اتىراۋدا «رۋحاني جاڭعىرۋ» مەملەكەتتىك باعدارلاماسى اياسىندا تاريحي-ولكەتانۋ مۋزەيىندە قازاقتىڭ ۇلتتىق دومبىراسىنىڭ تاريحىنان سىر شەرتەتىن كورمە اشىلدى، دەپ حابارلايدى «قازاقپارات» حاا ءتىلشىسى.
«بۇل كورمەگە مۋزەي قورىنان 65 مۋزىكالىق اسپاپ قويىلعان. ولاردىڭ جاسالۋى دا، ماتەريالى دا ءارتۇرلى. كورمەگە كەلۋشىلەر قاراعاي مەن ۇيەڭكىدەن، جاڭعاق اعاشى مەن ەمەننەن، قاندىاعاشتان جاسالعان دومبىرالاردى تاماشالاۋدا»، - دەدى اتىراۋ تاريحي-ولكەتانۋ مۋزەيىنىڭ ديرەكتورى راشيدا حاريپوۆا. سونداي-اق، كورمەگە قويىلعان جادىگەرلەردىڭ تاريحى مەن ەۆوليۋتسياسى تۋرالى دا مالىمەتتەر ۇسىنىلعان.
«دومبىرانىڭ جەر بەتىندەگى ەڭ ەجەلگى مۋزىكالىق اسپاپتاردىڭ ءبىرى ەكەندىگىن ءبىرى بىلسە، ءبىرى بىلمەس. سەكسەنىنشى جىلداردىڭ باسىندا مۋزىكالىق اسپاپتار مەن بيلەپ جاتقان ادامدار بەينەلەنگەن جارتاستاعى سۋرەتتەر تابىلدى. بۇل ءاربىر قازاق وتباسىندا ءىلۋلى تۇرعان دومبىراعا ۇقسايدى. ارحەولوگتار بۇل سۋرەتتەردىڭ نەوليت كەزەڭىندە، ياعني 4000 جىل بۇرىن سالىنعان سۋرەت ەكەندىگىن انىقتاعان ەدى. بىراق، كەيبىر دەرەكتەردە دومبىرا 6000 جىل بۇرىن پايدا بولعان دەگەن مالىمەتتەر دە بار»، - دەدى اتىراۋلىق ەتنوگراف وتەپبەرگەن الىمگەرەەۆ.
بۇل كورمە تەك مۋزىكالىق اسپاپتاردىڭ تاريحىنا عانا ارنالماعان. كورمە كاسپي ماڭى تاريحى، تانىمال كۇيشىلەر قۇرمانعازى ساعىربايۇلى مەن دينا نۇرپەيىسوۆانىڭ تاعدىرىمەن دە تىعىز بايلانىستى. سونىمەن قاتار، جۇرتشىلىقتىڭ نازارىنا قارشىعا احمەدياروۆ، نۇرعيسا تىلەنديەۆ، سالامات مۇقاشەۆ، ماحامبەت وتەمىسۇلىنىڭ كۇي شەرتكەن دومبىرالارى تانىستىرىلدى.
http://www.inform.kz
