اقتوبە وبلىسىندا 8 كوپبالالى وتباسى باسپانالى بولدى

2132
Adyrna.kz Telegram

اقتوبە وبلىسىنىڭ اكىمى وڭداسىن ورازالين حرومتاۋ جانە ايتەكە بي اۋداندارىندا بولدى دەپ حابارلايدى "ادىرنا" ۇلتتىق پورتالىنىڭ ءتىلشىسى.

وبلىس اكىمى حرومتاۋ اۋدانىنا قاراستى تاسوتكەل جانە اقبۇلاق اۋىلدارىنداعى اۋىلىشىلىك گاز قۇبىرلارىن ىسكە قوسۋ راسىمىنە قاتىستى.

ەلدى مەكەندەرگە گاز بەرۋ وڭىرلەردى 2025 جىلعا دەيىن دامىتۋدىڭ مەملەكەتتىك باعدارلاماسى اياسىندا جالپى ۇزىندىعى 78,6 شاقىرىم بولاتىن اۋىلارالىق گاز قۇبىرلارىنىڭ قۇرىلىسى اياقتالعان سوڭ مۇمكىن بولدى. قۇنى 750 ملن-نان اساتىن جوبانى "بابەك قۇرىلىس" جشس مەردىگەر مەكەمەسى جۇزەگە اسىردى. سول كۇنى ايتەكە بي اۋدانىنداعى ارالتوعاي اۋىلى دا گازبەن قامتىلدى.
"اسۋ-ك" جشس مەردىگەر مەكەمەسى 23,5 شاقىرىم گاز قۇبىرىن توسەدى. جۇمىستىڭ جالپى قۇنى 299 ملن تەڭگەنى قۇرادى. اۋىلداعى 230 ءۇي مەن 4 الەۋمەتتىك نىسانعا كوگىلدىر وتىن كىرەدى.

"گازدى ءبىز الدىمەن دامۋ كەلەشەگى بار، تۋ جاعىنان دا، كوشى-قون جاعىنان دا ديناميكاسى جاقسى ءىرى ەلدى مەكەندەرگە جۇرگىزۋگە تىرىسامىز. ادەتتە بۇل - شارۋامەن اينالىسۋ ءۇشىن سۋى بار، جاعدايى جاسالعان، ۇلكەن جولدىڭ بويىندا ورنالاسقان ەلدى مەكەندەر. سونى ەسكەرسەك، بىزدە پەرسپەكتيۆتى جوسپار بار. گاز قۇبىرىن جۇرگىزۋ - ءبىر كۇندىك جۇمىس ەمەس ەكەنى تۇسىنىكتى، ول ءۇشىن مەملەكەتتىك ساراپتاما جۇرگىزۋدى ەسەپتەگەندە كەمىندە ءبىر جىل كەتەتىن جوبالىق-ىزدەنىس جۇمىستارى، جوبالىق-سمەتالىق قۇجاتتاما دايىنداۋ كەرەك. باقىتىمىزعا قاراي ۇكىمەت ءبىزدى بۇل باستامادا بەلسەندى قولدايدى، جانە سوڭعى كەزدە ءبىز جىل سايىن كەمىندە 15-16 اۋىلدى گازبەن قامتىپ وتىرمىز.

بيىل 14 اۋىلعا گاز كىرگىزەمىز دەپ جوسپارلاعانبىز، بىراق 16 اۋىلدى قامتىدىق. بۇل مەردىگەرلەردىڭ ادال جۇمىسى مەن ينۆەستيتسيالىق جوبا ەسەبىنەن قوسىمشا ەكى ەلدى مەكەندى قوسقان "ينتەرگاز تسەنترالنايا ازيا" كومپانياسىنىڭ قولداۋى ارقاسىندا. گازبەن قامتۋ شاعىن جانە ورتا بيزنەستى دامىتۋعا ىنتالاندىرسا، ءبىر جاعىنان بۇل ءبىز حالىقتى قامتۋىمىز قاجەت قاراپايىم تۇرمىستىق جاعدايلار",- دەدى وڭداسىن ورازالين.

