سامات ەرعاليەۆ مادەنيەت جانە سپورت مينيسترلىگى سپورت جانە دەنە شىنىقتىرۋ ىستەرى كوميتەتىنىڭ توراعاسى قىزمەتىنە تاعايىندالدى. بۇل تۋرالى پرەمەر-ءمينيستردىڭ ءباسپاسوز قىزمەتى حابارلادى، دەپ مالىمدەيدى "ادىرنا" ۇلتتىق پورتالى.
سامات ەرعاليەۆ 1979 جىلى الماتى وبلىسىندا دۇنيەگە كەلگەن.
قوناەۆ اتىنداعى ەۋرازيالىق زاڭ اكادەمياسىن، بوكەتوۆ اتىنداعى قاراعاندى مەملەكەتتىك ۋنيۆەرسيتەتىن بىتىرگەن.
ەڭبەك جولىن 2004 جىلى جەكە كومپانيادا جابدىقتاۋ جونىندەگى مەنەدجەر لاۋازىمىنان باستادى.
2012-2018 جىلدارى "ۇلتتىق شتاتتىق كوماندالار جانە سپورت رەزەرۆى ديرەكتسياسى" رمقك ءتۇرلى لاۋازىمداردا قىزمەت اتقاردى.
2018-2020 جىلدارى "سپورتتى دامىتۋ ديرەكتسياسى" رمقك ديرەكتورى بولدى.
2020 جىلدىڭ ءساۋىر-قاراشا ارالىعىندا "نۇر-سۇلتان قالاسىنىڭ دەنە شىنىقتىرۋ جانە سپورت باسقارماسى" مم باسشىسىنىڭ مىندەتىن ۋاقىتشا اتقارۋشى; مىندەتىن اتقارۋشى بولدى.
2020 جىلدىڭ قاراشادان باستاپ قازىرگى ۋاقىتقا دەيىن "نۇر-سۇلتان قالاسىنىڭ دەنە شىنىقتىرۋ جانە سپورت باسقارماسى" مم باسشىسى بولدى.
ايتا كەتەيىك، بۇعان دەيىن كوميتەتتى قازاقستاندىق سپورتشى، بوكستان وليمپيادا چەمپيونى سەرىك ساپيەۆ باسقارعان. 2021 جىلدىڭ قازانىندا ول ءوز ەركىمەن جۇمىستان بوساتۋ تۋرالى ءوتىنىش جازدى. كەيىن ساپيەۆ ۇلتتىق وليمپيادا كوميتەتىندە جۇمىس ىستەيتىنىن حابارلادى.
"ادىرنا" ۇلتتىق پورتالى
