Atyraýda «Rýhanı jańǵyrý» memlekettik baǵdarlamasy aıasynda tarıhı-ólketaný mýzeıinde qazaqtyń ulttyq dombyrasynyń tarıhynan syr shertetin kórme ashyldy, dep habarlaıdy «QazAqparat» HAA tilshisi.
«Bul kórmege mýzeı qorynan 65 mýzykalyq aspap qoıylǵan. Olardyń jasalýy da, materıaly da ártúrli. Kórmege kelýshiler qaraǵaı men úıeńkiden, jańǵaq aǵashy men emennen, qandyaǵashtan jasalǵan dombyralardy tamashalaýda», - dedi Atyraý tarıhı-ólketaný mýzeıiniń dırektory Rashıda Harıpova. Sondaı-aq, kórmege qoıylǵan jádigerlerdiń tarıhy men evolıýııasy týraly da málimetter usynylǵan.
«Dombyranyń jer betindegi eń ejelgi mýzykalyq aspaptardyń biri ekendigin biri bilse, biri bilmes. Sekseninshi jyldardyń basynda mýzykalyq aspaptar men bılep jatqan adamdar beınelengen jartastaǵy sýretter tabyldy. Bul árbir qazaq otbasynda ilýli turǵan dombyraǵa uqsaıdy. Arheologtar bul sýretterdiń neolıt kezeńinde, ıaǵnı 4000 jyl buryn salynǵan sýret ekendigin anyqtaǵan edi. Biraq, keıbir derekterde dombyra 6000 jyl buryn paıda bolǵan degen málimetter de bar», - dedi atyraýlyq etnograf Ótepbergen Álimgereev.
Bul kórme tek mýzykalyq aspaptardyń tarıhyna ǵana arnalmaǵan. Kórme Kaspıı mańy tarıhy, tanymal kúıshiler Qurmanǵazy Saǵyrbaıuly men Dına Nurpeıisovanyń taǵdyrymen de tyǵyz baılanysty. Sonymen qatar, jurtshylyqtyń nazaryna Qarshyǵa Ahmedıarov, Nurǵısa Tilendıev, Salamat Muqashev, Mahambet Ótemisulynyń kúı shertken dombyralary tanystyryldy.
http://www.inform.kz
