بۇگىن ۇلتتىق قوعامدىق سەنىم كەڭەسىنىڭ التىنشى وتىرىسى ءوتتى، دەپ حابارلايدى «ادىرنا» ءتىلشىسى baq.kz-كە سىلتەمە جاساپ.
پرەزيدەنت قاسىم-جومارت توقاەۆ ۇلتتىق كەڭەستى قوعام، حالىقپەن تىكەلەي بايلانىستىڭ وڭتايلى قۇرالى رەتىندە پايدالانىلانىپ وتىر، دەپ اتاپ ءوتتى ءماجىلىس دەپۋتاتى ەرلان سايروۆ.
اۋىل اكىمدەرىن سايلاۋ ساياسي رەفورمالار وزەگى. بۇگىن 800 استام اكىم تىكەلەي سايلاۋدان ءوتتى. بۇل جۇمىس جالعاسىن تابادى. مەملەكەت باسشىسى قاسىم-جومارت توقاەۆ مەملەكەت دامۋىنىڭ باستى باعىتتارى بويىنشا ناقتى تاپسىرمالار بەردى، - دەپ اتاپ ءوتتى ول.
1. اۋىل اكىمدەرى سايلاۋىنا ورتا ءبىلىمى بار ازاماتتارعا تۇسۋگە جاعداي جاساۋ.
2. مەكتەپتەردىڭ قاۋىپسىزدىگىن جاپپاي ارتتىرۋ.
3. تسيفرلىق تەحنولوگيانى دامىتۋ. تسيفرلىق قىزمەتتەردىڭ ساپاسىن ارتتىرۋ. قاعازباستىلىقتان قۇتىلۋ.
4. بانكلەر مەن قارىز الۋشىلاردىڭ اراسىنداعى قارىم-قاتىناس. بۇگىن 540 مىڭ ازاماتتار بانكىلەرگە 354 ملرد تەڭگە قارىز. قارىز الۋشىلارعا «زالوگ» مۇلكىن وزدەرىنە ساتۋعا مۇمكىندىك جاساۋ. وسى سالادا زاڭدارعا شۇعىل تۇردە وزگەرىستەر ەنگىزۋ.
5. مەملەكەتتىك شىعىنداردى دۇرىس جوسپارلاۋ. وكىمەت بيۋدجەت شىعىستارىن وڭتايلى جوسپارلاۋى كەرەك.
6. ادام قۇقىقتارى جونىندەگى جۇمىستى جالعاستىرۋ. ەكىنشى فاكۋلتاتيۆتى ەشقانداي ەسكەرتپەسىز بەكىتۋ.
7. ايەلدەر مەن بالالاردى زورلىق زومبىلىقتان قورعاۋدى جالعاستىرۋ. وسى سالاداعى زاڭدى كۇشەيتۋ.
8. تۇتىنۋشىلار قۇقىعىن قورعاۋ. 32 مىڭ الداۋ فاكتىلەرى انىقتالعان.
9. قانداستاردىڭ ەلگە ورالۋعا جاعداي جاساۋ.
10. شەكارالىق ايماقتاردا حالىق سانىن ارتتىرۋ. وكىمەتكە شەكارالىق ايماقتاردى دامىتۋ جونىندەگى ۇسىنىس جاساۋدى تاپسىردى.
ۇلتتىق كەڭەس پرەزيدەنت قاسىم-جومارت توقاەۆتىڭ «حالىقتى تىڭداۋعا قابىلەتى مەملەكەت» فيلوسوفياسىن ءىس-جۇزىنە اسىراتىن نەگىزگى ينستيتۋتقا اينالدى.
بۇگىن قازاقستان رەسپۋبليكاسىنىڭ پرەزيدەنتى قاسىم-جومارت كەمەلۇلى توقاەۆ شىعىس قازاقستان وبلىسىنىڭ شەكارالىق اۋداندارىنا قاتىستى ءوزىنىڭ ءپرينتسيپتى پوزيتسياسىن جەتكىزە وتىرىپ، «وكىمەتكە شەكارالىق ايماقتاردى دامىتۋدىڭ كەشەندى باعدارلاماسىن جاساۋدى تاپسىرامىن. بۇل ماسەلە مەملەكەتتەن بەلگىلى شىعىنداردى تالاپ ەتەدى» دەپ اتاپ ءوتتى. مەملەكەت باسشىسى شىعىس قازاقستاننىڭ كاتون-قاراعاي، مارقاكول، تارباعاتاي حالقىنىڭ ءۇنىن ەستي ءبىلدى! قاسىم-جومارت كەمەلۇلى وسى ماسەلەنى مەنىڭ كوتەرىپ جۇرگەنىمدى اتاپ وتكەنى جۇرەگىمە جىلى سەزىلدى. «بۇل ماسەلەنى دەپۋتات ەرلان سايروۆ كوتەرىپ ءجۇر» دەپ اتاپ ءوتتى پرەزيدەنتىمىز! قاسىم-جومارت اعا، وسىلاي ءبىزدىڭ ەلىمىز ءۇشىن جاساپ جاتقان تىرشىلىگىمىزگە نىق قولداۋ كورسەتتى،-دەدى سايروۆ.
ياعني، سول ءوڭىردىڭ حالقىنىڭ جاعدايىن وزدىگىنەن دە ءبىلىپ وتىر دەگەن ءسوز.
شىنى كەرەك، ىستەرىڭە مەملەكەت باسشىسى قولداۋ ءبىلدىرىپ جاتقاندا قوبالجىپ، سونىمەن بىرگە رۋحىڭ دا كوتەرىلىپ قالادى ەكەن. «وسى ماسەلەنى كوتەرمە، ەشكىم كومەكتەسپەيدى ساعان» دەگەن دە ازاماتتار بولدى، ناقتى قارسى شىققان جىگىتتەر دە بولدى. ءوزىمدى جالعىز سەزىنىپ ءجۇردىم، بۇگىن بويىندا ادامگەرشىلىك قاسيەتى مول، قاراپايىم ادامداردىڭ مۇڭ-مۇددەسىن تۇسىنەتىن ادامنىڭ بار ەكەندىگىن ناقتى سەزىندىم! راحمەت سىزگە، قۇرمەتتى قاسىم-جومارت كەمەلۇلى! كاتون-قاراعاي، مارقاكول، تارباعاتاي ءوڭىرىنىڭ حالقى وزىڭىزگە شىن كوڭىلىمەن راحمەتىن ايتىپ جاتىر! وسى ءوڭىر ءۇشىن كۇرەسىپ وتكەن بوگەنباي، قابانباي، داۋلەتبايدىڭ رۋحى ءوزىڭىزدى، مەملەكەتىمىزدى جەبەپ-قولداپ ءجۇرسىن، - دەپ جازدى ول.
«ادىرنا» ۇلتتىق پورتالى