قارابۇتاق اۋىلىنىڭ ىشىندەگى​ بيىل جوندەلگەن كوشەلەردى قاراپ بولعان سوڭ اۋدان اكىمى دارحان ەرماعانبەتوۆتىڭ قارابۇتاق اۋىلدىق وكرۋگىن دامىتۋ مۇمكىندىكتەرى تۋرالى بايانداماسىن تىڭدادى.

"بيىل قارابۇتاقتا "اۋىل-ەل بەسىگى" باعدارلاماسى بويىنشا بەس كوشە جوندەلدى، جارىن جۇمىس جالعاساتىن بولادى، ءتيىستى جوبالىق-سمەتالىق قۇجاتتاما ازىرلەندى. ءسىزدىڭ تاپسىرماڭىزعا ساي كوشەلەردى جارىقتاندىرۋ جۇمىسى دا كۇشەيتىلدى. قارابۇتاقتا 29 كوشە بولسا، ونىڭ 90%-ىندا جارىق بار. سۋ قۇبىرىن قالپىنا كەلتىرىپ، كەڭەيتۋگە جوبالىق-سمەتالىق قۇجاتتاما ازىرلەنىپ جاتىر. سپورت مەكتەبى اشىلدى، سپورت كەشەنىن تۇرعىزاتىن ورىن دايىن تۇر.

بەلقوپا اۋىلىندا جىل سوڭىنا دەيىن گاز قۇبىرىنىڭ قۇرىلىسىن اياقتاۋدى جوسپارلاپ وتىرمىز، سۋ قۇبىرىن سالۋعا بايقاۋ جاريالاندى. جاروتكەل اۋىلىندا اۋىلعا كىرەتىن جولدى، مەكتەپ
ورنالاسقان كوشەنى كۇردەلى جوندەۋ جوسپارلانۋدا، سونىمەن قاتار، اۋىلدى سۋمەن قامتامسىز ەتەتىن جوبالىق-سمەتالىق قۇجاتتاما ساراپتامادان ءوتىپ جاتىر. ەڭبەكتۋ اۋىلىندا اۋىلىشىلىك جولداردى جوندەۋ، كوشەلەردى جارىقتاندىرۋ جانە مەكتەپتەردى كۇردەلى جوندەۋ جۇمىستارى جۇرگىزىلەدى",- دەدى د.ەرماعانبەتوۆ.

جۇمىس ساپارى اۋدان ورتالىعى - تەمىربەك جۇرگەنوۆ اۋىلىندا جالعاستى. مۇندا وبلىس اكىمى اۋىلعا ەسىمى بەرىلگەن
مەملەكەت جانە قوعام قايراتكەرىنىڭ ءمۇسىنىنىڭ الدىنا گۇل شوقتارىن قويدى. ءمۇسىن بيىل قازان ايىندا "جومارت - ايتەكە بي" قوعامدىق قورىنىڭ قارجىسىنا ورناتىلعان.

وسى جىلى اۋىلداعى ستاديون تۇبەگەيلى وزگەردى. قالپىنا كەلتىرۋ جۇمىستارى كەزىندە مۇندا جۇگىرەتىن جول مەن شاعىن فۋتبول وينايتىن جاساندى گازونى بار الاڭ سالىندى، ۆوركاۋت الاڭ مەن 608 كورەرمەنگە ارنالعان تريبۋنالار ورناتىلدى، اكىمشىلىك عيمارات رەتكە كەلتىرىلدى. ايتا كەتەيىك، بۇل ستاديونعا 33 جىل ىشىندە جاسالىپ تۇرعان ءبىرىنشى جوندەۋ جۇمىستارى.

جۇمىس ساپارى حالىقتىڭ ءالجۋاز توبىنا جاتاتىن ءۇي كەزەگىندە تۇرعاندارعا جاڭا باسپانالارىنىڭ كىلتىن تابىس ەتۋمەن جالعاستى. سەگىز كوپبالالى وتباسى جاڭا قونىس يەسى اتاندى. ولار ءۇشىن ارنايى ەكى بولمەلى ءتورت ءۇي سالىنعان.

