"Dauletten" قايىرىمدىلىق قورى بۇگىندە باسپاناعا مۇقتاج جاندار مەن بىلىمگە ۇمتىلعان جاستاردى قولداپ كەلەدى. بۇعان دەيىن قور 40 باسپانا سىيلاپ، 100 شاكىرتاقى تاعايىنداعان. “بالا-شاعامەن اۋىلعا”، “ەكىنشى تىنىس”، ء“بىلىمنىڭ جۇلدىزى” جوبالارى مەن “قايىرىمدى قالا” الەۋمەتتىك كەشەنىن ىسكە قوسقان. بۇگىنگە دەيىن قايىرىمدىلىق ىستەرگە 478 ميلليون تەڭگە جۇمساعان. جاقىندا قور ۇجىمى ءبىر جىلدىق ەسەپ بەرۋ كەشىن وتكىزدى. اتالعان كەشە بارىپ، قور مۇشەلەرىمەن تىلدەسكەن ەدىك. القيسسا…
“Dauletten" قايىرىمدىلىق قورىنىڭ كەڭەسشىسى، تانىمال بلوگەر داۋلەت مۇقاەۆتىڭ ايتۋىنشا، قايىرىمدىلىق شارالار و باستا وقىرمانداردان تۇسكەن حاتتاردان باستالعان. قادىرلى ءىستى قولعا العان ول وسىلايشا قوردىڭ قۇرىلۋىنا ۇيىتقى بولىپتى.
-ەڭ العاش ۆاگوندا تۇرىپ جاتقان وتباسىنى كورىپ، وقىرمانىم ماعان حات جازعان بولاتىن. وسىنى ينستاگرامعا سالىپ كورەيىنشى، مۇمكىن ادامدار جينالار دەپ ويلادىم. سالعانىم سول ەكەن، ءبىر تاۋلىكتىڭ ىشىندە ءبىر وتباسىنى باسپانالى قىلدىق. وسىلايشا بۇگىنگە دەيىن مۇقتاج جاندارعا 40 باسپانا الدىق. كەيىن اتىمىز تانىمال بولا باستاعاننان كەيىن، رەسمي تۇردە تىركەلدىك. حالىقتىڭ ءاربىر جينالعان تيىن- تەبەنىنە ەسەپ جاساپ وتىرمىز. ءبىز جالعىز باسپانا ەمەس، ءبىلىم باعىتىنا دا نەگىزگى باسىمدىق بەرەمىز. سەبەبى ەلدىڭ بارلىعىنا ءۇي اپەرە بەرسەك، قوعامدا ماسىلدار دا كوبەيىپ كەتەدى. سوندىقتان دا «ەڭبەك ەت، ارەكەت ەت» دەگەن ۇرانمەن ءبىلىم باعىتىندا دا جۇمىس ىستەپ ءجۇرمىز. وسىعان دەيىن 10 شاقتى بالانىڭ وقۋ اقىسىن تولەپ بەردىك. ودان بولەك «ءبىلىمنىڭ جۇلدىزى» دەگەن گرانتتار دا تاعايىندادىق، — دەيدى ول.
ال قوردىڭ العاشقى ديرەكتورى ۇلان داۋلەتقالي قور جۇمىسىن الىپ كەتۋ ءۇشىن ءبىراز قيىندىققا تاپ بولعاندارىن ايتادى.
— وسى جوبانى قولعا العاندا الەمدە پاندەميا باستالىپ، سودان باسپانانى قويا تۇرىپ، وتتەگى كونتسەنتراتور الدىرا باستادىق. ونىڭ لوگيستيكاسى قيىن بولدى. ياعني قازاقستانعا كەلۋى، قۇجاتتاردىڭ رەتتەلۋى، ونى امان-ەسەن جەتكىزۋ — ءبارى بىزگە ۇلكەن ماسەلە بولدى. 300 اپپاراتتى تاراتامىز دەگەنشە، كوپ ۋاقىت كەتتى. ەكىنشى قيىندىق — قايىرىمدىلىق قورىنا دەگەن قوعامنىڭ قايشى پىكىرى ەدى. «بۇل كىم سوندا، ولار اقشانى قايدان الىپ جاتىر» دەگەن تەرىس پىكىرلەر ايتىلدى. بىراق ءبىز جۇمىسىمىزدىڭ ناتيجەسىمەن دالەلدەدىك دەپ ويلايمىن. 2020 جىلى جازدا «بالا-شاعامەن اۋىلعا» دەگەن كەرەمەت جوبا ازىرلەدىك، — دەيدى ول.
“Dauletten" قايىرىمدىلىق قورىنىڭ قازىرگى ديرەكتورى نۇرسۇلتان ورىنبەك قازىر قور بىلىمگە ۇمتىلعان جاستارعا كوڭىل ءبولىپ، ولاردىڭ وقۋ اقىلارىن تولەپ بەرىپ جاتقاندىعىن ايتادى. الداعى ۋاقىتتا قوردىڭ باستاماسىمەن ەل استاناسىنداعى ۇستازدار اللەياسىنا "ەل ءۇمىتى" اتتى ەسكەرتكىش قويىلماق.
-بۇگىندە قور جۇمىسىن ارنايى سايتىنان، ينستا پاراقشاسىنان كورۋگە بولادى. سول جەرگە مۇقتاج جاندار ءوتىنىش تە قالدىرا الادى. ارنايى كەڭەس تالقىلاپ، كىم كومەككە ءزارۋ ەكەنىن شەشەدى. قورعا قاراجات حالىقتان، مەتسەناتتار مەن كومپانيالاردان جينالادى، — دەيدى ۇلان داۋلەتقالي.
سونىمەن قوردىڭ ءبىر جىلدا اتقارعان جۇمىسىن ءبىر اۋىز سوزبەن تۇيىندەۋ قيىن. دەگەنمەن ەل يگىلىگىنە ەڭبەك ەتىپ، مۇقتاج جاندارعا قول ۇشىن سوزىپ جۇرگەن قايىرىمدى جانداردىڭ قاي باستاماسى دا وزگەلەرگە ۇلگى بولارى انىق. بۇل جەردە سونداي-اق قور ۇجىمى عانا ەمەس، بۇكىل ەل بولىپ، تۇكپىر-تۇكپىردەن كومەك قولىن سوزعان ەرىكتىلەردىڭ دە ەڭبەگى ەرەن. ءار ەرىكتىنىڭ ايتار ءوز حيكاياسى بار. ولار جاقسىلىق جاساۋعا قۇشتار، ءبىر-ءبىرىن تىڭدايدى، سىيلايدى، وزگەلەردىڭ قۋانىشىنا قۋانادى. شارا سوڭىندا قوردىڭ بارلىق مۇشەسى ريزا بولىپ تاراستى. ءبىز دە قور ۇجىمىنا ساتتىلىك تىلەدىك.
"ادىرنا" ۇلتتىق پورتالى.
