بۇگىن تۇركيانىڭ ستامبۇل قالاسىندا تۇركيا جانە تۇركى ەلدەرىنىڭ اراسىنداعى ساۋدا جانە ەكونوميكالىق بايلانىستاردى دامىتۋعا ارنالعان كونفەرەنتسيا باستالدى. كونفەرەنتسيا تۇركيا ساۋدا مينيسترلىگى جانە DEIK سىرتقى ساۋدا قاتىناستارىن رەتتەيتىن مەملەكەتتىك مەكەمەنىڭ ورتاق ۇيىمداستىرۋىمەن ىسكە اسۋدا.
حالىقارالىق كونفەرەنتسياعا تۇركى ەلدەرىنىڭ مينيسترلەرى مەن مينيسترلىك وكىلدەرى قاتىسادى. باستى تاقىرىپ رەتىندە پاندەميادان كەيىنگى ساۋدا قاتىناسىن دامىتۋ مەن ودان ارى قاراي جانداردىرۋ تۇر. پاندەميادان كەيىن ىسكە اسۋى ءتيىس مينيسترلىكتەر، مەملەكەتتىك ورگاندار جانە جەكە كاسىپكەرلەردىڭ ارىپتەستىگىن ارتتىراتىن جانە ساۋدا قاتىناستارىن دامىتاتىن جاڭا جوبالار تانىستىرىلادى دەپ كۇتىلۋدە. اتالمىش شارا تۇركى ەلدەرىنىڭ تاۋەلسىزدىگىنىڭ 30 جىلدىعىنا وراي ۇيىمداستىرىلۋى دا تەگىن ەمەس.
11-قاراشانىڭ سوڭىنا دەيىن جالعاساتىن شارانىڭ ەرتەڭگى تۇركى ەلدەرىنىڭ باسشىلارىنىڭ باس قوسۋىنا دەيىن ءوتۋى دە تەگىن ەمەس. مەملەكەت باسشىلارى دا، ونىڭ ىشىندە قازاقستان مەن تۇركيا ءوزارا ساۋدا قاتىناستارىن ارتتىرۋعا مۇددەلى. ەلباسى ن.نازارباەۆ پەن تايىپ ەردوعان اراسىنداعى ساۋدا قاتىناسىن 5 ملرد دوللارعا، ارتىنشا ونى 10 ملرد دوللارعا كوتەرۋ بويىنشا كەلىسىمدەر جاسالعان بولاتىن. كەلىسىمدەر ءساتتى ىسكە اسسا دا، پاندەميالىق شەكتەۋلەر بۇل ۇدەرىستى ءبىرشاما تەجەدى. الايدا 2020 جىلى قازاقستان مەن تۇركيا اراسىنداعى ساۋدا قاتىناستارى تىركەلدى. تۇركيا قازاقستانعا ينۆەستيتسيا سالۋشى ون ەلدىڭ بىرىنە جاتادى.
كونفەرەنتسياعا قازاقستان تاراپىنان مينيسترلەر باقىت سۇلتانوۆ پەن اسەت ىرعاليەۆ قاتىسادى دەپ كۇتىلۋدە. ول تۇركيا تاراپىنان DEIK سايتىندا جاريالانعان رەسمي باعدارلامادا كورسەتىلگەن.
"ادىرنا" ۇلتتىق پورتالى
