“Dauletten" qaıyrymdylyq qory bir jyldyǵyn atap ótti

2366
Adyrna.kz Telegram

"Dauletten" qaıyrymdylyq qory búginde baspanaǵa muqtaj jandar men bilimge umtylǵan jastardy qoldap keledi.  Buǵan deıin qor 40 baspana syılap, 100 shákirtaqy taǵaıyndaǵan. “Bala-shaǵamen aýylǵa”,  “Ekinshi tynys”,   “Bilimniń juldyzy” jobalary men  “Qaıyrymdy qala” áleýmettik keshenin  iske qosqan. Búginge deıin qaıyrymdylyq isterge 478 mıllıon teńge jumsaǵan. Jaqynda qor ujymy bir jyldyq esep berý keshin ótkizdi. Atalǵan keshe baryp, qor múshelerimen tildesken edik. Álqıssa…

“Dauletten" qaıyrymdylyq qorynyń keńesshisi, tanymal bloger Dáýlet Muqaevtyń aıtýynsha, qaıyrymdylyq sharalar o basta oqyrmandardan túsken hattardan bastalǵan. Qadirli isti qolǵa alǵan ol osylaısha qordyń qurylýyna uıytqy bolypty.

-Eń alǵash vagonda turyp jatqan otbasyny kórip, oqyrmanym maǵan hat jazǵan bolatyn. Osyny ınstagramǵa salyp kóreıinshi, múmkin adamdar jınalar dep oıladym. Salǵanym sol eken, bir táýliktiń ishinde bir otbasyny baspanaly qyldyq. Osylaısha búginge deıin muqtaj jandarǵa 40 baspana aldyq. Keıin atymyz tanymal bola bastaǵannan keıin, resmı túrde tirkeldik. Halyqtyń árbir jınalǵan tıyn- tebenine esep jasap otyrmyz. Biz jalǵyz baspana emes, bilim baǵytyna da negizgi basymdyq beremiz. Sebebi eldiń barlyǵyna úı ápere bersek, qoǵamda masyldar da kóbeıip ketedi. Sondyqtan da «eńbek et, áreket et» degen uranmen bilim baǵytynda da jumys istep júrmiz. Osyǵan deıin 10 shaqty balanyń oqý aqysyn tólep berdik. Odan bólek «Bilimniń juldyzy» degen granttar da taǵaıyndadyq, — deıdi ol.

Al qordyń alǵashqy dırektory Ulan Dáýletqalı qor jumysyn alyp ketý úshin biraz qıyndyqqa tap bolǵandaryn aıtady.

— Osy jobany qolǵa alǵanda álemde pandemııa bastalyp, sodan baspanany qoıa turyp, ottegi konentrator aldyra bastadyq. Onyń logıstıkasy qıyn boldy. Iaǵnı Qazaqstanǵa kelýi, qujattardyń rettelýi, ony aman-esen jetkizý — bári bizge úlken másele boldy. 300  apparatty taratamyz degenshe, kóp ýaqyt ketti. Ekinshi qıyndyq — qaıyrymdylyq qoryna degen qoǵamnyń qaıshy pikiri edi. «Bul kim sonda, olar aqshany qaıdan alyp jatyr» degen teris pikirler aıtyldy. Biraq biz jumysymyzdyń nátıjesimen dáleldedik dep oılaımyn. 2020 jyly jazda «Bala-shaǵamen aýylǵa» degen keremet joba ázirledik, — deıdi ol.

“Dauletten" qaıyrymdylyq qorynyń qazirgi dırektory Nursultan Orynbek qazir qor bilimge umtylǵan jastarǵa  kóńil bólip, olardyń oqý aqylaryn tólep berip jatqandyǵyn aıtady. Aldaǵy ýaqytta qordyń bastamasymen el astanasyndaǵy Ustazdar alleıasyna "El úmiti" atty  eskertkish qoıylmaq.

-Búginde qor jumysyn arnaıy saıtynan, ınsta paraqshasynan kórýge bolady. Sol jerge muqtaj jandar ótinish te qaldyra alady. Arnaıy keńes talqylap, kim kómekke zárý ekenin sheshedi. Qorǵa qarajat halyqtan, meenattar men kompanııalardan jınalady, — deıdi Ulan Dáýletqalı.

Sonymen qordyń bir jylda atqarǵan jumysyn bir aýyz sózben túıindeý qıyn. Degenmen el ıgiligine eńbek etip, muqtaj jandarǵa qol ushyn sozyp júrgen qaıyrymdy jandardyń qaı bastamasy da ózgelerge úlgi bolary anyq. Bul jerde sondaı-aq qor ujymy ǵana emes, búkil el bolyp, túkpir-túkpirden kómek qolyn sozǵan eriktilerdiń de eńbegi eren. Ár eriktiniń aıtar óz hıkaıasy bar. Olar jaqsylyq jasaýǵa qushtar, bir-birin tyńdaıdy, syılaıdy, ózgelerdiń qýanyshyna qýanady. Shara sońynda qordyń barlyq múshesi rıza bolyp tarasty. Biz de qor ujymyna sáttilik tiledik.

"Adyrna" ulttyq portaly.

 

Pikirler