri Áıgerim bolady, - dedi Ásker Ulyqpanuly.
Qazir Áıgerim Aqbalaqty maýsym aıynda túsiriletin fılmge daıyndap, baptaýǵa kirisken. Demalysqa kelgen saıyn taýǵa shyǵyp, búrkitin ushyryp jattyǵyp júr.
Buǵan deıin Azattyq Baıan-Ólgııdegi tanymal búrkitshi qyz Aısholpan Nurǵaıyp týraly birinshi bolyp jazǵan edi.
Amerıkalyq rejısser Otto Bell ol týraly «Búrkitshi qyz» (The Eagle Huntress) atty derekti fılm túsirip, 2016 jyldyń qazan aıynda kópshiliktiń nazaryna usynǵan. Qazir Ólgıı qalasynda 11-synypta oqıtyn Aısholpandy álemge tanytqan fılmnen keıin Batys aqparat quraldary búrkitshi qyz týraly kóp jazdy. Qazaq dıasporasy turatyn aımaqty dúr silkintken Aısholpan faktory basqa jasóspirim qyzdardy da dástúrli ańshylyq ónerine qumar qyla bastaǵany baıqalady.