"كوپ جىلدار بويى كەزەكتە تۇردىق. بالالارىمىزعا جاعداي جاساعانى ءۇشىن مەملەكەتكە راحمەت. كوپبالالى، مۇقتاج وتباسىلار باسپانالى بولسىنشى. ءبىزدىڭ التى بالامىز بار. تۇڭعىشىمىز 11 جاستا، كەنجەمىز ەرتەڭ 2-گە تولادى. ۇلىمىزدىڭ تۋعان كۇنىنە وسىنداي سىيلىق بولايىن دەپ تۇر",- دەدى قۋانىشىمەن بولىسكەن كوپبالادى اكە، تەمىرجولشى تالعات ومىرزاقوۆ.
ءوڭىر باسشىسى مۇقتاج جانداردى قولجەتىمدى ءارى قولايلى باسپانامەن قامتۋعا باسىمدىق بەرىلەتىنىن اتاپ ءوتتى.

"مەملەكەت باسشىسىنىڭ تاپسىرماسىنا سايكەس ۇكىمەت بىرقاتار باعدارلامالاردى ازىرلەگەن، سول ءۇشىن قاراجات بولىنۋدە. جانە جۇمىس تەك وبلىس ورتالىعىندا عانا ءجۇرىپ جاتقان جوق. كەزەكتە تۇرعاندارعا ارنالعان باسپانا، سونىڭ ىشىندە كوپقاباتتى تۇرعىن ءۇي اۋدان ورتالىعىندا دا بەرىلىپ جاتىر. ماسەلەن، بادامشادا جۋىردا بەسقاباتتى ءۇي تاپسىرىلادى. مۇندا اۋىلدىق ايماققا بارىنشا قولايلى بولاتىن، وتباسىلار شارۋالارىمەن اينالىسۋ ءۇشىن بىرقاباتتى باسپانا سالىنعان",- دەدى وڭداسىن ورازالين جاڭا قونىس يەلەرىنە.

جالپى، اۋدان ورتالىعى بەلسەندى دامىپ كەلەدى، اباتتاندىرۋ بويىنشا اۋقىمدى جۇمىستار جۇرگىزىلىپ جاتىر. بيىل
"اۋىل-ەل بەسىگى" باعدارلاماسى اياسىندا 412 ملن تەڭگەدەن استام سوماعا بىردەن جەتى كوشە جوندەلدى، كەلەر جىلى التى كوشە جوندەلەدى. سونىمەن بىرگە اۋدان ورتالىعىنداعى بارلىق كوشە 2022 جىلعا قاراي تولىقتاي جارىقپەن قامتىلادى. سونداي-اق، وسى جىلى 21 بولىمشەسى مەن 17 مىڭ وقىرمانى بار ورتالىق كىتاپحانا عيماراتى رەستاۆراتسيالاندى. بۇدان بولەك، دەمەۋشىلەر قاراجاتى ەسەبىنەن جاڭا ساياباق اشىلدى.

"بيزنەسمەندەردىڭ ءوز قارجىسىنا ساياباقتار، بالالار الاڭى مەن گۇل باقتارىن سالىپ بەرگەنى قۋانتادى. اۋدان ورتالىعى تۇرعىندارىنىڭ سۇرانىسىنا ساي كەلەتىن ستاديوندى جوندەي العانىمىز قۋانتادى. اۋىل ايماقتى دامىتۋ، اۋىلدا تۇرۋ ءۇشىن قولايلى جاعداي جاساۋ جۇمىستارى جالعاساتىن بولادى",- دەدى ءوڭىر باسشىسى.

قىزمەتتىك ساپارىنىڭ قورىتىندىسىندا وبلىس اكىمى ايتەكە بي اۋدانىن الەۋمەتتىك-ەكونوميكالىق جاعىنان ءارى قاراي دامىتۋ بويىنشا بىرقاتار ناقتى تاپسىرمالار بەردى.

 

"ادىرنا" ۇلتتىق پورتالى.

پىكىرلەر